Itre Ithuemacanyi Ne La Baselaia Ka Ketre Pengöne Thatraqai Nöjei Atr
1 Qaane e drai 24 Eiperem, easë a troa nyiqaane trofë trongëne la Itre Ithuemacanyi ne la Baselaia ka ketre pengöne kö; itr’ej’a troa amejëne la aja ne la nöjei atr ngöne la itre götran’asë! Ame la itre ithuemacanyi cili, ke, tha ene hmekuje kö laka ka traqa ngöne la ijine ka ijij, ngo loi fe troa saqe trofë. Hnene la itretre cainöje ngöne la nöjei ekalesia hna qaja amamane la aja i angatre troa sajuëne la huliwa celë ngöne la hni ka pexej, me troa catre hamëne la ithuemacanyi celë kowe la itre thauzane lao atr. Hapeu, epuni kö a hane catre huliwa göi troa cainöje trootro?
2 Hna iupifë la Itre Ithuemacanyi ne la Baselaia kowe la nöjei ekalesia, nge hna amekötine laka troa hamëne kowe la itretre cainöj; 50 e isa alacas, nge 250 koi ka pionie. Ije pepa hnei epuni hna atreine troa hane trofë trongën? E maine tha hnei epuni kö hna hamëne la etrune hnei epuni hna mekun, ke, hapeu, hnei epuni kö hna mekune la itre aqane troa kuca matre hamën’atrune qëmekene la troa nyipune la huliwa celë e 14 Mei? Pine nemene matre tha xome pe la huliwa ne pionie ka ixatua? Ijije kö tro epuni a hane sine la itre icasikeu ne troa cainöje trootro ngöne la wiik, tune la itre hna hnëkëne koi hej?
3 Tro la itre qatre thup’a ce wange hmaca la itre teritoare matre xeci koi angatre ka hape hna huliwaane hnyawaan’itr’ej. Hapeu, hna wange asë kö la itre hnalapa matre troa hamëne la Itre Ithuemacanyi ne la Baselaia? Troa meci la huliwa celë e hne së hna catre cainöje cememine la hni ka pexej.
4 Ejehi laka ma hetre ketre madrine katru hnei epuni hna kapa jëne la huliwa celë, alanyimu hë la itre ka hane ce huliwa me epun, hna e fe la itre ka xötrei cainöj, memine fe la itre thöth. Easë a mejiune laka, tro la madrine cili a ithuecatre me xatuan’asë la nöjei trejine matre bëeke hmaca angatre troa sisedrëne la aja ka mama thene lo itre atr ka kepe angatr. Drei la enyipiewekëne koi së e troa xomi note hnyawa thupene la easë a ase ithahnata memine la itre ka ajan. Ketre ijine ka lolo la pune la treu mei göi troa canga wange hmaca lo itre atr hne së hë hna ithahnata memin, matre nyiqaane inine la Tusi Hmitrötre me angatr.
5 Nemene la nyine tro së a qaja ngöne la easë a bëek hmaca? Maine loi e tro epuni a qaja ka hape: “Ma mekune hi epuni lo tarake hnenge hna hamë epun; Maine jë ase jë kö epuni hane e, matre atrehmekune fe hë epuni la aliene la itre mekun. Eje hi laka, ma hna ithahnatan’atrune la aliene la ithuemacanyi celë ngöne la nöje së hnene laka, kola ithahnatane la itre mekune ka sisitria memine la itre ewekë hna cile kow hnene la nöjei atr asë.” Amamane jë la itre xaa mekune ka nyipiewekë ngöne la hnaluene götran, nge hnyingëne ju ka hape: “Hapeue la mekune epuni, nemene la nyine tro së a kuca matre tro së a hnëkë thatraqane la itre ewekë ka troa traqa ngöne la itre drai ka calemi?” Nue pi troa sa. Ithahnataane jë la itre mekune ngöne la itre götrane 2-4 ne la Itre Ithuemacanyi ne la Baselaia, me nyiqaane troa inine la Tusi Hmitrötr; e maine tha ajane kö, ke, hamëne jë la itre zonale ka hnyipixe, nge abone ju.
6 E hna upi epuni troa huliwa ngöne la ketre teritoare ne la ketre ekalesia, ke, mekune kö epuni cinyihane la itre ëje ne la itre ka ajan, me aderesi angatr, matre tro pë hë la itretre cainöje ne lai ekalesia a wai angatre hmaca. Hawe, e maine hna nue koi epuni troa wange la itre ka ajan, ke, bëeke nyimenyime jë troa iwai.
7 Hnene la hnëqa ka eje the së, ene la troa trofë trongëne la Itre Ithuemacanyi ne la Baselaia hna amejëne the së asë la madrine me aja troa nu’asë la trenge catre së troa cainöjëne la Baselaia. Tha luelue kö së laka troa amanathithine la huliwa celë, nge tro ha nyipiine catrëne la atresiwa ka draië i Iehova memine la trepene mekune i Nyidrë hnene la nöjei atr e cailo fen. (Isa. 12:4, 5) E tru la hne së hna huliwa, ke, tro fe a tru la madrine së.—Sal. 126:3.