Ketre Tulu Nyine Troa Xötrethengene Hnyawaane
1 Iesu la ka tru hune la nöjei atr’asë. Hnei nyidrëti hna amë la tulu ka pexeje kowe la itretre drei nyidrë. Ngacama tha pexeje kö la aqane trongëne së, ngo ame pe, ke, loi e tro së a catre troa “xöte thenge la ite thupa ca i nyidë.” (1 Pet. 2:21) Loi e troa eje the së la aja troa nyitipu Iesu, ene la troa catre cainöjëne la nyipici kowe la itre xan.
2 Tha hnei Iesu kö hna cainöje hmekuje hi; ngo atre ini ka sisitria catre nyidrë. “Ame hna haine atraqate la nöjei ate ka ala nyimu ngöne la ini nyidë.” (Mata. 7:28) Pine nemene matre maca catre nyidrë? Tro së a pane goeëne la “ini nyidrë.”
3 Tro Së a Xötrethenge Iesu Tuneka: Hna ini Iesu hnene la Tretretro i anga nyidrë. (Ioane 8:28) Hna upi nyidrë hnene la aja i nyidrë troa atrunyi Iehova, memine la atresiwa i nyidrë. (Ioane 17:4, 26) Hawe, ngöne la easë a cainöj, me ini, ke, epi aliene hni së fe la troa atrunyi Iehova, ngo tha tro kö a sipu atruni së kö.
4 Am’asë la itre ewekë hnei Iesu hna inine kowe la nöjei atr, ke, hna hneëtrepene qa hnine la wesi ula i Akötresie. Hnei nyidrëti hna amamane palahi la itre enyipicine hnene la itre hna cinyihane hnine la itusi qa thei Iehova. (Mata. 4:4, 7; 19:4; 22:31) E pi tro fe së a nyijëne la itre ka drenge kowe la Tusi Hmitrötr; qa ngöne lai, tro angatr’a goeëne laka ame la cainöje së, me ini hne së hna hamën, ke, hna hneëtrepene qa hnine la musi ka sisitria.
5 Ame la itre hna ewekë i Iesu, ke, tha itre hna ithahnata ka qea kö, ngo ijiji së asë troa trongën, pine laka tha jole kö troa trotrohniin. Ketre ceitun, hnei nyidrëti hna xatua së troa nue trije la itre menu i itre xan, matre tro Akötresieti a ketre nuetrije la itre menu së. (Mata. 6:14, 15) Tro së a tupathe troa qejepengöne la maca ne la Baselaia hnene la itre aqane ithahnata ka tha jole kö e troa trotrohnin.
6 Hnei Iesu hna xome la itre ceitun, me itre hnyinge nyine troa enijëne la itre mekune i itre atr. (Mata. 13:34, 35; 22:20-22) Ame la itre ceitun, ke, hna xome qa ngöne la itre ewekë hne së hna öhne e nöjei drai matre tro la itre atr a canga xölehuje la itre ini ne la Tusi Hmitrötre ka jole e troa trotrohniin. Loi e troa maca la itre hnyinge së, matre ijije kowe la itre atr troa pane mekune la itre hnei angatre hna dreng. Tro la aqane hnyinge cili a eatrongë angatre kowe la pune ka loi.
7 Hetre ijine i Iesu palahi troa qejepengöne hnyawaane la itre götrane ka jole kowe la itre ka ajane troa atrepengön’atrun. Ame la itre ka ajan, tune la itretre dreng, ke, trotrohnine hi angatre la aliene la ini Iesu. (Mata. 13:36) Hawe, tro fe së a hane kuca tune ngöne la kola hnyinge hnene la itre ka ajan. E maine thatreine kö së sa, ke, ijije tro së a pane sinethel, nge bëeke jë pë hë, e ketre ijine troa sa la itre hnying.
8 Hnei Iesu fe hna amamane la tulu ne aqane ini. Ketre ceitun, hnei nyidrëti hna hnea la itre lue ca ne la itretre dreng, ngacama nyidrëti la joxu i angatr. (Ioane 13:2-16) E hetrenyi the së la thina ka ipië, ke, jëne tro lai a upe la itre hnainine troa trongëne la itre hnei angatre hna inin.
9 Hnene la thina i Iesu hna enijëne la hni ne la itre atr, memine la ihnimi angatre kowe la meköt. Easë fe a ajane troa ketr la itre hni. Easë a tupathe troa amejëne la aja ka eje thene la nöjei atr troa hmi kowe la ketre haze ka sisitria, me troa mele memine la itre atr ngöne la tingeting, me manathith.
10 E treu Diseba, ijije tro së a qaja la hne së hna inine göi Iesu ngöne la easë a troa trofë trongëne la itus Le plus grand homme de tous les temps. E easë a xötrethenge la aqane ini Iesu, ke, tro së a xatuane la itre ka ajane troa kapa la ini i nyidrë.—Mata. 10:40.