Loi e Troa Anyipicin Jëne La Thiina Ka Loi
1 Ame ngöne la hneijine së enehila, tru catre la itre atr ka mele menu; nyimutre la itre thöthi ka angazone la mele i angatr, qa ngöne la hna ufi dorog, me kuci ngazo, me icilekeu, me iakötrë. Ngo hetrenyi fe la itre thöthi e hnine la ekalesia i keresiano, angatre a amamai tulu ka loi hnene la thiina i angatr; celë hi ketre ewekë ka lolo troa goeën, nge ka troa sheminge koi Iehova. Hetre emenene la thiina cili ngöne la hna cainöj, nge atreine hi troa hane upe la itre xaa atr troa hane kapa la nyipici.—1 Pet. 2:12.
2 Nyimutre la itre ewekë hna melëne hë, ka amamane hnyawa laka, hna qaja aloine la thiina ka loi ka eje thene la itre keresiano thöth, hnene la itre atr ka goeë angatr. Hna qaja hnene la ketre meteres kowe la itre nekönatre asë ne la klasi nyidro, göne la ketre thöth Temoë hnei nyidroti hna inin, ka hape, ame la haze ne la jajinyi celë, ene Iehova, ke, celë hi la nyipi haze. Nyidroti a qaja tune lai, pine laka, hetre hni ne metrötre pala hi thene la jajiny. Hna cinyihane hnene la ketre ka ini koi sasaiatri, ka hape: “Eni a ajane troa olene koi epuni la elolone la itre thöthi ngöne la hmi i epun . . . Itre tulu ka lolo la itre thöthi epun. Angatre a metrötrëne la itre qatre me qatre föe, menyike la thiina i angatr, nge lolo la aqane heetre i angatr. Nge ka atre hnyawa angatre la Tusi Hmitrötr! Celë hi pengöne la nyipi hmi lai!”
3 Hna haine hnene la ketre meteres ngöne la klasi eahlo, la thiina ka lolo thene la ketre Temoë ka sevene lao macatre. Eahlo a madrine la aqane menyikene me aqane lolone la thiina ne la nekönatre trahmany; isa pengöne catre nyëne memine la itre xaa nekönatre trahmany. Eahlo a haine la aqane metrötrëne nyëne la itre ini ne la hmi i nyën, nge thaa hmahma kö nyëne troa ketre pengöne pe kö pine la itre ini hnei nyëne hna lapaune kow. Eahlo a öhne laka, hna inine la mekuthetheue i nyën, matre atreine hë nyëne “troa wangate hmekune la loi me ngazo.” (Heb. 5:14) Ame hë thupen, hna tro troa wange la ka ini hnene la thine ne lai nekönatre trahmany, me nyiqaane etidi me eahlo. Ene pe hane jë fe eahlo xome la bapataiso, nge thupene lai, kola hane pionie lapa!
4 Ame ngöne la ketre hna ini, hna ketr la hni ne la ketre nekö trahmanyi hnene la eloine la aqane ujëne la ketre Temoë. Isa pengöne catre angeic, ngöne laka, lolo la thiina, ka ajane troa ini, nge ka lolo pala hi la aqane heetre i angeic; ketre, thaa ceitui angeice kö memine la itre xaa jajiny, thaa ka hane fe kö angeice pi ihanyi memine la itre nekö trahmany. Kola öhne hnene lai nekö trahmanyi laka, angeice a melëne la itre trepene meköti ne la Tusi Hmitrötr. Ame hna hnyingë angeice hnene la nekö trahmany, la aliene la itre ini ne la hmi i angeic, nge kola haine la itre ewekë hna qaja hnene la jajiny. Ene pe nyiqaane jë hi etid hnene la nekö trahmany, nge thaa hmitre ju kö nge angeice fe hë a hane xome la bapataiso, me hane pionie, me hane huliwa e hnine la Bethela.
5 Maine epuni la ketre keresiano thöthi ka ajane troa amamai thiina ka loi kowe la itre xan, thupëne hnyawa kö epuni la aqane ujë i epun, ngöne la nöjei götran. The nanazije kö me xöle kapa la itre aqane ujë ka ngazo ne la fen, memine la itre aqane mekun, me itre aqane mele ne ej. Inine jë troa amamai tulu ka loi ngöne la aqane troa ithahnata, me aqane troa heetr, me aqane troa ele ihe, a thaa ngöne hmekuje kö la hna cainöje trootro, me ngöne la itre icasikeu ne la ekalesia, ngo ngöne mina fe la hna ini, me ngöne la itre hna kuci madrin. (1 Tim. 4:12) Tro ha hetre nyipi kepine tro epuni a madrin, ngöne la epuni a öhne la ketre atr a pi ajane troa atre la nyipici, thangane hi la hnei epuni hna ‘ahudrumene la lai i epun’ jëne la thiina i epuni ka lolo.—Mat. 5:16.