Hapeu Hetrenyi Fe Kö The Së La Ajane Troa Hujëne La Mele Së?
1 Maine tro sa wangatrune la aqane ketre nue Iesu Keriso la mele i nyidrë kowe la itre atr asë, haawe, tro ha hane upi së asë fe troa kuca la hne së hna atrein, me nue la trenge catre së ngöne la easë a isa hujëne la mele së. Kola sipone iele së hnei Tusi Hmitrötre ka hape: “Hamënepi hnei nyipunie la ite ngönetei nyipunie huje ka mel, me ka hmitöt, lo aja i Akötesie.” (Rom. 12:1) Maine tro pala hi së a isa waipengö së ngöne la nöjei drai, tro hë lai a mama koi së ka hape, ma hetrenyi jë fe the së lo lai ajane troa hujëne la mele së, thenge la isa hne së hna atrein.
2 Ngöne La Kola Sisedrëne La Atrehmekune Ne La Tusi Hmitrötr: Hne së kö hna hane ami ijine ne troa isa e la Tusi Hmitrötr, me majemine inine ej? Hapeu, easë kö a metrötrëne la porogarame së? Hne së kö hna lapaa majemine troa hane hnëkëne hnyawa la itre icasikeu së? Maine easë la ketre tane lapa, hapeu, easë kö a hane inine pala hi la Tusi Hmitrötre memine la itre atrene la hnepe lapa së? Eje hi laka, maine easë a ajane troa kuca la itre ewekë cili, nyipi ewekë tro sa xome hnöthe la aqane tro sa wai televizio, maine kuci ordinatör, maine itre xaa ewekë ju kö. Ngacama co la aqane hujëne së la mele së, ngo easë a atre laka, ame la traeme hne së hna xome thatraqane la Wesi Ula i Akötresie, ke eje a troa e së kowe la mele ka thaa ase palua kö!—Ioane 17:3.
3 Ngöne La Kola Inine La Itre Nekö Së: Ame la ijine ka sisitria troa nyiqaane inine troa hane isa hujëne la mele i angatr, ke ene la angatre a nekönatr. Ini angatre jë ka hape, maine nyipici laka, hetre ijine troa elo, ngo hetre ijine fe thatraqane la huliwa, me itre xaa huliwa ju kö qaathei Akötresie. (Efe. 6:4) Thue qai angatre jë, göi nyidrawa uma. Kuca jë la ketre porogaram, matre tro pala hi së a ce cainöje me angatr. Acatrene jë la ini hnei angatre hna kapa, hnene la tulu hne së hna hamën.
4 Ngöne La Itre Huliwa Ne La Ekalesia: Kola kapa la itre manathithi hnene la ekalesia, ngöne la kola hujëne hnene la nöjei atrene la mele i angatre, matre troa kuca la itre ewekë nyine loi koi së asë. (Heb. 13:16) Hapeu, ijiji së fe kö troa hane xome la itre hawa ka nyimutre thatraqane la huliwa ne cainöj, me hane inine la itre atr? Ijiji së kö troa hane xatuane la itre ka wezipo, maine itre qatr, maine jë troa hane trothei angatre kowe la itre hna icasikeu?
5 Qëmekene tro Iesu a hujëne tixenuëne la mele i nyidrë, hnei nyidrëti hna ithuecatre kowe la itretre drei nyidrë troa amë panëne la itre huliwa ne la Baselaia, nge troa pine pë hë la itre xaa ewekë. (Mat. 6:33) Maine tro së a catre thele troa akökötrene la aja troa hujëne la mele së, eje hi laka, tro hë së a kapa la itre manathithi ka tru, nge easë pala hi a catre nyihlue Iehova cememine la madrin.