Itre Pionie a Xatuane La Itre Xan

¹ Hnei Iesu hna qaja ka hape: “Atraqate la meledrai, ngo xalaithe hi la angetre huliwa; qa ngöne lai thithi jë nyipunie kowe la Joxu ne la meledrai, mate tro nyidëti a upe la angete troa huliwane la meledrai i nyidë.” Pine laka, ala xalaithe hi la itretre menu ngöne la hneijine i Iesu, nge tru la itre götrane hnë troa cainöje ngön hnei angatr, haawe, ijije hi tro Iesu a upi angatre isa ala caasi troa tro fë la maca ka loi kowe la itre atr ka ala nyimu catr. Ngo thaa hnei nyidrëti kö hna huliwa tune lai, hnei nyidrëti pe hna “upi angate isa ala lue.” (Luka 10:​1, 2) Pine nemene la nyidrëti a upe la ala lue?

² Angatre petre hi a hane xötrei cainöj, nge thatrepengöne hnyawa petre kö angatre la huliwa. Matre qa ngöne la hnei angatre hna ce huliwa, haawe, ijije hi tro angatre a kepe thangane ka loi qa ngöne lai, me hane ithuecatrekeu. Tune la hna qaja hnei Solomona ka hape, “loi la ala lue hune la ala cas.” (Ate Cai. 4:​9, 10) Ame fe lo thupene la penetekos 33 K.T. lo ijine kola hamëne la uati hmitrötr, hnei Paulo me Banaba, me itre xane ju kö hna ce cainöje memine lo itre ka ce hmi me angatr. (Ite Huliwa 15:35) Drei la ketre manathithi ka tru koi angatr, ngöne laka, angatre a isa kapa la itre ini hna hamëne hnene la itre trejine ka macaj!

³ Ketre Porogarame Ne Ini Ka Lolo: Ceitune hi la ekalesia i keresiano ne la hneijine së memine la itre ekalesia i keresiano ne la hneijine i Iesu, laka, ketre organizasio ka cainöj. Eje fe a ini së. Ame la nyipi aja së isa ala caasi ke, ene la troa tro fë hnyawa la maca ka loi thenge la hne së hna atrein. Haawe, maine easë a ajane matre troa ala nyimu catre pala hi la itre trejine ka atreine tro fë hnyawa la maca ka loi, haawe, hetre ixatua nyine hamëne thatraqane lai.

⁴ Hna ithuemacanyi koi së hnei sasaiatri ngöne lo ketre icasikeu ne Ini Göi Huliwa ne Baselaia, laka, hetrenyi la ketre porogarame hna hnëkëne thatraqane la itre pionie, matre tro angatre a hane xatuane la itre xaa trejine ngöne la hna cainöje trootro. Hapeu, nyipi ewekë kö la aqane waiewekë cili? Eje hi. Kola e la waane milio lao ka cainöje hna bapataisone ngöne lo köni macatre ka ase hë, nge nyimutre thei angatre la itre ka aja ixatua, matre maca hnyawa fe koi angatre troa cainöjëne la maca ka loi. Drei la ka ijije troa hamëne la ixatua cili?

⁵ Ijije troa hamëne la ixatua cili hnene la itre ka xome la huliwa ne pionie. Kola hamëne koi angatre hnene la organizasio i Iehova la itre eamo ka nyimutre, memine la itre ini ka ijij. Kola hamëne kowe la itre pionie la itre ini thatraqai angatr, ngöne la lue wiike ne Ini ne Cainöj koi Itre Pionie. Angatre fe a hane kepe thangane ka loi qa ngöne la itre icasikeu hna hnëkëne koi angatre hnene itre qatre thup, atre thupëne la sirkoskripsio me distrik, nge hetrenyi mina fe la ixatua hna hamëne koi angatre hnene la itre qatre thup. Ngacama thaa ka maca asë kö la itre pionie troa cainöj, tui Paulo me Banaba, ngo hnei angatre fe hna hane kapa la itre ini ka ijije nyine ixatua, nge angatre a madrine troa hane ce thawa itre eje memine la itre xaa ka cainöj.

⁶ Drei La Ka Troa Kepe Thangane Lai? Thatraqai drei la porogarame cili, itre ka xötrei cainöj, maine koi itre hna xötrei bapataison? Ohe! Hetrenyi la itre trejine ka hnyipixe, nge itre xane ka hekö hë ngöne la nyipici, ngo troa hetre madrine i angatre troa kapa la itre hnepe ixatua ngöne la itre xaa götrane la huliwa ne cainöj. Ame itre xan, lolo catre la aqane tro fë angatre la itre itus, ngo thatreine hnyawa kö troa iwai hmaca, maine troa nyiqaane inine la Tusi Hmitrötre memine la itre atr. Ame itre xane ke, thaa jole kö e tro angatre a nyiqaane la itre etid, ngo angatre a öhne laka, thaa kökötre kö la hnainine ngöne la nyipici. Nemene la ka thungi jë i angatre troa kökötr? Atreine hi troa sipone kowe la itre pionie troa hamëne la ixatua ka ijije ngöne la aqane troa cile kowe la itre jole cili. Ame itre xaa pionie, atreine catre angatre troa amejëne la aja ne la itre atr, me nyiqaane la itre etid, me eatrongëne la itre hnainine ka xötrei etid, kowe la organizasio. Qa ngöne lai, atreine hi tro angatre a hamë ixatua jëne la porogarame ka hnyipixe.

⁷ Hapeue la epuni a goeëne la porogarame i epun, thaa hane kö eje aijijë epuni troa sine la itre icasikeu göi cainöje trootro, thenge la hnei epuni hna ajan? Maine thaa ijije kö kowe la itretre cainöje troa ce cainöje me epun, maine jë ijije pena kowe la ketre pionie.

⁸ Nyipi Ewekë Troa Ce Huliwa Hnyawa: Troa alua ce wange hnene la itre qatre thupe ngöne la macatre, la itretre cainöje ka aja ixatua matre troa hane sine la porogarame hna hape, Itre Pionie a Xatuane La Itre Xan. Maine aja i epuni fe troa hane kapa la ixatua cili, loi e tro epuni a ce wange la aqane troa ce huliwa memine la pionie ka troa xatua epun, me kuca la ketre idrai ne huliwa ka lolo, me trongëne hnyawa ej. Loi e troa eatrëne la itre hna isa pui asë. Ithahnatane ju fe la eloine la itre xaa aqane troa nyiqaane ithahnata. Wange ju la kepine matre hetre thangane ka loi la itre xaa aqane nyiqaane ithahnata. Wangatrune ju fe la itre ixatua hna hamëne hnene la pionie, ka troa aloine la itre aqane nyiqaane ithahnata i epun. Maine tro epuni a trongëne la itre ewekë hnei epuni hna inin, haawe, tro ha mama koi epuni me koi itre xane fe laka, epuni a kökötre hnyawa ngöne la huliwa ne cainöj. (Wange ju 1 Timoteo 4:​15.) Loi e troa ce huliwa ngöne la aqane troa xome la nöjei götrane la huliwa ne cainöj, ene la troa cainöje ngöne la nöjei ijin ngo ngöne pe la itre xaa hnepe götran epuni a aja ixatua ngön.

⁹ Tro la atre thupëne la huliwa ne cainöje a wangatrune hnyawa la aqane kökötre ne la atre cainöj. Tro pala hi angeice a ce wange memine la atre xomiujine la Ini Tus, la aqane kepe thangane epuni la porogaram. Ketre tro mina fe la atre thupëne la sirkoskripsio a xatua epun, ngöne la nyidrë a wange la ekalesia.

¹⁰ Iehova a ajane troa inine la noje i Nyidrë me “hnëkëne thatraqane la nöjei huliwa ka loi asëjëihë.” (2 Tim. 3:​17) Loi e troa wangatrune la hna amekötin, hna hape Itre pionie a Xatuane La Itre Xan, ceitune me ketre ewekë ka lolo nyine troa xatuane la itretre cainöje ka ajane troa huliwane hnyawa la atreine i angatr, matre troa cainöjëne hnyawa la wesi ula. Maine epuni fe a hane xome la hnëqa ka lolo cili, haawe, kuca ju eje cememine la hni ne ole, me ipië, memine la hni ka madrin.