Troa Xome La Ita Ne Thup Celë e 31 Mei Me Wiike Cili Nyima 89 Me 41
Itre Thöthi Fe—acatrene Jë La Aja i Epuni Troa Nyihlue i Iehova
“Nge mekuneju la ate xupi ’ö ngöne la ite drai e thupëtesiji ’ö.”—ATE CAI. 12:1.
1. Nemene mina fe la ihë hnene la itre nekönatr ne Isaraela hna troa hane xemin?
TRAQA ha koi 3 500 lao macatre enehila, thupene lo Mose, perofeta i Iehova a amekötine kowe la itretre huuj memine la itre qatr ne la nöje i Isaraela, ka hape: “Troa icasinekeune la nöj, ite trahmanyi me fö, me nekönat . . . , mate deng, me inin, me qoue Iehova Akötesi nyipunie, me aköte hnine troa kuca la nöjei tenge ewekë asë ne la wathebo celë.” (Deu. 31:12) Pane mekune jë së la pengöne la itre atr hna inine ngöne la itre icasikeu thatraqane la hmi koi Akötresie: kola e la itre trahmanyi me itre föe, me itre nekönatr. Eje hi, hna e mina fe la itre nekönatr thene la itre atr hna hën troa dreng me inin me trongëne la itre hna amekötine hnei Iehova.
2. Hnei Iehova hna amamane tune kaa la aqane wanga atrune Nyidrë la itre thöthi ne lo pane ekalesia ne Keresiano ekö?
2 Ame ngöne lo hneijine i Iesu, hnei Iehova mina fe hna amamane la aqane wanga atrune Nyidrë la itre thöth ka hmi koi Nyidrë. Pane mekune hmaca jë së la itre itusi hnei Nyidrëti hna upi Paulo aposetolo troa cinyihane kowe la itre ekalesia ekö, hetrenyi fe ngöne itre eje la itre hna amekötin thatraqane la itre thöth. (E jë la Efeso 6:1; Kolose 3:20.) Ame la itre thöthi Keresiano ekö ka trongëne hnyawa la itre eamo cili, tre, kola kökötre la hni ne ole i angatr kowe la Tretretro e koho hnengödrai nge itre manathithi la hnei angatre hna kapa qaathei Iehova.
3. Kola amamane tune kaa hnene la itre thöthi enehila la aja ka eje thei angatr troa nyihlue i Akötresie?
3 Hapeue la itre thöthi enehila, hna hane kö upi angatr troa icasikeu matre troa hmi koi Iehova? Eje hi! Nge ketre madrine ka tru kowe la itre atre ne la nöje i Akötresie troa goeëne la itre thöth ka nyihlue i Iehova e cailo fen, itre ka wanga atrune la eamo celë hna hamëne hnei Paulo, ka hape: “Tro sha imekunekeune mate troa aciane la ihnimi me ite huliwa ka loi; tha tro kö a tije la icasikeu shë tune la thina i ite xan; ngo loi pe troa [“ithuecatrekeu,” MN] nge nue catëne jë e tro nyipunie a goeëne la drai a eashenyi hë.” (Heb. 10:24, 25) Ketre, ala nyimu la itre nekönatr ka ce tro memine la itre keme me thine i nyudren matre troa hane cainöjëne la maca ka loi ne la Baselaia i Akötresie. (Mat. 24:14) Nge traqa ha enehila koi itre thauzan la itre thöthi ka xome la bapataiso ngöne la nöjei macatre, me hane kapa la itre manathithi ka tru qa ngöne la hna iëne troa ketre atre drei Keriso.—Mat. 16:24; Mar. 10:29, 30.
Kapa Ju La Ihë—Enehila
4. Eue la tro la itre thöthi a kapa la ihë i Akötresie troa nyihlue i Nyidrë?
4 Kola qaja ngöne Ate Cainöj 12:1, ka hape: “Mekuneju la ate xupi ’ö ngöne la ite drai e thupëtesiji ’ö.” Troa traqa koi ije macatre matre ijije jë fe koi epun, itre thöth, troa hane kapa la ihë celë ka iakeukawany, ene la ihë ne troa hmi me nyihlue i Iehova? Thaa hna qaja kö hnene la Itre Hna Cinyihan. Ngo thaa tro pi kö epuni a mekune, ka hape, nekönatre pala kö epun, nge thaa ijiji epuni pala kö troa drei Iehova me nyihlue i Nyidrë. Thaa macatre i epuni kö la ka nyipi ewekë, ngo ene pe la troa hane canga kapa la ihë cili.
5. Tro la itre keme me thine a xatuane tune kaa la itre nekö i angatr troa kökötre ngöne la götrane la ua?
5 Ala nyimu epun, itre hna xatuane hnene la ala caas, kem maine thin, maine hnei nyidroti asë pena, matre tro epuni a kökötre ngöne la götrane la ua. Ceitui epuni me Timoteo, ketre thöth ekö hna qaja hnei Tusi Hmitrötr. Ame ngöne lo nekönatr petre kö angeic, hna ini angeic la Tusi Hmitrötr hnei Eunuke thine i angeic, me Lois qaaqa i angeic. (2 Tim. 3:14, 15) Ma casi jë fe hi la aqane ini epuni hnene la itre keme me thine i epun memine la aqane ini Timoteo hnei thine me qaaqa hmunë; angatr a ini epuni la Tusi Hmitrötr, me ce thithi me epun, me ce tro me epun kowe la hna icasikeu ne la ekalesia me itre asabele ka tru, me ce cainöje me epuni fe. Nyipici laka, ame la troa ini epuni la itre jë i Akötresie, tre, celë hi ketre hnëqa ka sisitria catr hna hamëne hnei Iehova kowe la keme me thine i epun. Hapeu, hetre hni ne ole i epuni kö kowe la aqane hnimi epun me aqane hnehengazo epuni hnei angatr?—Ite edomë 23:22.
6. (a) Thenge la Salamo 110:3, nemene la pengöne hmi ka amadrinë Iehova? (b) Nemene la hne së hna troa ce wange enehila?
6 Ngo ame hë la epuni a tru trootro, Iehova a ajane tro epuni a sipu “ate la aja i Akötesie ka loi, me nyine amadin, me ka meköt,” tune la aqane ujë i Timoteo. (Rom. 12:2) Maine tro epuni a ujë tune lai, tro hë epuni a kuca la itre huliwa ne la ekalesia, hnene laka hna upi epuni hnene la sipu aja i epuni troa kuca la aja i Akötresie, ngo thaa hnene kö laka aja ne la keme me thine i epun. Maine eje thei epun la aja ka catr troa nyihlue i Iehova, tro hë lai a amadrinë Nyidrë. (Sal. 110:3) Ngo tro epuni a amamane tune kaa laka, epuni a thele troa acatrene la aja i epuni troa drei Iehova me trongëne la itre hna amekötine hnei Nyidrë? Tro sa pane ce wange la köni götran ka nyipi ewekë nyine tro epuni a xom matre troa amamane la aja i epuni troa drengethenge Iehova. Kola qaja la ini tus me thith, me aqane ujë. Tro sa isa waipengöne itre ej.
Loi e Troa Atre Iehova Ceitu Me Ketre Atr
7. Hnei Iesu hna hamëne tune kaa la tulu, göne la aqane troa isa inine la Itre Hna Cinyihan, nge nemene la ka xatua nyidrë troa ujë tune lai?
7 Ame la pane aqane tro epuni a amamane la nyipi aja i epun troa nyihlue i Iehova, tre, ene la troa e la Tusi Hmitrötr ngöne la nöjei drai. Ijije tro epuni a eatrëne la aja i epun ngöne la götrane la ua, me kapa la nyipi atrehmekune qa hnine la Tusi Hmitrötr, hnene la hna e lapaane la Wesi Ula i Akötresie. (Mat. 5:3) Hnei Iesu hna hamëne la tulu. Ame lo kola traqa koi truelof lao macatre i Iesu, hnene la keme me thine i nyidrë hna öhnyi nyidrë hnine la ēnē, “kola munëti ngöne nyipine la nöjei ate ini, kola dei angate me hnyingë angat.” (Luka 2:44-46) Nekönatre petre kö Iesu, nge nyidrëti fe hë a hane akökötrene e kuhu hni nyidrë la aja kowe la Itre Hna Cinyihan me trotrohnine hnyawa itre ej. Nemene la ka xatua nyidrë troa ujë tune lai? Thaa sihngödri kö koi së la esisitriane la huliwa i Maria me Iosefa, keme me thine i nyidrë ngöne la götrane cili. Pine laka lue ka nyihlue i Akötresieti nyidro, hnei nyidro hna ini Iesu qaane lo nyidrëti a co, troa atrepengöi Akötresie.—Mat. 1:18-20; Luka 2:41, 51.
8. (a) Eue la tro la itre keme me thine a nyiqaane inine la itre nekö i angatr troa hnine la Wesi Ula i Akötresie? (b) Qaja jë la ketre hna melën ka amamane la enyipiewekëne troa inine la itre nekönatr e co petre kö nyudren.
8 Ketre tune mina fe enehila, kola atrehmekune hnene la itre keme me thine ka xoue Iehova, laka, nyipi ewekë tro angatr a inine la itre nekö i angatr troa hnine la nyipici qa hnine la Tusi Hmitrötr, e co petre kö angatr. (Deu. 6:6-9) Celë hi ewekë hna kuca hnei Rubi ketre Keresiano föe, thupene la kola hnahon la pane nekö i eahlo trahmany, Josef la ëjen. Eahlo a e koi nyën o drai lo itus Trenge Edromë Qa Hnin La Tusi Hmitrötr. Ame la nyën a tru trootro, eahlo a xatua nyën troa hnehen la itre xötr ka nyimutre. Hapeu, hna kepe thangane kö hnei Iosefa la ini cili? Ame ju hi la nyën a atreine ithanata, nyën fe hë a ketre sipu qeje pengöne la itre edromë ka ej e hnine la Tusi Hmitrötr. Nge ame la kola faifi lao macatre i nyën, nyëne ha cile fë la pane hnëqa i nyën ngöne la ijine Ini Ne Cainöj Qaathei Akötresie.
9. Pine nemene matre nyipi ewekë troa e la Tusi Hmitrötr me sine thele ej?
9 Tro pala kö epun, itre nekönatr a kökötre ngöne la götrane la ua, e hnei epuni hna majemine e la Tusi Hmitrötr ngöne la nöjei drai uti fe hë la epuni a thöth, me thupëtresij. (Sal. 71:17) Pine nemene matre, maine tro epuni a catre e la Tusi Hmitrötr, haawe, tro hë epuni a kökötre ngöne la ua? Hanawange la hnei Iesu hna qaja ngöne la nyidrëti a thithi kowe la Tretretro i nyidrë, ka hape: “Nge dei lo la mele ka tha ase palua kö, laka tro angat’ a ate hmekua cilie la nyipi Akötesie.” (Ioane 17:3) Eje hi, maine tro epuni a catre troa atrepengö i Iehova, tro hë epuni a göeë Nyidrëti ceitu me ketre atr, nge tro ha kökötre hnyawa la ihnimi epuni koi Nyidrë. (Heb. 11:27) Qa ngöne lai, ame la nöjei ijine epuni a e la itre xaa xötr ne la Tusi Hmitrötr, thele jë troa akökötrene la atrehmekune i epun göi Iehova. Isa thele jë, ka hape: ‘Nemene la hna ini ni hnene la edromë celë göne la pengö i Iehova? Kola mama tune kaa jëne la xötre celë la ihnimi Akötresie memine la aqane hnehengazo ni hnei Nyidrë?’ Maine tro epuni a xomi ijin troa sine thele la itre hnyinge celë, haawe, tro hë epuni a atre la aqane waiewekë i Iehova, me itre aliene hni Nyidrë, memine fe la hnei Nyidrëti hna thele thei epun. (E jë la Ite Edomë 2:1-5.) Tui Timoteo lo angeic a nekönatr, tro fe epuni elanyi a “kapa” la itre ini hna hamë epun qa hnine la Itre Hna Cinyihan, nge tro lai a upi epuni troa hmi koi Iehova cememine la hni ka pexej.—2 Tim. 3:14.
Aqane Tro La Thithi a Akökötrene La Ihnimi Epuni Koi Iehova
10, 11. Tro la thithi a acatrene tune kaa la aja i epuni troa nyi hlue i Akötresie?
10 Ame la hnaaluene aqane tro epuni a acatrene la aja i epun troa nyihlue i Iehova cememine la hni ka pexej, tre, ene la troa thith. Kola qaja ngöne Salamo 65:2, ka hape: “Ate shamatine la thithi fe, tro nöjei ate asëjëihë a traqa koi cilie.” Ngacama Isaraela hi lo nöje hnei Akötresieti hna kapa ekö, ngo thaa hnei Nyidrëti kö hna sawa la itre trehnyiwa troa hane thithi koi Nyidrë hnine la ēnē i Nyidrë. (1 Ite jo. 8:41, 42) Thaa ka iwangatrehmekunyi atr kö Akötresie. Ka xecie hnyawa e kuhu hni ne la itre atr ka trongëne la itre wathebo i Nyidrë, laka, tro Nyidrëti a drei angatr. (Ite edomë 15:8) Nyipici, ame la kola hape, “nöjei ate asëjëihë,” tre, kolo mina fe a qeje epun, itre thöth.
11 Atre hnyawa hi epun, laka, tro ha catr la aqane imelekeu ne la lue enehmu, e lolo la aqane ifekeune nyidro la itre mekun. Eje hi laka, troa atraqatre la madrine i epun troa thawa la itre mekun me itre aja me itre aliene hni epun kowe la sipu enehmu i epun. Ketre tune mina fe, ame la epuni a thithi cememine la hni ka pexej, tre, epuni hi a ithanata memine la Atre Xupi epun. (Fil. 4:6, 7) Loi e tro epuni a ithanata koi Iehova ceitune memine la epuni a fe la itre hni epuni kowe la keme maine thine ka ihnim, maine pena kowe la sipu enehmu i epun. Eje hi laka, lue ewekë ka ce tro, la aqane thithi epuni memine la aqane hnimi Iehova hnei epun. Tro hë epuni a öhne laka, troa lolo catre la itre thithi epun, e ka kökötre lolo la aqane imelekeu i epuni me Iehova.
12. (a) Pine nemen matre thaa trenge ewekëne kö la ka nyipi ewekë ngöne la itre thithi ka jui? (b) Nemene la ka troa xatua epun troa atrehmekun, laka, easenyi Iehova koi epun?
12 Ngo loi e troa lapa mekun, laka, ame la thithi ka jui, tre, thaa trenge ewekëne kö la ka nyipi ewekë. Nyipi ewekë troa mama la aliene hni epun. Loi e troa mama ngöne la itre thithi epuni la hni ka ihnim me metrötr, memine la aqane mejiune i epuni koi Iehova. Maine tro epuni a atrehmekune la aqane sa la itre thithi epun hnei Iehova, haawe, tro hë epuni a öhne hnyawa laka, “eashenyi Iehova koi angat’ asë angete hë nyidë.” (Sal. 145:18) Nyipici, tro Iehova a easenyi koi epun, me acatrene la lapaune i epun matre atreine troa cile catre koi Diabolo, me xatua epuni troa inamacane ngöne la aqane tro epuni a axecië mekun ngöne la mele i epun.—E jë la Iakobo 4:7, 8.
13. (a) Hna xatuane tune kaa la ketre trejine föe hnene la aqane imelekeu i angeic me Akötresie? (b) Tro la aqane imelekeu i epun me Akötresie a xatua epuni tune kaa troa cile kowe la itre itupath?
13 Tro sa pane ce wange la aqane acatrene la lapaune i Ceie hnene la elolone la aqane imelekeu i angeice me Iehova. Ame ngöne la hna ini ka tru, nyimutre la itre thangane ka lolo hnei angeice hna kapa qa ngöne laka, lolo la itre hatre i angeic ngöne la itre elo. Ame la angeic a fenesi qa hna ini, hna hamë angeic la ketre bourse ka troa aijijë angeic troa sisedrëne la itre ini ka tru. Öni Ceie, ka hape: “Ketre itupathi koi ni la bourse cili; ketre, kola upe iele ni hnene la itre hene ne elo memine la itre sine ce ini me ini troa kapa lai bourse.” Ngo hnei angeice hna atrehmekune laka, maine tro angeic a sisedrëne la itre ini ka tru, tro ha tru la traeme hnei angeic hna troa xome thatraqane la ini me itre elo, nge xalaithe pë hë göi troa nyihlue i Iehova. Nemene la hna kuca hnei Ceie? Öni angeic, ka hape: “Thupene la hnenge hna thithi koi Iehova, hnenge hna thipëne la bourse me qaane troa xome la huliwa ne pionie lapaa.” Traqa ha enehila koi faifi lao macatre ne xome angeic la huliwa cili. Öni angeic, ka hape: “Thaa ijigöi fë kö ni la mekune hnenge hna axeciën. Atraqatr la madrineng, ngöne la eni a atrehmekune laka, hnenge hna xome la mekun ka amadrinë Iehova. Nyipici laka maine tro epuni a amë panëne la Baselaia i Akötresie ngöne la mele i epun, tro ha hamëne koi epun la itre xaa ewekë asëjëihë.”—Mat. 6:33.
Kola Mama Jëne La Aqane Ujë Ka Lolo i Epun Laka, “Ka Pë Ethan La Hni” Epun
14. Pine nemen matre ka nyipi ewekë catre koi Iehova troa lolo pala hi la aqane ujë i epun?
14 Ame la aqane ujë i epun, tre, celë hi hnaakönine aqane tro epuni a amamane la aja i epun troa nyihlue i Iehova cememine la hni ka pexej. Iehova a amanathithine la itre thöthi ka thele troa pë ethane pala hi la mele i angatr. (E jë la Salamo 24:3-5.) Ame lo thöthi petre kö Samuela, hnei angeic hna thipëne troa xome la aqane ujë ka ngazo ne lo lue nekö i Eli, ene lo Atre Huuj Ka Sisitria. Thatreine kö troa sihngödri la aqane ujë ka lolo i Samuela. Kola qaja hnei Tusi Hmitrötr, ka hape: “Nge tru trotro la nekönate Samuela, nge hna hnimi angeice hnei Iehova memine fe la nöjei at.”—1 Sam. 2:26.
15. Nemene la itre xaa kepin ka upi epuni troa xome pala hi la ketre aqane ujë ka lolo?
15 Easa mele ngöne la ketre fen hna lapane hnene la itre atr ka hnimi angatre kö, me ka pi tru me thaa drei keme me thin, me pë hni ne ole me pë metrötr, itretre catre mek me pi draië nge itretre ajane la itre nyine iamadrinë ngo thaa aja Akötresieti kö; celë hi lai itre thiina hna e wengëne hnei Paulo. (2 Tim. 3:1-5) Qa ngöne lai, nyipi jole ka tru koi epuni troa xome la ketre aqane ujë ka lolo, pine laka kola elë menu la ngazo. Ngo maine tro pala hi epuni a kuca la ewekë ka meköt me neëne troa xome la ketre aqane ujë ka thaa loi kö xajawa i Akötresie, epuni hi lai a sajuëne la musi cile i Iehova e koho hnengödrai me e celë fen. (Iobu 2:3, 4) Ketre, tro ha eje thei epuni la madrin troa atre, laka, epuni a ujë thenge la aja i Iehova, thenge lo hna upi epuni, ka hape: “Neköng, inamacanepi, mate madinejë la hning; mate hete nyine sa koi angeic’ ate qaja angazo ni.” (Ite edomë 27:11) Ketre, tro ha acatrene la aja i epun troa nyihlue i Nyidrë hnene la hna atre, laka, Iehova a kepe epun.
16. Hnene la ketre trejine föe hna amadrinëne tune kaa la hni Iehova?
16 Hanawange la tulu ne la ketre thöth, Karol la ëjen, ketre Keresiano jajiny ka fedre catr kowe la itre trepene meköti ne la Tusi Hmitrötr ngöne lo ijine angeice petre kö a ini; mama catre koi nöjei atr la elolone la aqane ujë i angeic. Nemene la ewekë ka traqa? Hnene la itre sine ce ini me Karol hna hnyima sai angeic pine laka kola sewe angeic hnene la mekuthethewe i angeic troa atrune la itre feet ka hlemu memine lo itre feet ka atrune la nöj. Angeic a xome la itre ijine cili, matre troa qeje pengöne la itre ini hnei angeic hna mejiune kow. Thupene la itre macatre, hnei Karol hna kapa la ketre tus qaathene la ketre sine ce ini me angeic, kola hape: “Hnenge pala hi hna thele troa iöhnyi me eö me amamane koi eö la hni ne oleng. Tha sihngödri kö koi huni la elolone la aqane ujë i eö memine la tulu ka lolo hnei eö hna hamën, memine fe la aqane catre fë eö mekuna i eö göne la itre feet ka hlemu. Ketre, eö hi lo pane Atre Anyipicine i Iehova hnenge hna atre.” Pine laka lolo catre la tulu i Karol, ene pe hnene la sine ce ini me angeic hna nyiqaane inine la Tusi Hmitrötr e thupen. Hnei angeic hna cinyanyine ngöne la tusi angeic koi Karol, ka hape, traqa ha koi footre lao macatre thupene la hnei angeic hna hane xome la bapataiso! Haawe, epi tro fe epuni asë itre thöth, a hane catre tui Karol, ene la troa fedre kowe la itre trepene meköti ne la Tusi Hmitrötr, matre troa hane upe la itre atr ka hni ka menyik troa atrepengöi Iehova.
Kola Atrunyi Iehova Hnene La Itre Thöth
17, 18. (a) Nemene la aqane goeëne epuni la itre thöthi ngöne la ekalesia i epun? (b) Nemene la itre manathithi hna troa kapa hnene la itre thöthi ka xoue Akötresie?
17 Ala nyimu the së ngöne la organizasio i Iehova e cailo fen ka haine la aqane catre ne la itre thauzan lao thöth ka sajuëne la nyipi hmi! Ame la itre thöthi cili, tre, angatr a akökötrene la aja ka eje thei angatr troa nyihlue i Iehova hnene la hna e lapaane la Tusi Hmitrötr, me catre thith me ujë thenge la aja i Akötresie. Jëne lai tulu ne la itre thöth, kola akeukawane la hni ne la itre keme me thine i angatr, memine fe la nöjei atrene la lapa i Iehova.—Ite edomë 23:24, 25.
18 Ame ngöne la itre drai elany, tro ha hane e la itre thöth ka mele nyipici thene la itre atr ka troa mele pe ngöne la fene ka hnyipixe hna thingehnaeane hnei Akötresie. (Hna ama. 7:9, 14) Ame e cili, tro hë angatr a kapa la itre manathithi ka nyimutre, nge tro pala kö a kökötre la hni ne ole i angatre koi Iehova, me upi angatre troa atrunyi Nyidrë uti hë epine palua.—Sal. 148:12, 13.
Ijiji Nyipunieti Kö Troa Qeje Pengön?
• Nemene la aqane tro la itre thöth a sajuëne la nyipi hmi enehila?
• Maine epuni a ajane troa kepe thangane qa ngöne la hna e la Tusi Hmitrötr, pine nemen matre nyipi ewekë tro epuni a sine thele ej?
• Tro la thithi a xatua epuni tune kaa troa easenyi catre koi Iehova?
• Nemene la thangane la aqane ujë ka loi ne la ketre Keresiano?