Troa Ketr La Hni Ne La Atr Jëne La Hni Ka Menyike Ngöne La Kola Porotrik

¹ Ame la kola hape porotrike, ke, kolo lai a “ithawakeune la itre mekun.” Maine lolo me menyike la aqane nyiqane ithahnatane së la ketre topike ka ketr la itre xan, ke tro hë a amejëne la aja ne la itre atr, nge celë fe ka troa xatua së lai troa ketr la hni ne la itre atr matre hane fe angatre kapa la maca ne la Baselaia. Kola mama hnyawa laka, ka tru kö la thangane e troa porotrike jëne la hni ka menyike memine la itre atr ngöne la hni ka madrin, hune la troa hamëne la ketre cainöje ka qeadridri.

² Nemene La Aqane Troa Nyiqaane Porotrike Cememine La Hni Ka Madrine Me Ka Menyik: Ame la atreine së troa ithahnata memine la itre xaa atr, ke, thaa ene kö la troa qaja atrune me pi mama fë la itre mekune maine itre xötre hna hnëkëne hë. Ngo, kolo lai a hape, easë a thele troa porotrike memine la ketre atr. Hanawange la ketre ceitun, ngöne la easë a porotrike memine la ketre atr ka lapa ezi së, pëkö hne së hna xouen, nge thaa jole kö tro së a ihnyima. Thaa easë kö a thele la itre hne së hna troa qaja, ngo canga traqa hi la itre mekune nyine sa thenge la hnyinge i angeic. Maine tro së a nyipi ewekëne la hnei angeice hna qaja, ke, tro lai a xatua angeice troa ajane pala hi troa sisedrëne la porotrike me hmala troa ithahnata me easë. Loi e troa tune lai la kola cainöje koi itre xan.

³ Atreine hi troa hni ka madrine me hni ka menyik ngöne la kola troa porotrikëne la itre xaa topik; maine itre ihumuth, me itre jole ka eje thene la itre thöth, me itre jole ngöne la nöj, me aqane trongene la fen, maine pengöi drai pena. Ka hetre thangane catre la itre taane mekune ka ketr la mele ne la itre atr, ke, ijije tro itre eje a amejëne la aja i angatr. Thupene la hna nyiqaane la porotrik, atreine tro epuni a ee angeice kowe la maca ne la Baselaia.

⁴ Ame la troa thaa jole troa porotrik, ke thaa kolo kö lai a hape, thaa tro ha canga hnëkë. Nyipi ewekë troa hnëkë. Ngo, thaa nyipi ewekë kö troa e gufane la itre trenge ewekë, maine troa hnehene la ketre cainöj, wanga menumenu pi së ngöne la easë a troa sa hmekune la taane hna ajane troa ithahnatane me easë hnene la ketre atr, ketre tro hë së a thatreine waiewekë me thaa trotrohnine lai atr. (Ce wange ju 1 Korinito 9:20-23.) Ame la ketre aqane hnëkëne ka sisitria, ke, ene la troa iëne la caasi maine lue taane mekune qa hnine la Tusi Hmitrötr, nge lapa mekune ju la nöjei aqane troa porotrike xötreithe itre ej. Ce wange ju hnine la itus Comment raisonner, la itre taane mekune ka troa xatua epuni ngöne la götrane cili.

⁵ Itre Thiina Ka Sisitria Matre Troa Hni Ka Madrine Me Menyike La Aqane Troa Porotrik: Ame ngöne la easë a porotrike me itre xan, ke, loi e troa keukawahnine me menyike la aqane porotrike së. Loi e troa hnyimahnyima me madrine ngöne la aqane ujë, ke, matre atreine troa melëne lo lai itre thiina ka loi. Eje the së la maca ka mingöminge kö hune la nöjei maca e celë fen; eje la ka ketr la nöjei atr ka hni ka meköt. Maine drenge hi angatre laka, qa kuhu hni së la ajane troa cainöjëne la maca ka loi koi angatr, ke, tro lai a upi angatre troa drei së.​—2 Kor. 2:17.

⁶ Hetre madrine ka tru hna troa kapa, qa ngöne la hna thele troa porotrike memine la itre xaa atr. Ngo, loi e tro së a menyik, nge thaa tro kö a qaja la itre trenge ewekë nyine troa akötrëne lai atr, tro pe a imetrötrë ngöne la kola qaja la maca ne la Baselaia. (Gal. 5:22; Kol. 4:6) Catre jë troa amamane kowe lai atr laka, itre atr ka loi thiina epun. Qa ngöne lai, ngacama thaa hna tro kö a ketr la hni angeice ngöne la kola xötrei iöhny, ngo tro pë hë angeice a lapa pi porotrike memine la itre xaa Temoë elany.

⁷ Ame la troa nyiqaane la porotrike ngöne la thiina ka menyike me ngöne la hni ka madrin, ke, thaa thangane kö la hna ithahnata hmekuje maine hna kuca pena la ketre cainöj. Ngo, ketre mekune hi ka amejëne la aja ne la atr kowe la ketre taane ka ketri angeic. Maine tro pala hi së a canga hnëkë hnyawa, ke, atreine hi tro së a xolouthe la itre ijine troa porotrike memine la itre atr ngöne la thiina ka menyik, me ngöne la hni ka madrin. Catre jë së troa ketr la hni ne la itre atr hne së hna troa cainöjëne kow la maca ka sisitria, me hane atre la itre manathithi ka epine palua hna troa kapa qa thene la Baselaia.​—2 Pet. 3:13.