Loi e Tro Epuni a Hni Ka Pexeje Koi Akötresie!
1 Nyimutre la itre kepine ka upi së troa amamane la ole së koi Iehova. Maine pine lo itre ewekë hnei Nyidrëti hna kuca ha ekö, maine kolo pena lo itre ewekë hna kuca enehila, me itre ewekë hnei Nyidrëti hna troa kuca thatraqai së elany. Nemene la hne së hna troa kuca nyine amamane ka hape atraqatre la ole së? Hna sa hnene la salamo i Davita ka hape: “Tro pala kö ni a ole koi Iehova o ijin; tro pala kö la qeng a atrunyi nyidrë.”—Sal. 34:1.
2 Tusi Hmitrötre a amamane hnyawa la huliwa hna upi së troa kuca, ene la troa cainöj. Celë hi huliwa lai nyine tro së a wangatrun, me “kuca hnine kösë koi Joxu.” (kol. 3:23) Maine nyipici laka easë a hni ka pexeje koi Akötresie, haawe tune ka fe la etrune la hna huliwa hne së ngöne la hna cainöj? Nyipici laka, ame la easë a mekune la aqane hnimi së hnei Iehova, canga enijëne ju hi la itre hni së me upi së troa catre qaja aloinyi Nyidrë memine la itre trepene mekuna i Nyidrë ka tru kowe la itre xaa atr! Kola upi së troa kuca la hne së hna atrein.
3 Eje hi laka, ewekë hna treqene maine hna ajane thene la ketre atr ka hni ka pexeje koi Akötresie, la troa wangatrune hnyawa la ehmitrötrene la huliwa. Celë fe hi mekune ne la atr cinyihane la salamo, hnei nyidrë hna qaja ka hape: “Luengemene la o atrunyi cilieti ni ngöne la drai ka cas.” (Sal. 119:164) Kola thele ijine troa atrunyi Iehova, hnene la itre atr ka ce mekune memine la atr cinyihane la salamo. Nge pine laka ijije hi tro angatre a catre cainöj, angatre a thele troa kökötre ngöne la huliwa cili me thele troa kuca asë la hnei angatre hna atreine ngöne la götrane cili.
4 Nyimutre La Itre Ijine Ka Ijije Koi Së Troa Atrunyi Iehova: Maine easë a ajane troa qaja la maca ka loi, ke, thaa tro kö së a lapa treqene lo itre ijine troa cainöje trootro ngöne itre hnalapa lo hna hnëkëne hë hnei ekalesia. Hetre ajane fe la itre sine huliwa së, me itre sine ini së, me itre sinee së, me itre atr hne së hna atre, troa hane drenge la maca ne Baselaia. Ketre, maine ngöne la easë a ngenu kowe la ketre nöj, loi e tro fe së a hane thele troa porotrike memine la itre atr ka huliwa ngöne la itre otel, maine kowe la itre ka huliwa i restora, maine itre ka cile ngöne itre hna hamë saas, maine kowe la itre ka xomi taxi, celë hi ka troa nyijë së lai troa cainöje koi angatr. Maine pena ngöne la itre isa hnalapa së, nyipi ewekë fe tro së a hane cainöje kowe la itre ka lapa ezi së, maine itre atr ka feni feni qëhnelö së troa salemë ewekë. Nge maine hna cipa së e pital, ke, ijije tro së a cainöje kowe la itre ëfirmier, me itre droketre, me itre xaa wezipo.
5 Tru La Itre Thangane Ka Loi Hna Kapa Qa Ngöne La Hna Cainöje e Nöjei Ijin: Ngöne la ketre drai, hna tro la lue temoë ngöne la ketre park, ixelë ju pe hi nyidro memine la ketre thupëtresiji ka thele troa ngenu fë la nekö i angeic; nyidroti a pane cile ju me ithahnata me nyidrë. Eje hi laka hetre pune ka loi ne la hna ithahnata, pine laka, ngöne la itre drai thupen, ke, hna kapa madrine me ajane la nyipici hnei angeice memine la föe i angeic. Kola fe amamane pë hë thupene hnene la thupëtresije ka hape, qëmekene tro angeice a ixelë memine la lue Temoë, hnei angeice hë hna pane thith koi Akötresie, me sipo ka hape ‘Maine nyipici laka ka mele Nyipë, eni a sipone catrëne troa atre Nyipë.’ Celë hi matre Angeice a mekune laka, Iehova hi a sa la thith i angeice ngöne laka, kola traqa la lue Temoë koi angeice ngöne la park.
6 Troa atraqatre la madrine ne la itre atr ka nue apexejene la mele i angatre troa xatuane la itre xaa atr ngöne la ua. Atre hi angatre ka hape ame la huliwa cili, a hna kuca “hnene la hni ka pexej,” ke, celë hi nyine madrine lai koi Iehova.—1 A. l. ite Jo. 28:9.