Itre Thöth—Loi e Troa Hetre Thangane Ka Loi Qa Ngöne La Itre Ini i Epun
1 Nemene la mekuna i epuni göi ini? Epuni kö a hane thele troa kepe thangane la itre ixatua hna hamëne hnene la itre ini, thatraqane la mele i epuni elany? Hapeu, epuni kö a hane thele troa qaja la nyipici kowe la itre hnainin, me itre ka ini ngöne la uma ne ini? Eahuni a mejiune laka, hetre ajane thei epuni troa kuca la hnei epuni hna atrein, ngöne la hna ini.
2 Loi e Troa Ini Hnyawa: Maine hnei epuni pala hi hna hnëkë hnyawa göi ini, me drenge hnyawa la hna qaja hnene la itre ka ini, haawe, tro ha hetrenyi la itre thangane ka loi nge ka cile huti thatraqane la mele i epun. Loi e tro pala hi epuni a kuca hnyawa la qa hna hamëne koi epun, ngo the tro pi kö a nue la itre qa cili troa sewe epuni troa kuca la itre huliwa hnei Akötresieti hna amekötine koi së.—Fil. 1:10.
3 Nyipi ewekë troa e la boroshüre Les Témoins de Jéhovah et l’instruction, ngöne la kola xejë la macatre me lö hnei uma ne ini. Loi e troa hamëne hnei epuni maine itre keme me thine i epun, la isa caa boroshüre kowe la itre ka ini epun. Loi e tro angatre a atre laka, atreine hi troa sa la nöjei pengöne hnyinge i angatr. Ketre, boroshüre lai ka troa xatua angatre troa trotrohnine la itre trepene meköti epun, me itre ini ka sisitria hnei epuni hna hni kow; haawe, tro hë angatre a metrötrë epuni ngöne la epuni a trongëne la itre ini hnei epuni hna lapaune kow. Troa xecie mina fe kowe la itre ka ini ka hape, ame la aja i epuni me itre keme me thine i epuni, ke, ene la troa ce huliwa me angatr, matre troa hetre thangane ka loi la hnei epuni hna ini.
4 Loi e Troa Cainöj: Hapeue matre xome la uma ne ini, nyine hnë tro epuni a cainöje ngöne la nöjei ijin? Troa ketre hnë cainöje lai, ka sisitria koi epun. Hetrenyi thei epuni la ketre atrehmekune ka lolo ngöne la götrane la ua; jëne la atrehmekune cili, atreine hi tro epuni a “amele epuni kö, me angate fe hna dei epun.” (1 Tim. 4:16) Maine tro epuni a amamai tulu ka loi ngöne la aqane ujë ne Keresiano, me thele la itre ijine troa cainöj, haawe, tro hë epuni a kapa la itre manathith, epuni memine la itre atr hnei epuni hna ithahnata kow.
5 Hnene la ketre trejine thöthi hna thele la ketre ijine ka ijij, troa cainöje kowe la itre sine ini angeic. Ame thene lai itre ka kapa la cainöje i angeic, ke, hetrenyi la ketre katolik, me ketre nekö trahmanyi ka thaa lapaune kö koi Akötresie nge ka hnyima fë pala hi lo itre ka hmi. Hetrenyi fe la ketre thöthi ka ufi sixa catr, nge ame ketre, ka iji menu la kahaitr. Haawe, hetre 15 lao thöthi hnene lai nekö trahmanyi hna xatuane troa hane nue la mele i angatre troa nyihluei Iehova, me xome la bapataiso!
6 Haawe, itre thöth, catre pi epuni troa ini hnyawa, me huliwane la teritoare ka sisitria koi epuni troa cainöje ngön. Nge eje hi laka, tro hë epuni a madrine troa kapa la ketre manathithi ka tru, qa ngöne la hna ini.