Kola Sa La Itre Hnyinge i Nyipunie

◼ Nemene la aqane tro nyipunieti a ujë ngöne la ijine tro la atr a qaja ka hape, tha tro kö la itre temoë i Iehova a hane traqa kowe la hnalapa i angeic?

Maine epuni a öhne la ketre hna cinyihane ngöne la qëhnelö laka hna wathebone kowe itre hmi maine pena itre temoë i Iehova hmekuje hi, loi e troa drengethenge la mekune ne lai atr, hawe the fenafena kö.

Ame itre xaa ijin, easë a öhne la itre hna cinyihane kola wathebone la itre ka saleme trootro. Pine laka easë a kuca la huliwa ne hmi nyine thue loi, ke, tha thatraqa së fe kö la hna wathebone cili. Hawe, ijiji së troa fenafena la qëhnelö. Maine kola icilekeu me easë hnene lai atr, ke, loi e tro së a atreine hnyawa qejepengöne koi nyidrë ka hape ame la hna cinyihane ngöne la qëhnelö i nyidrë, ke, tha kolo fe kö a hane wathebo së. Nge e öni angeice jë ka hape thatraqane së fe, itre temoë i Iehova la itre hna wathebone cili, hawe, drenge ju la hnei nyidreti hna amekötin.

Ame la itre xaa ijine easë a cainöje trootro, ke, ngöne la ketre hnalapa, hetre atr ka wesitre me qaja catrëne ka hape pë hmaca kö troa hane traqa hmaca kowe la hnalapa i nyidrë. Tro së drengethenge la hna qaja hnei nyidrë. Hawe, loi e troa fejane la drai memine la hnalapa ngöne la sine teritoar, matre tro la itre ka troa huliwaane hmaca a atrehmekune ka hape hnalapa lai tha tro hmaca kö a wang.

Tha loi kö tro së a mekune ka hape, ame la itre hnalapa hna wathebone troa kuca, ke, itre tha nyine tro hmaca kö a hane wang. Pine laka, ijije tro hmaca pena ha la itre atrene la itre hnalapa cili a jilapa ngöne ketre götran. Celë hi matre ame la itre fami ka troa nyi atrene hmaca, ke, ma ijiji angatre lai troa kapa hnyawane la maca ka loi. Thupene lai, ijije troa ujë la hnine la atr hne së hna ithahnata memin, matre öhnyi thangane ka loi hnene la atr jëne la itre iwaihmaca së. E troa eje lai, ke, loi e tro së a pane trotrohnine hnyawane la itre mekune e kuhu hni angeic.

Ijije troa wange la itre teritoar, matre a casi ngöne la macatre troa fejane ngöne la ca lis la itre hnalapa hna wathebone. Nge tro la atre thupëne la huliwa ne cainöj’a iëne la itretre cainöje ka atreine matre troa kuca la itre hnalapa cili. Celë hi aqane tro së lai a atre laka, casi palahi la itre ka lapan. Tro la atre cainöj’a atre hnyawa la itre hnyine sa kowe lai atr, celë hi matre tro angeic’a atrepengöne hnyawane la itre hna qaja e kuhu hnine lo itus Com­ment raisonner götrane 15-24 kola hape “Comment surmonter les objec­tions.” Maine kaloi hi la aqane sa, ke, loi hmaca ha troa kuca lai hnalapa. Maine ejehi laka, ka icilekeu palahi me easë, ke, tha nyine tro hmaca kö a wange utihë e ketre macatre ka troa xulu. Ijije fe tro la itre kolezi ne la itre qatre thup a axeciëne laka, ame itre xaa ijin, ke, loi e troa tupathe la itre xaa aqane kuca.