Nemene La Aqane Troa Ce Huliwa La Itre Atrene La Hnepe Lapa Matre Troa Hane Hamë Mekun—Hnine La Itre Icasikeu Ne La Ekalesia
1 Loi e troa wangatrune hnene la itre hnepe lapa ka keresiano, la hna amekötin, ene la troa ce tro kowe la itre icasikeu ne la ekalesia. (Heb. 10:24, 25) Maine tro asë hi angatre a ce huliwa, atreine hi tro angatre a hnëkë hnyawa, matre troa hane sine la itre icasikeu, me hamë mekune fe ngöne la itre ijine cili. Nyimu pengöne jole thene la itre hnepe lapa, ngo hetrenyi la itre ewekë nyine troa kuca hnene la keresiano trahmany, me trejine föe, maine trahmanyi maine föe ka mele caasi pe memine la kuku, matre troa akökötrene thene la hnepe lapa, la ajane kowe la itre ewekë ngöne la götrane la ua; nyipi ewekë troa huliwa tune lai, ngacama tru catre hnei nekönatr, nge isa macatre i nyudrene kö.—Ite edomë 1:8.
2 Troa Ami Ijine Troa Hnëkë: Kola madrine troa ce huliwa hnene la itre atrene la hnepe lapa, ngöne la angatre a goeëne laka, kola isa hnëkë hnyawa hnene la isa hnepe lapa, kowe la itre icasikeu ne la ekalesia. Nyimutre angatr, angetre ce hnëkëne la hna cinyihane thatraqane la icasikeu ne la ini ne La Tour de Garde ne la wiik. Ame itre xan, angatre a hnëkë kowe la Ini Tusi ne la ekalesia, maine ce e pena la porogarame ne e Tusi Hmitrötre thatraqane la wiik. Ame la hne së hna ajan, ke, ene la troa hnehene la itre mekune ka tru, qëmekene troa sine la itre icasikeu. Haawe, tro ha kepe thangane ka loi asë la itre atrene la hnepe lapa, qa ngöne la itre hnei angatre hna dreng, nge tro fe hë angatre a hane hamë mekun, pine laka, hna hnëkë hnyawa.—1 Tim. 4:15.
3 Loi e Troa Hane Hamë Mekun: Loi e ajane asë hnene la itre atrene la hnepe lapa, troa isa qaja amamane la mejiune i angatr, qëmekene la itre xaa atr, jëne la itre mekune hna fe amamane ngöne la itre ijine icasikeu. (Heb. 10:23) Hapeu, kolo kö a aja ixatua maine ithuecatre hnene la ketre atrene la hnepe lapa, matre troa hane tune lai? Nemene la ixatua hna ajane hnei angatre isa ala caas, matre troa hnëkëne la itre hnëqa thatraqane la Ini Ne Cainöje Trootro Qa Thei Akötresie? Troa madrine hnene la itre föe, ngöne la kola xatua angatre hnene la fö i angatr, maine hamëne pena la ketre mekune göi ketre ceitune ka loi, maine ketre tulu nyine troa xome pena ngöne la xötreqa hna troa kuca. Ame koi itre nekönatr, thaa nyipi ewekë kö troa kuca hnene la itre keme me thine la itre xötreqa ne la itre nekö i angatr. Nue nyudrene pi troa isa kuca, matre troa ini nyudreni troa isa xomi hnëqan. Caasi hi tro pe la itre keme me thine a xatuane la itre nekö i angatre ka co, me upi nyudrene troa anyimua amamane me e catrëne koi angatre la itre xötreqa i nyudren.—Efe. 6:4.
4 Loi e Tro Sa Isa Canga Hnëkë: Loi e troa inine la itre nekönatre nge co petre kö angatr, troa heetr, me canga hnëkë matre thaa tro kö a traqa hmitre ngöne la itre ijine icasikeu. Ketre thaa tro kö a nue caasine pala hi kowe la ketre troa kuca la itre xaa hnepe huliwa ngöne la hnalapa, ngo loi e troa ce ixatuanekeune la itre jole matre thaa tro kö a traqa hmitre ngöne la itre ijine icasikeu.—Wange ju la itre mekune nyine ixatua hnine la itus, Bonheur familial, götrane 112, me Les jeunes s’interrogent, götrane 316-17.
5 Loi e tro asë hi la itre keme me thine me itre nekönatr, a mekune hnyawa la itre trenge ewekë hna qaja hnei Iosua ngöne lo qatre hë nyidrë, ka hape: “Ngo ame ni me lapange, te, tro huni a nyi hlue i Iehova.” Qa ngöne lai, catre pi së troa ce huliwa matre troa hane sine me hamë mekune ngöne la itre ijine icasikeu ne la ekalesia.—Iosua 24:15.