Itre Keme Me Thine Ka Madrin!
1 E maine ketre thöthi epuni ka mele hnine la fami ne keresiano, ke, hetre aqane kuca ka ketre pengöne nyine troa amadrinëne la itre keme me thine i epun. E maine epuni a catre xötrëne la gojenyi ka meköt, ke, “tro la keme me thine i epuni a madin.” (Ite Edom. 23:22-25) Ejehi laka, ame la aja ne la itre keme me thin, ke, ene la mele ka loi koi epun. Atraqatre la madrine i angatre troa goeë epuni e nu’apexejene la mele i epuni koi Iehova.
2 Loi e tro epuni a olene laka itre keme me thine i epuni e hnine la nyipici. Qaane la kola hnaho epuni, hnei angatre hna thu’ai epun, me xeetrë epun, me lapa xomi epun, me inyiëë epuni ngöne la epuni a wezipo. Ketre mina fe, hnei angatre hna catre ini epuni la pengöi Iehova, memine la itre jë i Nyidrë; celëhi ini hna kuca matre eatrongë epuni kowe la mele ka tha ase palua kö. (Efe. 6:1-4) Nemene la aqane tro epuni a amamane la madrine me ole i epun?
3 Kapa Ju Epuni La Nyipici: Hnene la itre keme me thine i epuni hna catre ini epuni matre tro epuni a wangatrune la nyipici, troa kökötre ngöne la ua, me fedre kowe la organizasio i Iehova. Loi e tro epuni a amamane la madrine i epun, ene la troa nyipiine la ini tusi ne la fami. Amamane jë la aja i epuni troa sine la itre icasikeu, isa mekune ju troa hnekë matre ijije tro la fami a hane traqa qëmekene la hawa hna sa. Loi e tro epuni a lapa ezine la itre keme me thine i epuni ngöne la itre ijine icasikeu, me drenge hnyawaane me ce wange la itre itusi hna troa inin. Catre jë troa hane sa ngöne la icasikeu. Isa sipu amamane ju laka epuni la ketre hnainine ka ajane ngöne Ini Ne Cainöje Trootro Qa Thei Akötresie, ene la kola kapa la itre xötre qa hna athipi koi epun, nge epuni a catre troa aeatrën’eje. Saene jë troa hane ixatua ngöne la itre hnepe jole ne la Uma ne Baselaia, maine ngöne la ketre ewekë pena hnei epuni hna atrein. E maine hnei epuni hna majemine kuca la itre huliwa celë, ke, epuni hi lai a thupëne la hni epuni ngöne la itre ewekë ka sisitria, me ka loi ngöne la götrane ne la ua.
4 Troa Amë Trongëne La Itre Ewekë Hnei Epuni Hna Ajane Troa Traqa Kow: Ame la easë a catre cainöj, ke, easë lai a amamane la aja së troa atreine matre ketre atre cainöje së. E hne së hna e lapaane la Tusi Hmitrötre e nöjei wiik, ke, ketre ewekë lai ka sisitria catre fe, loi e tro së a ketre sipu e asë la Tusi Hmitrötr. Nge lapa mekune ju laka tro epuni a traqa kowe la itre hna amekötine göi troa sa xepu koi Iehova, me göi troa bapataiso. Loi e tro la itre keme me thine i epuni a waipengöi epuni hnyawa ngöne ini, matre tro epuni a kapa la ini ka troa xatua epuni ngöne la huliwa ne cainöje trootro i Iehova. Catre jë troa akökötrene thei epuni la thina ka loi, matre troa upe la itre xane troa qaja aloinyi epuni pine la itre hnëqa hna hane athipe koi epun, tune la troa hane pionie, maine troa huliwa hnine la Bethela. (Ite Huliwa 16:1, 2) E tro epuni a aeatrëne la itre hnei epuni hna mekune kow, ke, tro lai a xatua epuni troa “tupathe la nöjei ewekë ka isa pengöne kö, mate . . . tiqa nyipunie hnene la ite wene la thina ka meköt.”—Fil. 1:10, 11.
5 Ame ngöne la ijine easë a thöh, ke, ketre ijine ka nyipiewekë catre göi troa inin, troa xomi ini qa ngöne la itre ewekë hna melën, me troa thele troa atreine ce mele me itre xan. Ketre ijine fe lai laka epuni a madrine la mel, ke, pë palakö thei epuni la itre jole me itre hnëqa ka hetrenyi thene la thupëtresiji ka nyipi atr. Hnei Solomona hna qaja ka hape: “Thupëtesiji fe, madinejë eö e ija pete kö eö, nge aciacijë la hni ö; me ite ewekë hna goeëne hnei lue meke i ö.” (Ate Cai. 11:9) E maine epuni a amë e kuhu hni epuni la ajane troa nyihlue Iehova ngöne la epuni a thöth, ke, tro epuni a kapa la itre manathithi ka utihë epine palua.—1 A. L. Ite Jo. 28:9.
6 E maine tro epuni a “xöte thenge la thina ka meköt,” me xelene la “ite aja i thupëtesij,” ke, ijije tro epuni a ahmaloinyi itre keme me thine i epuni qa ngöne la jole i angatr, me itre hace i angatr. (2 Tim. 2:22) Tro epuni lai a hamëne la sipu hni epuni ka troa thuemadrin. (Ite Edom. 12:25) Tro asë hi epuni a thuemadrinëne la Atre xupi epun, Iehova Akötresie.—Ite Edom. 27:11.