Loi e Tro Sa “Canga Qaja La Aliene La Tronge Së!”
1 Hapeu, ase jë fe hë thupa hnene la ketre atr la epuni a qaja la ketre aqane nyiqaane ithahnata hna hnëkëne hnyawa, ene laka, nyidrëti a hape: “Ea canga qaja pi pena la aliene la trongei epun! Nemene la hnei epuni hna ajan?” Nemene la ewekë hne së hna trotrohnine qa ngöne la aqane ithahnata ka tune lai?
2 Nyimutre la itre atr ka thatreine xohmihni ahoenyi enehila. Angatre a ajane troa atre la pengö së, memine la kepine la tronge së. Ame ngöne la angatre a öhne ka hape, easë a traqa troa qeje Tusi Hmitrötr, angatre a hutrö koi së ke xele kö ma drei së. Nyimutre la itre atr ka mekune ka hape, thaa ka nyipi ewekë kö kowe la mele i angatre la troa e Tusi Hmitrötr, me porotrikëne la itre aliene ej. Nemene la aqane tro së a xatuane la itre atr cili matre hetre ajane jë thei angatre troa pane xome la itre hnepe menetr, göi troa ce ithahnatane me easë la itre xaa topike ne la Tusi Hmitrötr?
3 Nyine Troa Kuca Ka Hetre Thangane Ka Loi: Ame la nyipi ewekë, ke ene la troa amamane kowe la atr ka hape, jëne la itre hnepe hnëewekë ka xalaithe hi, atreine tro la Tusi Hmitrötre a hamëne la itre mekune ka lolo nyine thatraqane la itre jole ka eje thei angeic. Hetrenyi la itre aqane nyiqaane ithahnata ka lolo, ka amejëne la ketre hnyinge ka ijije troa upe la atr troa pane mekun, nge kola sisedrëne lai hnene la ketre xötre ka sa thenge lai hnying. Loi e hetrenyi the së la ajane troa xome la itre mekune nyine ixatua celë. Hna hnëkëne itre eje matre troa xatua së troa atreine “canga qaja la aliene la tronge së” me hane ahlëne fe la ajane la atr troa drei së.
4 Ame ngöne la itre götran thaa ajane kö la itre atr troa drei së, amejëne jë la ketre hnyinge ka troa ketri angatr:
◼ “Easë a easenyi trootro kowe la macatre 2 000, nge hapeu, epuni a mejiune laka, troa loi la itre drai elanyi maine ngazo pena? [Nue pi troa sa.] Hna ahnithe hnei Tusi Hmitrötre la itre ewekë ka ngazo hne së hna öhne enehila hnedrai së, nge tune mina fe la ewekë ka troa traqa ngöne la pun.” E jë la 2 Timoteo 3:1, 2, 5 me Ite Edomë 2:21, 22.
◼ “Nyimutre la itre jole hna thele troa cile kow hnene la nöje së, tune la itre mec. Hapeu, atre fe hi nyipunie la hnei Akötresieti hna thingehnaean, ene laka tro Nyidrëti a apaatrene la itre mec?” E jë la Hna Amamane 21:3, 4.
◼ “Hapeu, atreine kö tro la itre lapa së a kepe thangane lai, e hne së isa ala caas, itre atrene la nöje celë, hna trongëne la itre trepene meköti qa hnine la Tusi Hmitrötr?” E jë la Mataio 22:37-39.
5 Pine laka, hnëqa së la troa cainöjëne la maca ka loi ne la Baselaia, haawe, loi e tro së a amamane hnyawa kowe la itre atr la hna troa kuca hnene la Baselaia. Qaja jë ka hape:
◼ “Atre fe nyipunieti laka, hna ahnithe hë hnene la itusi ka hekö catr, ene la Tusi Hmitrötr, laka, troa caasi pe elanyi la Baselaia thatraqane la fene asë?” E jë la Daniela 2:44.
◼ “Nemene la mele elanyi ngöne la kola troa musinëne hnei Iesu Keriso la fene hnengödrai?” E jë la Salamo 72:7, 8.
6 Maine ka hmi la itre atr, tupathe jë la caasi qa ngöne cahu itre aqane nyiqaane ithahnata:
◼ “Nyimutre la itre atr ka akötr, tune la itre föe hna qanangazon, maine pine laka, isa hmi kö, maine thaa caa hane kupeine ngönetrei kö. Tune kaa la mekuna i Akötresieti kowe la itre aqane ujë ka ngazo cili?” E jë la Ite Huliwa 10:34, 35.
◼ “Atre hi së laka, hnei Iesu Keriso hna kuca la itre iamamanyikeu ka nyimutre ngöne la hneijine nyidrë. Maine ijije hi tro nyipunieti a sipo nyidrë troa hane kuca la itre xaa iamamanyikeu enehila, haawe, nemene la itre hnei epuni hna ajan?” E jë la Salamo 72:12-14, 16.
7 Maine thaa ajane kö la atr troa fe la qëhnelö, qaja jë ka hape:
◼ “Kola kucakuca la itre atr enehila troa drenge pala hi la itre jol. Angatre a ajane la itre nyin itre ej. Maine jë fe mekune i nyipunieti lai? Ngo tro sa xome ekaa la itre nyipi nyin la itre jole ka traqa koi së?” Nue pi troa sa. E jë la 2 Timoteo 3:16, 17.
8 Tune Kaa Matre Hane Fe Tupathe Eje Hnei Nyipunie? Ame ngöne la itre xaa ijin, nyipi ewekë troa thele ju hi la ketre hnyinge ka hmaloi troa trotrohnin, nge thaa ka qea menu kö, matre troa ahlëne la aja ne la itre atr. Hnene la ketre föe ka icilekeu ekö hna hëne la lue trejine föe kowe hnine la uma i eahlo, thupene la hna hnyinge hnei ketre e nyidroti ka hape: “Atreine kö nyipoti troa qeje pengöne la Baselaia hnei epuni hna thithi kow, ngöne la Thithi ne la Joxu?” Ene pe hna pi atre hnene la föe la aliene la hnyinge cili, ame hnei nyidroti hna nyiqaane troa etid. Enehila, nyidroti fe hë a hane catre nyihluei Iehova!
9 Ame ngöne la easë a cainöje kowe la ketre atr, loi e tro pala hi së a metrötre ngöne la aqane troa ithahnata. Loi e troa hni ka menyik. Troa canga pi drei së hnene la itre atr, ngöne la angatre a öhne hnyawa laka, thaa easë kö a ihnimi thoi.—Ite Huliwa 2:46, 47.
10 Nyipici laka, thaa ewekë ka hmaloi kö la troa cainöjëne la maca ka loi ngöne la hneijine së enehila. Ame la itre xaa atr, angatre a mekuhni ngöne la angatre a öhne la itre trehnyiwa. Ame itre xane ke, tru hnei jole i angatr matre pë hë ijine troa drei së. Qa ngöne lai, loi e troa xecie koi së laka, nyimutre pala kö la itre atr nyine troa cainöje kow. (Mat. 10:11) Troa hetre thangane ka loi la easë a thele angatr, e hne së hna axopatrene la itre aqane nyiqaane ithahnata së, me “canga qaja la aliene la tronge së!”