Ka Hnëkë Kö Epuni Göi Ini?
1. Nemene la hna aijijë epun troa kuca ngöne la epuni a lö troa ini?
1 Maine epuni petre hi a lö troa ini maine sisedrëne pena la ketre macatre, ngo nyipici laka nyimutre la itre itupath me itre jol hnei epun itre thöth, hna troa cile kow. Ngo kolo mina fe lai a aijijë epuni troa hane “anyipicine la nyipici.” (Ioane 18:37) Hapeu, ka hnëkë hnyawa kö epuni troa hane cainöj?
2. Kola hapeu la troa hnëkë göi ini?
2 Tro epuni a kepe thangane ka loi ngöne la nöjei götrane la mele i epun, e hnei epuni hna kapa la ini hna hamën hnei Iehova, me itre keme me thine i epun, memine la hlue ka nyipici me ka inamacan. (Ite edomë 1:8; 6:20; 23:23-25; Efe. 6:1-4; 2 Tim. 3:16, 17) Maine jë atre hë epuni enehila la itre itupath hnei epuni hna troa cile kow ngöne la hna ini. Tro la ini qaathei Iehova memine la aqane atrepengöne epuni la mele e cili a hnëkë epuni troa cainöj. (Ite edomë 22:3) Loi e tro epuni a wanga atrune la ini cili memine la itre mekune nyine ixatua ka eje e hnine la lue volim ne la itus Les jeunes s’interrogent me ngöne la itre hna cinyihan ka ej e hnine la zonal Réveillez-vous !
3. Nemene la ka troa aijijë epuni troa cilëgöline la lapaune i epun?
3 Hnene laka sipu teritoare i epuni la hna ini, ene pe tro ha aijijë epuni troa cilëgöline la lapaune i epun. Ame la kola goeëne hnene la itre xan la aqane heetre i epun me aqane iseji epun, me aqane ujë i epun me aqane ithanata, me aqane metrötrëne epuni la itre sine ce ini epun me itretre hamë ini me itre ka trene hnëqa e hnine la uma ne ini, nge angatr mina fe a öhne laka hetre trepene la mele i epun, tre, ijije tro la itre xan a hnyingë epun, ka hape, “Pine nemen matre thaa ceitu i eö kö me itre xan?” (Mal. 3:18; Ioane 15:19) Haawe, ketre ijine hi la ka aijijë epuni troa cainöj me qeje pengöne la itre ini hnei epuni hna mejiune kow. (1 Tim. 2:9, 10) Ame ngöne la macatre, maine jë tro epuni a cile kowe la itre xaa itupath, tune la troa sine la itre feet ne la nöj maine pena hna atrune hnei mus. Maine angatr a hnyingëne la kepin matre thaa sine kö epun la itre feete cili, hapeu, tro kö epuni a sa, ka hape, “Ka icilekeu la itre feete cili memine la hming, ke, ketre Atre Anyipicine i Iehova ni,” maine pena tro epuni a xome la ijine cili matre troa qaja la pengö i Iehova, Tretretro i epuni ka ihnim? Maine tro epuni a hnëkë hnyawa me nue Iehova troa eatrongë epun, tro hë epuni a atreine troa cainöje kowe la itre ka hamë ini, me itre sine ce ini me epun, me itre xane ju kö.—1 Pet. 3:15.
4. Pine nemen matre epuni a mejiune laka troa tro loi la itre macatre ne epuni a ini?
4 Ngacama troa nango luelu la hni epun troa lö troa ini, ngo thaa tro pi kö epuni a thëthëhmine laka, nyimutre la itre atr ka ajane troa xatua epuni matre troa lolo la itre macatre ne epuni a ini. Ketre, eahuni a ce madrin me epun, ene la trenge catre hnei epuni hna troa kuca matre troa cainöje ngöne la sipu teritoare i epun. Qa ngöne lai, catre pi me hnëkë hnyawa troa cainöj ngöne la hna ini!