Loi e Tro Së a Eatrëne La Hne Së Hna Sa Xepu o Drai
1 Ngöne laka, atraqatre la madrine i Davita, atre cinyihane la tusi salamo, nyidrë a qaja jë koi Iehova, ka hape: “Tro ni a atrune la atesiwa i cilie epine palua, mate trongëne jë ni la ite xepung o drai.” (Sal. 61:8) Atre hi Davita ka hape ame la troa sa xepu, ke, ketre aja ka tru hna saene fë ngöne la hni ka pexej. Ngo angeice a trotrohnine fe laka, maine hnei angeice hna sa xepu, haawe nyipici qa i angeice fe troa aeatrën. Ngo hnei angeice pala hi hna atrunyi Iehova ngöne laka hnei Nyidrë hna aijijë angeice troa eatrëne o drai la hnei angeice hna sa xepu.
2 Ngöne la easë a saene koi Iehova, easë lai a sa xepu qa kuhu hni së troa kuca la aja i Nyidrë. Easë a ketre nue apexejenyi së me amë panëne ngöne la mele së, la troa nyihlue i Iehova. (Luka 9:23) Haawe, isa qanyi së troa aeatrëne la hne së hna sa xepu o drai. (Ate Cai. 5:4-6) Troa mama ngöne la aqane mele së ka hape, hne së hna nue la mele së koi Akötresie ngöne la ijine easë a xomi bapataiso, ke, atre hi së laka “ukeineqë la ate qaja uti hë la mel.” (Rom. 10:10) Kolo fe lai a qaja la huliwa ne cainöjëne la maca ka loi. (Heb. 13:15) Eje hi laka, isapengöne kö la aqane mele së, ngo loi e tro asë hi së a wangatrune la enyipiewekëne la troa cainöjëne pala hi la maca ka loi koi itre xaa atr o drai.
3 Loi e Tro Pala Hi a Thele La Nöjei Jëne Troa Cainöj: Ketre madrine ka tru la troa cainöjëne la maca ka loi kowe la ketre atr. Maine ajane së troa kuca lai o drai, ke, tro së a thele la itre jëne ka ijije koi së, troa cainöj. Hetre thangane catre la hna huliwa hnene la itre xan, hnene laka, hnei angatre hna thele troa cainöje ngöne la nöjei ijine ka ijij, maine kowe la itre sine huliwa, me itre sine ini, me itre ka lapa ezi së, maine itre xane ju kö hna ixelë memin e cahu gojeny. Ketre, ijije fe troa hane cainöje koi itre xane jëne la hna cinyanyi maine hna telefone pena. Maine tro së a wangatrune la nöjei aqane kuca celë, ketre tune mina fe la troa ami ijine troa cainöje trootro ngöne itre hnalapa, me kuci vizite, ijije hi tro së a hetrenyi la madrine ka ketre pengön, nge ka xulu qa ngöne laka, easë hë a troa nyiqaane inine la Tusi Hmitrötre kowe la ketre atr. Nyipici, atreine hi tro së a thele ngöne la nöjei ijin, la nöjei pengöne gojenyine troa cainöj.
4 Hna nyiqaane e hnene la ketre söre lo sine itus Examinons les Écritures chaque jour, ngöne la la itre hnepe traeme ne mano, qëmekene tro hmaca eahlo a xeji huliwa. Hnei eahlo hna könëne la ketre sine huliwa i eahlo troa ce e me eahlo la topike ne la drai, nge celë fe hi ka nyijëi eahlo lai troa inine la Tusi Hmitrötre kowe la föe. Hnei nyidroti hna etid, faifi lao drai ngöne la wiik, nge sine pala hi lao hawa e caa drai. Hnene la ketre sine huliwa hna lapa goeë nyidro e etid ngöne la nöjei drai. Ketre mekune ju hi nyidrë me drenge laka ketre trejine nyidrë ka thaa cainöje hmaca kö. Hna ketri nyidrë hnene la aqane catre cainöje ne la sör, celë hi matre, nyidrëti a wange ju la ketre qatre thupe matre hetre trenge catre i nyidrëti hmaca troa cainöj. Hetre thangane ka lolo la hna huliwa hnene la sör ngöne la mele ne la lue atr, qa ngöne la hnei eahlo hna aeatrëne la hna sa xepu o drai.
5 Maine kola tiqa la hni së hnene la madrine kowe la nöjei ewekë ka loi hnei Iehova hna kuca koi së, nge easë a aeatrëne la hne së hna sa xepu koi Akötresie, ke, atreine tro së a öhnyi madrine e nöjei drai. Tune la atre cinyihane la salamo, atreine fe tro së a hane qaja ka hape: “Joxu, Akötesingöti fe, tro ni a ole koi cilie hnene la hninge ka pexej; nge tro pala kö ni a atrune la atesiwa i cilie.”—Sal. 86:12.