Kola Aisapengönë Së Hnene La Huliwa Ne Cainöj
1 Hetrenyi la itre atr ka hnyinge ka hape, “Nemene la ka isapengöne thene la Itretre Anyipici i Iehova, memine la itre xaa hmi?” Tro së a sa tune kaa? Atreine hi troa qeje pengöne hne së la itre xaa hnepe ini qa hnine la Tusi Hmitrötr. Ngo hane kö së mekune troa qaja amamane la eisapengö së me angatr, qa ngöne laka easë a cainöje kowe la nöjei atr asë?—Mat. 24:14; 28:19, 20.
2 Enehila, xalaithe hi la itre ka hmi ka ajane troa hane ce thawa memine la itre xan, la itre hnei angatre hna inin. Maine jë kola mekune ka hape, ma loi hi e troa drengethenge la itre trenge wathebo i Kaisara, troa loi la thiina, maine troa hane xatuane la itre xan. Ngo pëkö thei angatre la ajane troa xatuane la itre xan, troa inine la hnei Tusi Hmitrötre hna qaja, göi iamele. Nemene la isapengö së me angatr?
3 Qa ngöne laka, ka catre cainöje së, haawe, isapengöne kö së memine la itre huliwa hna kuca hnene la itre xaa hmi. Kolo ha troa 100 nge sine lao macatre enehila, nge kolo pala hi a catre sisedrëne hnene la itre Temoë lo huliwa hna kuca ekö hnene la itre pane Keresiano, ene la troa cainöjëne la maca ka loi uti hë la troa nyipune la fen. Haawe, ame la hne së hna ajane ke, ene la troa xatuane la itre atr ka ala nyim, matre tro angatre a hane mele thenge la aja i Akötresie.—1 Tim. 2:4; 2 Pet. 3:9.
4 Tune Kaa Fe Së? Kola atre së hnene la itre atr, qa ngöne laka, ka catre cainöjëne së la Wesi Ula i Akötresie? (Ite Huliwa 17:2, 3; 18:25) Hapeu, canga hmaloi hi troa öhne hnene la itre atr ka lapa ezi së, la aqane cainöje së, matre isapengö së catre memine la hmi angatr? Hane kö xomi së, ceitune me ketre atr ka thele troa ithawakeune la mejiune së? Hane kö së cainöje lapaa? Mekune kö së laka, thaa kolo hmekuje kö a aisapengö së hnene la ëje hne së hna xom, ngo qa ngöne fe la hne së hna kuca thenge la aliene la ëje cili—ene la troa anyipici Iehova.—Is. 43:10.
5 Tro la ihnimi së koi Akötresie me kowe la itre atr, a upi së troa catre xome la huliwa ne cainöj. (Mat. 22:37-39) Celë hi kepine matre, easë a ajane tui Iesu me itre aposetolo, troa thele la nöjei ijine troa tro fë la maca ne Baselaia koi itre xan. Epi catre pala hi së troa cainöjëne la maca ka loi, kowe la itre ka ajane troa drei së. Nge eje hi laka, tro hë së a xatuane la itre atr ka hni ka ajane troa “wangate hmekune . . . la ate nyi hlue i Akötesie me ate tha nyi hlue i nyidë.”—Mal. 3:18.