Nemene La Aqane Tro La Itre Atrene La Hnepe Lapa a Ce Huliwa Matre Atreine—Troa Hane Cainöj
1 Kola amadrinë së me akeukawane la itre hni së, ngöne la easë a öhne la itre trahmanyi me itre föe, itre keme me thine me itre nekönatre a ce cainöjëne la maca ka loi, me qaja trongëne la ëje i Iehova? (Sal. 148:12, 13) Loi e troa majemine pala hi hnene la itre hnepe lapa asë troa hane cainöje trootro. Hapeu, hna amë kö hnene la hnepe lapa i epuni la ketre drai ngöne la nöjei wiik, matre troa hane cainöje trootro? Maine celë hi hnei epuni lai hna kuca, haawe, isa atre hnyawa hi la itre atrene la hnepe lapa, la nyine troa hnëkëne thatraqane lai, nge canga hmaloi hi troa hane sine la huliwa ne cainöje trootro.—Ite edomë 21:5a.
2 Qëmekene la drai hna amekötine troa cainöj, hapeu, matre ce mekune troa ce hnëkëne la itre aqane nyiqaane troa ithahnata hna troa xome hnene la hnepe lapa? Ketre ithuecatre ka tru la troa ce kuca la itre aqane troa cainöje ka hetre thangane ka loi, nge jëne tro fe lai a acatrene thene la itre atrene la hnepe lapa la nyipi ajane troa ce huliwa. Drei kö la manathithi hna troa kapa hnene la hnepe lapa, e hna akötrehnine pala hi la huliwa ne cainöje trootro, nge hna hnëkë asë hnyawa pala hi hnene la itre atrene la hnepe lapa!
3 Hna ce tro hnene la atre thupëne la sirkoskripsio memine la itre atrene asë la ketre hnepe lapa, matre troa cainöje trootro. Nyidrëti a ce cainöje trootro memine la jajiny, ene pe hnyingë nyidrëti jë hnei nyëne ka hape: “Ije hawa ne nyipëti a troa ce cainöje me eni?” Nyëne a hnyinge tune lai, pine laka, ase jë lai, ke nyëne pena a troa ce huliwa memine la keme i nyën. Kola mama hnyawa la hatrene laka, ka madrine nyëne me keme i nyëne troa ce cainöje trootro. Drei la aqane mele ka lolo hnine la hnepe lapa cili!
4 Maine jë atreine fe hnene la itre xaa hnepe lapa troa ce xome la huliwa ne pionie ka ixatua, caa treu ngöne la macatre. Maine pena, ijije hi troa pionie ka ixatua pala hi hnene la caa atrene la hnepe lapa, maine troa thele troa xome la huliwa ne pionie lapa. Maine tro asë hi la itre atrene la hnepe lapa, a hnëkë hnyawa me ce huliwa, haawe, maine jë atreine hi tro angatre a isa akökötrene la huliwa ne cainöje i angatr, ngöne laka, angatre a troa xatuane la ka pionie. Eje hi laka, tro ha kapa la itre manathithi hnene la itre atrene asë la hnepe lapa, qa ngöne laka, kökötre la huliwa, nge hetrenyi la itre thangane ka loi hna öhne qa ngöne la hna cainöje trootro.—Mal. 3:10.
5 Maine tro la itre hnepe lapa a catre xome la huliwa ne tro fë evangelia, haawe, tro ha lolo catre la aqane imeleku i angatr, me catre cainöj, nge hetre thangane ka loi la hna huliwa, nge atraqatre la madrine troa nyihluei Iehova!—Wange ju la Fil. 2:1, 2.