Thele Jë La Itre Atr Ka Hni Ka Ajan
1 Ame la ketre aliene la huliwa ne cainöj, ke, ene la troa thele la itre atr “ka lapaune lo hna hnëkëne kowe la mele ka tha ase palua kö.” (Ite Huliwa 13:48) Ketre götrane ka hetre thangane catre la troa tro fë trongëne La Tour de Garde me Réveillez-vous! pine laka ijije tro itre ej a amejëne la aja ne la itre atr matre hetre mejiune kowe la Baselaia. Easë a troa tro fë trongëne la itre zonale me thele troa abone la itre atr e treu eiperem. Loi e tro së a hetrenyi la mejiune matre e öhne së la aja thene la itre atr, ke, atreine hi tro së a nyiqaane inine la Tusi Hmitrötre koi angatre jëne la itus La connaissance qui mène à la vie éternelle. Hanawange la itre xaa mekune ka ijije tro epuni a qaja trongën:
2 Maine epuni a trofë “La Tour de Garde” ne 1 eiperem, ke, amamane jë la hna cinyihane ka hape “Atrune jë la Joxu ka epine palua!,” ka qaja atrune la cainöje koi nöjei atr ngöne lo ijine kovasio ne distrik lo macatre hnapan, nge qaja ju ka hape:
◼ “Alanyimu la itre atr hne së hna ithahnata memin ka lapaune koi Akötresie. Ngo ame koi itre xan, ke, jole koi angatre troa lapaune koi Nyidrë. Tuneka fe la mekune i epun? [Nue pi troa sa.] Hetre ewekë ka anyipicine ka hape hetre Akötresie. [E jë la Salamo 104:24.] Ngöne la easë a goeëne la ketre aparei ne foto maine ketre ordinatör pena, ke, easë a canga trotrohnine laka hetre atr ka inamacane ka xupe itre ej. Hapeu, meköti kö e troa qaja ka hape ame la itre ewekë ka tru hna thatreine trotrohnin, tune la ihnadro me easë itre atr, ke itre ka traqa xane a pë kö atre ixup?” Xome jë la ketre paragarafe qa hnine la hna cinyihane nyine troa amamane la ketre kepine ka nyipi ewekë hna thele matre troa lapaune koi Akötresie. Hnyingë angeice jë ka hape, ajane kö angeice troa hane abone.
3 Hnine “La Tour de Garde” ne 15 eiperem, kola mama la hna cinyihane ka hape “Pine nemene matre troa kapa la manathithi hnene la nyipi hmi.” Qëmekene troa amamane ej, ke, hnyingëne ju ka hape:
◼ “Nyimutre catre hnei hmi enehila ngöne la fen, hapeue la mekune i epun, Akötresieti kö a kepe angatr asë? [Nue pi troa sa.] Hnei Iesu hna qaja ha ekö ka hape, ngacama kola uune hnene la ka alanyimu ka hape itre ka hmi angatr, ngo ame pe ke, tro ha upe triji angatre itre ka tha kuca kö la aja i akötresie. [E jë la Mataio 7:21-23.] Nyipi ewekë catre tro së a wangatrehmekune hnyawa la nyipi hmi hna inine hnei Iesu.” Fe jë kowe la hune götrane ka hape “Nemene wene nyine tro la nyipi hmi a hamën?,” hna nyiqaane ngöne la götrane 16, nge qaja jë la ketre ceitun.
4 Maine epuni a amamane la taane mekune ka tru hnine la “Réveillez-vous!” ne 22 eiperem, hna hape “Eue la ijine troa paatre la itre isi,” qaja ju ka hape:
◼ “Ngöne la hneijine së enehila, ke, hna e la itre hadredre lao isi, cememine fe lo lue isi ka tru. Ngo, kolo pe a qaja hnene la itre hene la fen asë ka hape, angatr a ajane la tingeting. Ame asë hi la itre atr hnenge hna atre, ke, angatr asë hi a qaja la mekune celë. Maine eje hi laka, aja ne la nöjei atr asë la tingeting, pine nemene kö laka thatreine kö angatre troa aeatrëne lai? [Nue pi troa sa.] Hapeue la mekune i epun, nemene la hne së hna ajane matre hetrenyi jë la nyipi tingetinge e celë fen?” Thupene la hna sa hnene lai atr, ke, fe jë kowe la götrane 8 me 9, nge e jë la itre xötre tune la Salamo 46:8, 9. Xome jë la itre iatr me itre xötre hna fejan, nge amamane jë la aqane tro la Baselaia i Akötresie a axulune la tingetinge ka troa cile huti epine palua e cailo fene hnengödrai. Thupene lai, hnyingëne ju lai atr ka hape ajane kö angeice troa hane e la zonal, nge ce wange ju matre troa bëeke hmaca.
5 Maine epuni a öhne la itre atr ka qaja ka hape pëkö ijine i angatre troa drei së, ke, tupathe ju troa qaja ka hape:
◼ “Eahuni a ajane troa xatuane la itre atr ka tru jolene matre pë hë traeme i angatre troa waipengöne la ketre götrane la mele i angatr, ene la götrane la ua. Hane la itre zonale hun, La Tour de Garde me Réveillez-vous!, itre eje a hamëne hnyawa la itre mekune ka ijije me ka sisitria ka ketr la mele i nyipë memine la fami i nyipë. Eni a ajane troa amë pe la itre zonale celë matre tro nyipëti a hane e.”
Easë a mejiune laka tro la itre atr hne së hna öhne a öhnyi thangane ka loi qa ngöne la hna e la itre zonal La Tour de Garde me Réveillez-vous! Itre eje a hamëne “la maca ka loi.”—Isa. 52:7.