Hapeu, Ka Hnëkë Kö La Itre Nekö i Nyipunie?
1. Pine nemene matre nyipi ewekë troa hnëkë hnyawa hnene la itre thöthi ka ini?
1 Pë ju pë hë nekönatr ka tha hane cile kowe la itre itupath me itre iajojezi ngöne la hna ini. Ngo ame pe, ijije mina fe koi nyudren troa hane xome la itre ijine ka sisitria troa “anyipicine la nyipici.” (Ioane 18:37) Hapeu, ka hnëkë hnyawa kö nyudren?
2. Maine kola troa hnëkë hnyawa la itre neköi nyipunie, nemene la nyine troa atreine kuca hnei nyudren?
2 Hapeu, trotrohnine hnyawa kö la itre nekö i nyipunie, la aliene hna hape troa hane sine la itre huliwa ne la nöj, maine pena la itre feete ne la itre wanaithihlë, nge pine nemene matre itre huliwa lai ka ngazo? Hapeu, ka hnëkë hnyawa kö nyudren troa cile kowe la itre iajojezi, tune la kola catre iaö nyudren troa sisedrëne la itre ini ka tru, me thele sine ce elo me iji menu la kahaitr maine xomi doroge pena? Maine jë tro nyudreni a qaja ka hape, ka isazikeu kö la ketre huliwa memine la hmi nyudren, ngo tune kaa, atreine kö nyudreni troa qejepengöne la itre ini hnei nyudren hna mejiune kow?—1 Pet. 3:15.
3. Tune kaa la aqane tro la itre keme me thine a xome la heji ne la Hmi Ne La Hnepe Lapa, matre troa hnëkëne la itre nekö i angatr?
3 Xome Jë La Heji Ne La Hmi Ne La Hnepe Lapa: Maine jë ame ngöne la macatre, hnei nyipunieti hna majemine troa ithanatane la itre jole hna melëne hnene la itre nekö i nyipunie. Maine tro nyipunieti a catre troa ithanatane la itre jol hnei nyudren hna melëne ngöne la hna ini, eje hi lai laka, tro ha hetre trenge catre i nyudren troa cile kowe itre ej. Tune kaa matre ce wange pena nyipunie me nyudren la itre mekune cili ngöne lo kola eköthe la itre xa heji ne la Hmi Ne La Hnepe Lapa? Pane hnyingëne jë kowe la itre nekö i nyipunie la itre ewekë hnei nyudren hna hnehengazon ngöne la nyudreni a tro troa ini. Maine jë, ijije fe tro nyipunieti a ce wange lo itre mekun hna ce ithanatane hë ngöne lo itre macatre ka ase hë, pine laka, ame enehila tru hë nyudren nge trotrohnine hnyawa ha nyudren la itre ewekë. (Sal. 119:95) Ijije fe hi tro nyipunieti a xome la itre xa ijin, matre troa elone la hnëqa ne la ketre atre hamë ini, maine ketre atre hamë eamo, maine ketre sine ce ini pena. Inine jë kowe la itre nekö i nyipunie la aqane troa xome la Tusi Hmitrötr matre troa sa la ketre hnying, maine pena troa xome la itre jia ne huliwa, tune la itre itusi celë, Comment raisonner, me Les jeunes s’interrogent. Loi e tro mina fe la keme maine thine a xomi ijine troa hnëkëne la itre nekö i nyidro troa cainöje kowe la itretre hamë ini ka hnyipixe, me qaja amamane ngöne la kola nyiqaane la macatre, laka, Itretre Anyipicine i Iehova angatr.—Wange ju la zonal La Tour de Garde ne 15 Diseba 2010, götrane 3-5.
4. Nemene la nyine troa kuca hnene la itre keme me thin ka inamacan?
4 Ame ngöne la itre drai tixenuë celë, kola elë me “aköte” catre la itre itupath hna cile kow hnene la itre thöthi Keresiano. (2 Tim. 3:1) Nyipi ewekë catre troa thele hnene la itre keme me thine ka inamacan, troa canga hnëkëne la itre nekö i angatr. (Ite edomë 22:3) Hawe, matre ame ngöne la macatre ne ini celë, epi tro asë hi nyipunieti a xatuane la itre nekö i nyipunieti troa hnëkë hnyawa?