Nyipi Ixatua Ka Hmaloi Troa Kapa
1. Tune kaa la aqane nanazije ngöne la götrane la ua la ketre trejin?
1 Drei la ketre trejine föe, Ana la ëje i nyiidro; thaa ka hmi kö la föi nyiidro nge hna xome la traeme i eahlo hnene la huliwa i maseta. Jole catre koi eahlo troa sine pala hi la itre icasikeu i Keresiano, me catre cainöj, me inine la Wesi Ula i Akötresie. Ngacama hnimi Iehova pala kö hnei nyiidro, ngo nanaponyi hë eahlo. Eloine pe, hnei eahlo hna kapa la ketre ixatua ngöne la götrane la ua qaathene la itre qatre thup.
2. Nemene la aqane tro la itre Keresiano asë a amamane laka angatr la nyipi ixatua ka hmaloi troa kapa?
2 Troa mama laka easë a mejiune koi Iehova, e hne së hna kapa la ixatua ngöne la götrane la ua hna hamën jëne la ekalesia i Keresiano. Kola xötrethenge la tulu ne ihnimi Iesu Keriso hnene la itre qatr hnine la ekalesia; angatr a thele la itre ijine troa ithuecatr me xatuan la itre ka jole troa kökötre ngöne la götrane la ua. (1 Thes. 5:14 ) Ame ngöne la itre xaa ijin, nyipi ewekë troa qaja ju hi la ketre hnëewekë ka tru nyine ithuecatr; hnëewekë hna nyitrepene hnene la itre xötre ne la Tusi Hmitrötr. Thaa qane hmekuje kö la itre qatre thup troa xatuane la itre ka nango kucakuca, tro asë hi la itre Keresiano a thele troa hamë ixatua. Eje hi lai laka, hne së asë hi hna hane öhne la emenene la “tenge ewekë hna qaja ngöne la ijin’ ej.”—Ite edomë 25:11; Is. 35:3, 4.
3, 4. Nemene la nyine troa kuca matre troa xatuane la itre xan, nge nemene jë la nyine tro sa kuca?
3 Thaa Tro Kö a Cile Hnö: Easë a amamane ka hape easë a wanga atrune la itre ka aja ixatua, e hne së hna ketre isa thel troa ixatua, me ihnimikeu, me nyipi ewekë angatr. Ame la kola atrepengöne hnei Ionathana la jole ka eje thei Davita, ene pe angeic a “cile jë me tro koi Davita ngöne la hnit, me thue cate i angeice göi Akötesie.” (1 Sam. 23:15, 16) Loi e troa hni ka menyik matre troa xatuane la itre xan. Troa hetre thangane ka lolo catre mina fe, e hna qaja la itre trenge ewekë cememine la hni ka ajan. Ketre, hnei Iesu hna amamane hnyawa laka, troa thele ielen me catre huliwa, ngöne la kola troa thapa hmaca la trejine me easë trahmanyi me föe ngöne la götrane la ua. (Luka 15:4) Maine hetre hni ne ajane së troa xatuane la ketre atr, haawe, tro ha upi së troa catre ixatua ngacama thaa kökötre nyimenyime kö angeic.
4 Ketre ixatua ka tru la easë a ketre sipu thele troa canga hëne la itre xan, maine kolo itre ka ce sin me easë la ini tusi ne la ekalesia, matre troa ce cainöje me easë! Ame ngöne la easë a xatuane la ketre trejine me easë troa hane cainöj, maine jë tro sa thele troa ithuecatre koi angeic ngöne la ijine cili. Ame la itre ijine kola ce xome la huliwa i Akötresie, tre, celë hi itre ijine madrine lai, pine laka, ketre ithuecatre lai ka tru kowe la itre trejine ka xötrei mejë hmaca ngöne la götrane la ua.
5. Ame ngöne la itre xaa ijin, maine jë nemene la ixatua hna troa hamën hnene la itre qatre thup?
5 Ketre Hna Hnëkën Cememine La Ihnim: Ame koi itre trejine ka nango thaa hane hë cainöj maine thaa sine pena la itre icasikeu, nyipi ewekë troa nyixane la itre ixatua hna troa hamën matre troa acatren la lapaune i angatr. Maine jë ka loi troa ce wange matre inine la Tusi Hmitrötr ngöne lo itus Thili Jë Kowe La Nyipi Akötresie Ka Caas maine Approchez-vous de Jéhovah maine Nemene La Nyipi Ini Hna Hamën Hnei Tusi Hmitrötr? Pine laka ase hë bapataisone lai trejin, haawe, thaa nyipi ewekë kö troa qea menu pala ha hna etid me angeic. Loi e tro la Kometr Ne Huliwa Ne La Ekalesia a wange la itre trejine ka ijije troa kepe thangane qa ngöne la hna hnëkëne cili.—Wange ju la Huliwa Ne Baselaia ne Nofeba 1998 me Itre Hnying Hna Eköhagen ngöne Nofeba 2000.
6. Tune kaa la aqane hetrenyi hmaca la ketre trejine föe la trenge catr ngöne la götrane la ua?
6 Hnei Ana hna kapa me olene la ixatua ne la itre qatre thup, göi tro la ketre trejine föe ka macaj a pane ce inine la Tusi Hmitrötr me eahlo. Foa hi lao etidi hna kuca matre troa xatua Ana hmaca, troa easenyi koi Iehova. Hnei eahlo hmaca hna nyiqaane hane sine la itre icasikeu ne la ekalesia, nge hetrenyi hmaca ha thei eahlo la ajan troa atrunyi Iehova Akötresie e nyipine la ka ala nyim. Hnene mina fe la trejine föe ka macaj hna xatua Ana troa cainöj; hna tro sai Ana troa ce kuca me eahlo la itre etidi eahlo, matre troa hamë aja hmaca koi Ana troa hane cainöj ngöne itre hnalapa trootro. Kola mama hnyawa laka, ame la hnei Ana hna ajan, tre, ene la troa ixatua cememine la hni ka menyik; celë hi ka xatua eahlo lai troa xejë hmaca la itre huliwa ngöne la götrane la ua!
7. Nemene la itre manathith hna kapa qa ngöne la hna acatrene la mele ne la itre xan ngöne la götrane la ua?
7 Eje hi lai laka, easë asë hi a kepe thangane ka loi la hna acatrene hmaca la lapaune ne la itre ka aja ixatua. Ame lai trejine hna xatuan, tre, atraqatre la madrine i angeic troa easenyi catre koi Iehova, me hane sine hmaca la itre huliwa ne la organizasio i Nyidrë. Kola madrine fe hnene la itre qatre thup lai itre trejine ka mejë hmaca me kökötre ngöne la götrane la ua. (Luka 15:5, 6 ) Lolo catr la aqane imelekeu ne la itre trejine hnine la ekalesia nge tingetinge la aqane mele i angatr, qa ngöne laka, angatr asë hi a imeku. (Kol. 3:12-14) Drei la itre kepine ka lolo tro sa xötrethenge la tulu i Iehova, ketre nyipi ixatua ka hmaloi troa kapa!—Efe. 5:1.