Itre Madrine Qa Ngöne La Hna Pionie Ngöne La Drai Ka Pexej
1 Pine laka itre thöth epun, nyipici laka, epuni a hnehengazon la mele i epuni elany. Ite Edomë 21:5 a qaja koi së ka hape, “ame la ite mekune ne la ate cate huliwa, tre, kola atena mon.” Troa nyine loi koi epun, la troa mekune hnyawa la itre hna ajan troa kuca elany ngöne la mel. Maine epuni a mekun la itre nyine tro epuni a kuca ngöne la itre drai elany, tre, lapa mekune jë troa hane xom la huliwa ne pionie ngöne la drai ka pexej. Pine nemen?
2 Hnyingëne jë kowe la itre atr ka pionie ekö ngöne la angatr a thöth, la itre hnei angatr hna mekun, nge tro angatr a qaja la mekun ka caas, kola hape: “Celë hi itre macatre ka sisitria ngöne la meleng!” Hna qaja hnene la ketre trejin trahmany ka melën la itre madrin hna kapa qa ngöne la hnei angeic hna pionie ngöne la drai ka pexej, ngöne la angeic a thöth, kola hape: “Ketre jëne madrin atraqatr, la easë a mekun hmaca lo itre ijine easë a thöth, nge atreine së troa qaja ka hape, hne së hna hane wangatrun la eamo ka nyipi lolo, hna hape: ‘Mekuneju la ate xupi ’ö ngöne la ite drai e thupëtresiji ’ö.’ ” (Ate Cai. 12:1) Nyipi ewekë catr tro epun me itre kem me thine i epuni a hnëkën me mekune amë enehila la itre nyine troa kuca elany, me huliwa matre troa isa goeën la isa aqane troa kapa lai pengöne madrine cili, ngöne la epuni a nekö trahmany maine jajiny.
3 Itre Keme Me Thin, Ithuecatre Jë Koi Angatr Troa Pionie Ngöne La Drai Ka Pexej: Ceitui Iehova me ketre Kem ka thupë së, Nyidrëti a amaman hnyawa koi së la gojeny nyine tro sa xötrethenge. (Is. 30:21) Nyidrëti a amaman la ketre tulu ka lolo catr koi nyipunie itre keme me thin Keresiano, ngöne laka, Nyidrëti a hamën cememin la ihnim la itre eamo nyine troa eatrongë së. Thaa tro kö a nue kowe la itre nekönatr tro angatr a isa iën la aqane tro angatr a mel, loi e tro pe a ini angatr cememin la inamacan matre tro angatr a trongën la gojeny ka troa aijijë angatr troa kapa la itre manathith qaathei Iehova. Ame hë la angatr a tru trootro, tro hë la itre ini hna hamën hnei epun, a xatua angatr troa “wangate hmekune la loi me ngazo.” (Heb. 5:14) Ame itre ka tru, pine laka ase hë angatr melën, atre hnyawa hi angatr laka, thatreine kö angatr troa mejiune hmekuje hi kowe la itre sipu mekune i angatr; nyipi ewekë tro angatr a mejiune koi Iehova matre tro Nyidrë a köjan la itre hne së hna troa feke ca ngön. (Ite edomë 3:5, 6) Nyipi ewekë la mekune cili kowe la itre thöth, pine laka, thatre pengöne hnyawa pala fe kö angatr la mel.
4 Itre keme me thin, ame ngöne la kola easenyi troa thöth la itre nekö i epun, maine nekönatr petre kö nyudren, ce ithanatane jë me nyudren la hnei nyudren hna ajan troa kuca elany. Tro la itre ka ini angatr ngöne la itre uma ne ini a tupath troa uku angatr, matre troa nyenyape thel la itre mo ne fen. Xatuane jë la itre nekönatr troa iën la itre götran ngöne la ini mus ka troa hetre thangan kowe la mele i angatr, ene laka, atreine angatr elany troa isa huliwa matre troa eatrën la itre hnëqa i angatr, nge kolo mina fe a aijijë angatr troa thele pala hi la itre aja ne la Baselaia. (1 Tim. 6:6-11) Nyimutre la itre götran, maine jë kolo hi a ajan troa sisedrën la itre ini me inin la ketre metie göi tro fe a nango hane huliwa, matre troa xom la itre hnepe hnëqa ngöne la mel, nge kolo mina fe a nyiqaan troa hane xom la huliwa ne pionie lapaa.
5 Xatuane jë la itre thöth troa catre cila xom la ahnahna, ene la troa thöth. Maine angatr a mekune pë hë thupen troa hane faipoipo, haawe, ijiji angatre hë troa hane cilën la itre hnëqa ka tru ne la faipoipo. (Wange ju la paragaraf 19 ne la sinecetröne la Huliwa Ne Baselaia ne Juun 2001, hna hape, “Hapeu Ijiji Së Fe Kö?”) Maine tro së a ithanatan hnyawa la pengöne la huliwa ne pionie, memin la troa huliwa ngöne la itre götran gaa aja ixatua, me hnine la Bethela, me troa mesinare, me canga amë la aja ngöne la itre hni ne la itre thöth nge co petre kö angatr troa kuca thenge la aja i Iehova, eje hi lai laka, tro ha kepe thangan hnene la itre xan, nge troa hamë madrin koi angatre kö.
6 Itre Thöth, Pane Xome Jë La Huliwa Ne Pionie Ngöne La Drai Ka Pexej: Itre thöth, thaa nyipi ewekë kö tro epuni a hnyingë pengön la huliwa ne pionie. Ijije hi tro epuni a tupath troa nyiqaan troa pionie ka ixatua, maine ngöne la epuni a ini me ngöne lo itre ijin epuni a mano. Nge tro hë epuni a hane öhne la madrin hna kapa qa ngöne la huliwa cili! Hapeu mama kö koi epuni la nyine troa kuca matre troa pionie ka ixatua ngöne la itre treu ka troa xulu?
7 Maine epuni la ketre trejin, thöth e hnine la organizasio i Akötresie, pane mekune hnyawa ju la aqane tro epuni a hane kökötr matre troa hane drikona. (1 Tim. 3:8-10, 12) Ketre, mekune jë la hnei epun hna troa axeciën e traqa epuni elany kowe la macatre, ka aijijë epun troa hane lö kowe la Bethela, maine troa hane sin la Ini Thatraqane La Itre Drikona. Hetrenyi la itre ini hnei epuni hna troa kapa qa ngöne la huliwa ne pionie, ene la aqane troa mele thenge la ketre porogaram, me aqane troa tro loi la aqane eköth epun la mele i epun, me aqane troa atreine ce mel memin la itre xan, me aqane troa xome hnyawa la itre hnëqa. Itre ewekë asë lai ka troa hnëkë nyipunie kowe la itre götrane qa ka tru elany.
8 Ame la ka nyipi ewekë ngöne la huliwa ne pionie, tre, ene la troa hetrenyi la hni ne ajan troa kuca la itre huliwa i Akötresie. Hnei Paulo aposetolo hna xatua së troa xome la aqane ujë cili, nge hnei nyidrë hna amaman hnyawa la itre thangan ka loi qa ngöne lai, kola hape: “Nge ame la nöje ewekë hnei nyipunie hna kuca, kuca hnine ju kösë koi [“Iehova,” MN], . . . ke atre hë nyipunie, laka, tro nyipunie a hetre thupene qathei Iehova ene la ihnadro.” (Kol. 3:23, 24) Epi tro Iehova a amanathithi nyipunie me aijijë nyipunie, troa hane kapa la itre madrin ka nyimutre jën la huliwa ne pionie!