Amamane Jë Laka Epuni a Kökötr
1 Pane mekune ju la ijine epuni a xötrei drenge la maca ne la Baselaia. Hnene la itre nyipici ka tha jole kö troa trotrohniine hna amejëne the së la aja kowe la atrehmekun, memine la trotrohnin. Hawe, canga öhnei epuni laka nyipiewekë tro epuni a amekötiine la aqane mele i epun, pine laka ka draië kö la itre jë i Iehova hune la itre jë së. (Isa. 55:8, 9) Hnei epuni hna kökötre ngöne la ua, me nue la mele i epun, me xome la bapataiso.
2 Maine nyipici laka, kökötre hë së ngöne la ua, tha tro jë kö a pë kucakuca the së. (Rom. 12:2) Maine jë, hnei epuni hna xoue atr matre kola ajolë epuni troa cainöje trootro. Maine pena, tha hnei epuni kö hna eatrëne la mekune hnei epuni hna ajane troa traqa kow, ene la troa melëne la wene ne la uati hmitrötre i Akötresie. Ngo tha hnei epuni kö hna hmacahmaca, hnei epuni pe hna catre troa kökötre ngöne la ua, ene laka, epuni palahi a amë panëne ngöne la mele i epuni la itre huliwa i Akötresie.
3 Maine jë, nyimu macatre hë enehila thupene lo epuni a nue la mele i epuni koi Iehova. Maine hnei epuni hna pane goeëne hmaca la itre macatre ka ase hë, nemene la itre götrane ne la mele i epuni hnei epuni hna saze? Hapeu, hnei epuni kö hna eatrëne la itre xaa aja hnei epuni hna mekune kow’ekö? Hapeu, eje palahi the së la aja “ngöne la qan”? (Heb. 3:14) Ketre keresiano ka macaje Timoteo, nge nyimutre hë lao macatre thupene la hna bapataiso angeic, ngo hnei Paulo hna ithuecatre koi angeic, me hape: “Mekuneju eö la nöjei ewekë celë; majeminejë eö kow’ it’ ej; mate mamapi la tropane la huliwa i ö kowe la nöjei ate asë.”—1 Tim. 4:15.
4 Nyipiewekë Troa Isa Sipu Waipengö Së: Maine hne së hna mekune hnyawa hmaca lo itre macatre ka ase hë, hapeu, eje kö laka the së palakö lo itre ngazo së ekö lo xötrei? Hapeu, triane ju kö së la itre xaa mekune hne së hna ajane troa aeatrën? E maine ejehi, ke, nemene la kepin? Ngacama, ka loi hi la itre mekune së, ngo hne së hna majemine uthe hmaca. Maine jë, hne së hna nue la itre ejolene la mel, maine itre xaa ewekë ju kö ne la fene troa acilë së.—Luka 17:28-30.
5 Pine laka hne së hna atreine troa kuca la itre hnepe ewekë ngöne la itre macatre ka ase hë, hawe, ijije tro fe së a kuca la itre xaa ewekë ngöne la itre macatre ka troa xulu. Ijije tro së a isa sipu wange la ka ijije koi së, me waipengöne la itre götrane ka hamëne la kucakuca koi së, nge thupene lai troa catre kökötre ngöne la loi. Maine jë, nyipiewekë tro së a aloine la aqane melëne së la itre wene ne la uati hmitrötre i Akötresie, tune la xome hnöth, me thina ka menyik, me xomihni ahoeany. (Gal. 5:22, 23) Maine tha iloi kö së memine la itre xan, maine jole koi së troa ce huliwa memine la itre qatre thup, ke, nyipiewekë catre troa eënyine la thina ka ipië, me troa hetrenyi la hni ka menyik.—Fil. 2:2, 3.
6 Hapeu, tro jë kö a mama ka hape easë a kökötre ngöne la ua, ene la troa eatrëne la itre hnëqa? E troa catre hnene la itre keresiano trahmany, ke, ijije tro angatr’a maca, me atreine matre aijijë angatre kowe la götrane qa ne drikona, maine qatre thupe pena. Alanyimu the së la ka xome la huliwa ne pionie lapa. Nge, nyimutre catre kö la itre ka xome la huliwa ne pionie ka ixatua. Ame itre xan, angatr’a catre troa aloine la aqane isa ini tusi angatr, matre angatr’a sa lapa ngöne la itre icasikeu ne la ekalesia, maine pena troa ketre ka cainöje ka atreine e hnine la ekalesia.
7 Ejehi laka, isa qanyi së kö troa axeciëne la götrane nyine tro së a aloin. Tro pe a xeci koi së laka ame la trenge catre hne së hna kuca qa kuhu hni së matre troa “tro kowe la hna tixenuë,” ke, kolo lai a akökötrene la madrine the së, me aijijë së troa xenyë e hnine la ekalesia.—Heb. 6:1.