Tusi Hmitrötr—Wesi Ula i Akötresie Nyine Eatrongëne La Nöjei Atr Asë
1 Hna e ngöne la fene enehila la foa miliare lao Tusi Hmitrötr; hna ujëne eje kowe la 2 100 nge hetre munëne lao qene hlapa ne la itre nöje ka tru me itre xaa qene hlapa ju kö hna ithahnatane hnene la itre nöje ka co, qa ngöne lai, ijije kowe la 90 koi 100 la itre atr e celë fene asë troa hane e ej. Ngo hetre jiine pala kö ngöne la fen, ene la “[troa drenge NW] la wesi ula i Iehova.” (Amosa 8:11) Nyimutre la itre atr trene Tusi Hmitrötr, ngo thaa hane kö angatre e me trotrohnine la aliene ej. Nemene la nyine tro së a kuca matre troa upi angatre troa hane xome la Tusi Hmitrötr, kösë ketre ewekë ka nyipi lolo catre nyine eatrongëne la mele i angatr?
2 Ame ngöne la treu diseba, easë a troa tro fë la itus La Bible—Parole de Dieu ou des hommes? Easë a hamëne ju fe la Tusi Hmitrötr, ene lo hna ujën, 34 hë lao macatre enehila—la Traduction du monde nouveau. Ijije hi troa amamane hnyawa la elolone ej, nge ngöne fe laka, thaa jole kö e troa e ej. (Wange ju la itus “Toute Écriture” götrane 320, paragarafe 6.) Tro hë së a amamane la madrine me ole së kowe la ahnahna hna hamëne hnei Iehova, ene la troa xatuane la itre xaa atr troa xome la Tusi Hmitrötr, ene la Wesi Ula i Akötresie nyine eatrongëne la nöjei atr asë.
3 Atreine hi tro epuni a nyiqaane la porotrike jëne la tarak hna hape “Pine Nemene Matre Kola Lapaune Kowe La Tusi Hmitrötr.” Qaja jë ka hape:
◼ “Maine nyipici laka, ijije kowe la 90 qa ngöne la ala 100 la itre atr ngöne la fen, troa kapa la Tusi Hmitrötr, ngo co hi angatr, angetre e ej. Nemene la kepine lai?” E jë la lue pane paragarafe ne la tarak, memine fe la 2 Timoteo 3:16. Hamëne ju la itus Parole de Dieu thenge la thupene hna athip. Maine thaa ajane kö la atr troa xome lai itus, haawe, sipo angeice ju pena troa e asë pe lai tarak, ene kö e ajane angeic. Amamane hnyawa ju la enyipiewekëne lai taane ka co ngöne la pun, hna hape, “Kola perofetane la itre drai elany.”
4 Ame ngöne la epuni a bëeke troa wange hmaca la itre atr ka kapa lo tarak, hna hape “Pine nemene matre kola lapaune kowe la Tusi Hmitrötr,” haawe, epuni a qaja jë ka hape:
◼ Thupene la hnei epuni hna ibozu, e jë la lue paragarafe ne la pune lai tarak. Hnyingëne jë kowe lai atr, maine ase jë fe hë angeice mekune laka, atreine hi troa hetrenyi la mele ka thaa ase palua kö ngöne la ihnadro. Thupene la hnei angeice hna sa, qaja jë ka hape: “Ewekë ka xecie hnyawa kowe la itretre anyipici Iehova, laka, troa eatre asë la itre ewekë hna perofetane hnine la Tusi Hmitrötr; tune mina fe la itre drai elanyi ka lolo thatraqane la nöjei atr asë ka trongëne la itre hna amekötine hnei Akötresie.” Amamane jë la iatr ngöne la götrane 13 ne la boroshüre Thele, nge fe jë la itus kowe la ini 5, nge wange ju matre troa ce ithahnatane la itre mekune ka sa la itre hnying, nge nyiqaane jë fe la etid.
5 Ngöne la itre teritoare hna mele ngöne hnene la itre atr ka hetre hmin, atreine hi troa tupathe la aqane nyiqaane ithahnata celë hna hape:
◼ “Hna xatua së troa metrötrëne catrëne la Tusi Hmitrötr. Nyimutre la itre fami ka trene Tusi Hmitrötr, ngo xalaithe hi la angatre a hane fe ej; angatre a xome hmekuje eje ngöne la kola traqa koi angatre la itre hnepe jole ka tru. Hapeu, thaa celë kö la ewekë lai hnei epuni hna hane öhn? [Nue pi troa sa.] Maine jë angatre a mekune ka hape, ketre itusi ka hnapane catre la Tusi Hmitrötr. Kola hamëne koi së hnene la itusi celë, La Bible—Parole de Dieu ou des hommes?, la mejiune ngöne la enyipicine laka, kola jele nyipicine hnene la science la itre hna qaja hnei Tusi Hmitrötr; ketre, kola hamëne hnene la Wesi Ula i Akötresie la itre nyin ka lolo thatraqane la itre jole ka tru ka traqa koi së ngöne la hnedrai enehila.” Amamane hnyawa jë la itre xaa hnepe mekune qa ngöne la mekene 8 maine mekene 12 ne la itus, nge hamëne pi kowe lai atr.
6 Ame ngöne la kola wange trongëne hmaca lo itre atr ka kapa la itus “Parole de Dieu”, qaja jë ka hape:
◼ “Ame lo traqa hnapane ni, ke, hnei nyiso hna ithahnatane la aqane tro Tusi Hmitrötre a xatua së troa cile kowe la itre jole ka tru enehila. Hetre thangane ka loi hna kapa hnene la itre atr ka xome la Tusi Hmitrötre ceitune me Wesi Ula i Akötresie, laka, hna xatua angatre troa hetrenyi la madrin, me kapa la itre manathithi ngöne la mele i angatr. Eni a pi ajane troa amamane koi epuni la caa trepene meköti ka lolo, hna qeje pengöne hnyawa hnine la itusi hnenge hna hamë epun.” Ithahnatane jë la caasi qa ngöne la itre trepene meköti hna hamëne ngöne la mekene 12, paragarafe 3-6, nge nyipune ju me e la paragarafe 7. Maine ajane hi lai atr troa etid, ce wange ju me angeice la itus Connaissance maine pena lo boroshüre Thele.
7 Atreine hi tro la itre qatre trahmanyi me föe a kapa la aqane nyiqaane ithahnata celë:
◼ “Hetrenyi la itre ijine ekö kola e la Tusi Hmitrötre ngöne la itre hnalapa, nge kola trongëne hnyawa hnene la itre fami la itre trepene meköti hna qatrenge hnene ej. Tuneka fe la fami i epun? [Nue pi troa sa.] Ame enehila, kola mama laka, pë hë traeme ne la itre atr ka ala nyim, troa e la Tusi Hmitrötr, maine pena, angatre a mekune laka, thaa thatraqane hmaca fe kö la hnedrai së la itre trepene meköti göi aqane troa mel. Kola amamane hnene la mekene 13 ne la itus La Bible—La Parole de Dieu ou des hommes?, la elolone la aqane saze la mele ne la köni atr, thupene la hnei angatre hna inine la Tusi Hmitrötr. Maine epuni a ajane troa atre la aqane xatua angatre hnene la mene ne la Wesi Ula i Akötresie, haawe, eni a madrine troa hamë epuni pe la itusi celë.”
8 Ame ngöne la epuni a iwai hmaca, qaja ju ka hape:
◼ “Ame ngöne lo nyiso a porotrike e cili lo, nyiso a kapa la mekune laka, pëkö caa xou ne la itre atr ne la hneijine së troa sasaithe la itre trepene meköti qa hnine la Tusi Hmitrötr, göi aqane mel. Hapeu, hna hane ketri së fe hnene la aqane ujë cili? [Nue pi troa sa.] Hnei Iesu hna amamane hnyawa la enyipi ewekëne la troa xome la atrehmekune ne la Tusi Hmitrötr.” E jë la Ioane 17:3. Thupene lai, wange ju la paragarafe 5 ne la mekene 1 ne la itus Connaissance. Qeje pengöne jë la aqane troa tro xome la etid, nge thupene lai amamane jë koi angeic.
9 Sipo Iehova jë së jëne la thith, matre tro Nyidrë a amanathithine la aqane thele së tro la itre xaa atr a hane ujë me lapaune kowe la Tusi Hmitrötr—Wesi Ula i Akötresie, ka troa eatrongëne la nöjei atr asë.