Öhne Kö Epuni La Ketre Ewekë Hna Ajane Hnene La Ketre Atr?
1 Hna qeje Iehova tune la ketre Atr ka ixatua me hunapo së. Atre hi së laka ngöne la ijine ngazo, ijije tro së a thele ixatua thei Nyidrë, nge tro Nyidrëti a kepe së. (Salamo 18:2; 46:1) Ijije tro së a nyitipune la thiina ka loi celë, ene la troa hane wange la itre xan, ngöne la ijine angatr’a aja ixatua.
2 Nemene la ka upe la ketre atr troa catre xatuane la ketre? Nyimutre la itre atr ka xomeceitune lai me ihnim, nge ketre ewekë lai ka eje thene la atr. Nyipici, Tusi Hmitrötr’a xatua së troa tune lai. (Rom. 15:1) Hnei Paulo hna ithuecatre koi së ka hape ‘the isa wai ewekëne kö, ngo loi e isa wange la itre ewekë i itre xan.’—Fil. 2:4.
3 Ijije tro së a madrine e hne së hna kuca tune lai. (Ite Huliwa 20:35) Hnei Paulo hna ië Timoteo, ketre thöth, nyine tulu göi troa “wange nyipicine la pengöne” la itre trejine me angeic. (Fil. 2:20) Ka loi e troa nyimu thöthi ka hetrenyi la aqane mekune cili ngöne la itre ekalesia së. Ngacama thöthi së, maine qatr pena së, ame pe, ke, hetre itre ewekë ka ijije tro së a kuca e easë a öhne laka kola aja ixatua hnene la ketre atr.
4 Ase fe kö epuni mekune laka itre xan’a ajane tro epuni a hane hamë ixatua katru koi angatr? Maine jë, hna cipane la ketre trejine e pital, nge ala xalaithe hi la itre ka traqa troa iwai; maine pena thatreine hë enije hnene la ketre, ngo pëkö ca ka hamë ixatua koi angeic, maine ixatua pena göi troa nyihnyawa uma. Öhne kö Iesu la itre ka nyihluei Iehova tune la itre atrene la fami kola hane xatuane la ketre me ketre. (Mareko 3:33-35) Ngöne lo aceitune ne la itre mamoe me itre gootr, ke, hnei nyidrëti hna amamane laka ame la kepine matre hna ami angatre ngöne la götrane maca, ene laka hna kepe angatre hnene la Joxu, ke, hnene la ixatua hna hamëne kowe la itre trejine me Joxu.—Mata. 25:40.
5 Tro eni a ixatua tuneka? Nemene la nyine troa kuca matre troa hamë ixatua ngöne la ijine jol? Hapeu, Ijije kö koi së troa ketre sipu mekune troa ixatua ngöne la itre xaa pengöne jol? Maine jë, hetre itre qatre ka aja ithuecatr, ngo pëkö hnei angatre hna majemi kowe matre troa xatua angatr. Maine jë nyimutre la itre thöthi ka aja ixatua. Maine, lue trefëne pena ka xötrei öhne la nyipici a ce traqa memine la itre nekö i nyidro kowe la uma ne Baselaia, nge paatre kö la atre cainöje ka ini tusi me nyidro. Tro nyidroti a madrine e tro la ketre atr a ketre sipu tro troa ithuecatre koi nyidroti me itre nekö i nyidro.
6 E maine hna kökötre the së la ihnimi së kowe la nyipici me kowe la organizasio i Iehova, eje hi laka, tro fe a tru la madrine së, nge canga hetrenyi hi the së la mekune ne troa wangatrune la itre xaa trejine ngöne la ekalesia. Hnei Paulo hna upi së troa kuca tune lai. (2 Kor. 6:11-13) Hnei Iesu hna amamane hnyawaane laka maine easë a hnime la ketre, ke, celëhi ketre aqane lai ka nyipiewekë nyine amamane laka, itretre drei nyidrëti së.—Ioane 13:35.
7 Hawe, e öhne së laka hetre aja i ketre me ketre, ke, tro la nyipi ihnimi së kowe la itre trejin, me kowe la ekalesia a upi së troa sipu mekune me ixatua ngöne la itre götrane hne së hna atrein. (Gal. 6:9, 10) E tro së a waipengöi itre xan, ke, otrene ne ihnimi lai ka troa ieakeu së matre caas. (1 Kor. 10:24) Qa ngöne lai, loi e tro së a kuca la hnëqa së matre troa xatuane hnyawa la itre xane ngöne la ekalesia.