Kola Saze La Hnedrai Së

¹ Tusi Hmitrötre a qaja koi së ka hape “kola pate la pengöne la fen.” (1 Kor. 7:31) Mama ha la enyipicine la hna ithnahnata celë enehila! Ngöne fe la hnedrai së, ke, hne së hna öhne la kola saze nyimenyime la itre ewekë, ngöne la aqane mekune me ngöne la aqane ujë ne la itre atr, nge kola mama lai thene la nöjei pengöne atr, maine itre trene mo, maine itre ka pë ewekë pena. Maine ajane së troa ketr la itre atr hnene la maca ne Baselaia, ke, nyipi ewekë tro la aqane tro fë së la maca ne la Baselaia a ihmeku memine la mele ne la hnedrai së enehila. Easë a ajane troa lolo la aqane tro fë së la maca ka loi matre troa amejëne la aja ne la itre atr, me ketr la itre hni i angatr.

² Tha ceitune kö la aqane kapa hnene la itre nöje ka nyimutre la huliwa ne cainoje ngöne la itre macatre ka ase hë, pine laka, lolo la mele ne la itre atr, nge tingetinge la mele i angatr. Nge angatre a wangatrune la hmi ngöne la mele i angatr. Hnei angatre hna nyipiine hnyawa la Tusi Hmitrötr. Ngöne la itre drai celë, ke, tru la itre mekune ka isazikeu memine la itre ini qa hnine la Tusi Hmitrötre hna amejën. Ame enehila, kola gomegome la mele ne la itre atr. Hna wangahmalohmaloeëne la hmi enehila. Xalaithe hi la itre ka lapaune kowe la Tusi Hmitrötr. Nge alanyimu catre la itre ka lapaune kowe la evolisio, celë hi matre paatre hë la lapaune koi Akötresie.

³ Hnene la ketre atre thupe ka wange trongëne la itre ekalesia hna qaja ka hape: “Kola mama enehila laka kola ngazo trootro la fen, nge tru catre hë hnei jole ka traqa kowe la mele ne la itre atr, celë hi matre loi e tro së a ini angatre la aqane troa mel.” Kola pane kukehnine hnene la itre atr la itre ewekë ka lapa xötreithi angatr, ene la itre fami i angatre memine la itre jole hnei angatre hna mekun, me hnehengazon. Itre ewekë lai pane porotrike i angatre ngöne la angatre a iöhny. Nyipi ewekë koi së troa lapa mekune pala hi la huliwa ne cainöj.

⁴ Baselaia i Akötresie Hmekuje Hi La Nyine Mejiune Catrëne Kowe La Itre Drai Ka Troa Xulu: Nyimutre la itre atr ka tha mejiune hmaca kö kowe la musi ne la atr. Angatre a mekune laka tha ijije kö troa hetrenyi la ketre fene ka mingöminge ngöne la hneijine së. Pëkö thene la hmi ka thoi la itre trepene ka troa hamëne la mejiun. Celë hi kepine matre ame la ewekë ka sisistria catre kowe la nöjei atr, ke, ene la troa drenge la maca ka loi ka qaja la Baselaia i Akötresie. Amamane jë la aqane tro ej a nyipune la itre jole enehila, me hamëne la itre ewekë hna ajane hnene la nöjei atr.

⁵ Tusi Hmitrötre Hmekuje Hi La Tulu Ka Nyipici, Me Ka Ijije Troa e Së: Nyimutre catre la itre atr ne la hnedrai së hna amenune hnene la itre hene la fene ka mejiune kowe la inamacane la atr, memine la itre ini ne fen. Tha trotrohnine pala kö hnene la itre atr ka hape “tha qa i ate troa amekötine la ite hna feke ca hnei angeic.” (Ier. 10:23) Ame la ini ka tru hnei angatre hna kapa, ke, ene laka tro angatre a ‘lapaune koi Iehova hnene la hni ka pexej, ngo tha lapa qale kowe la hna trotrohnin.’ (Ite Edo. 3:5) Kola saze la itre hnedrai, ngo tha saze kö la Tusi Hmitrötr. Haawe, ngöne la easë a cainöje trootro, ke, loi e tro së a amamane pala hi la Wesiula i Akötresie, me inine la itre xane troa kapa madrine la tulu ka nyipici qa thei Akötresie. (2 Tim. 3:16, 17) Maine ajane së troa eatrëne la mekune celë, ke, loi e tro së a amamane kowe la itre atr ka hape ka nyipi ewekë koi së la Tusi Hmitrötr, ene laka easë a xome eje ngöne la kola nyiqaane cainöj, me sa la itre hnyinge i angatr, nge loi e troa amamai angatre ka hape nyipi ewekë troa inin ej, me troa trongëne la itre ini ka troa hamë së la inamacan.

⁶ Ngacama kola saze la itre hnedrai enehila, ngo ame pe tha saze kö la aja së kowe la huliwa ne cainöj. Easë a troa cainöjëne la maca ka loi ne la Baselaia, me eköthe la mejiune së kowe la Wesiula i Akötresie, me xatuane la itre xane troa goeëne la enyipiewekëne la troa inine la Tusi Hmitrötre me easë. Loi e troa mama ngöne la itre hne së hna qaja lo itre ewekë ka ketr la itre atr hne së hna cainöje kow. Maine tro së a kuca tune lai, ke, atreine tro fe së a hane itretre tro fë la maca ka loi kowe la itre xan, nge ijije hë tro së a hane xatuane la itre atr ka alanyim.​—1 Kor. 9:19, 23.