Cilëgöline Jë La Lapaune Epuni Ngöne La Hna Ini
1. Nemene la ewekë ka tha hmaloi kö, nge pine nemen?
1 Tha ka hmaloi kö troa cilëgöline la lapaune epuni ngöne la hna ini. Maine jë tro sa cile hnö qa ngöne laka ka nango lapa pe hi epun, nge epuni a xou wanga troa ahmahmanyi epun. Ngo nemene la ka troa xatua epun?
2. Nemene la nyine troa pane mekune hnyawa, qëmekene troa cilëgöline la lapaune i epun?
2 Pane Mekune Hnyawa Jë: Loi e troa pane mekune hnyawa matre troa atre la ijine troa ithanata. (Ate cai. 3:1, 7) Maine jë tro epuni a cilëgöline la lapaune i epuni ngöne la kola pane ce ithanatane la ketre tane mekune ngöne la ijine ini. Maine pena ngöne la kola hnyingë epuni hnene la ketre sine ini epun, la kepine matre epuni a kuca maine tha kuca pena la ketre ewekë. Ame la kola xejë la ini ngöne la macatre, hetrenyi la itre xaa thöthi ka qaja amamane hnyawa me thuemacane la itretre hamë ini, laka, Itretre Anyipicine i Iehova angatr. Ame pena itre xan, angatre a qaja amamane hnyawa la hmi angatr, ngöne la kola tupathe la lapaune i angatr.
3. Tro epuni a hnëkë tune ka matre troa cilëgöline la lapaune i epun?
3 Hnëkë Hnyawa Jë: Maine tro epuni a hnëkë hnyawa, hawe, tha tro ha jole tro epuni a ithanata. (1 Pet. 3:15) Qa ngöne lai, canga mekune jë la itre pengöne hnyinge ne la itre atr, nge thele jë la aqane troa sa. (Ite edomë 15:28) E ijije hi, xome jë la Tusi Hmitrötre memine la itre xa itusi epun, tune la itre boroshure celë hna hape, La vie a-t-elle été créée ? maine Cinq questions à se poser sur l’origine de la vie, celë hi matre troa xatua epuni troa sa la itre hnyinge cili. Sipone jë kowe la itre keme me thine i epuni troa elone la aqane troa cile kowe la itre jole cili, ngöne lo hmi ne la hnepe lapa i epun.
4. Pine nemene matre nyipi ewekë troa goeëne aloine la itre ewekë?
4 Loi e Troa Goeëne Aloine La Itre Ewekë: Tha tro pi kö epuni a mekune ka hape, maine tro pala hi epuni a qeje Tusi Hmitrötr, tro ha hnyimasai epuni hnene la itre sine ini epun. Hetrenyi kö la itre xane ka troa haine la aqane cile catre i epun, ene pe tro hë angatre a hane drei epun. Ngo tha tro pi kö epuni a hace, e pëkö ka drei epun. Atraqatre la madrine i Iehova, pine laka hnei epuni hna thele troa cilëgöline la lapaune i epun. (Heb. 13:15, 16) Catre jë sipone koi Nyidrëti la trengecatre ka ijij, matre atreine epuni troa qaja amamane la lapaune i epun. (Ite hu. 4:29; 2 Tim. 1:7, 8) Pane mekune jë elanyi la madrine ka troa eje thei epun, e traqa ju drei epuni hnene la ketre atr, me hane axeciëne troa nyihlue i Iehova!