“Troa Ham, Me Loi Qanathane”
1 Hnei Paulo hë ekö hna upi Timoteo troa xatuane la itre trejine troa “kuca la loi, me mana ngöne la nöjei huliwa ka loi, me troa ham, me loi qanathane.” (1 Tim. 6:18) Hnei Paulo fe hna amekunëne la itre keresiano ne Heberu, ka hape, thaa tro kö a thëthëhmine “troa kuca la loi me ihnim.” (Heb. 13:16) Pine nemene matre cinyihane jë angeice la itre ini cili? Pine laka, atre hi angeice ka hape, tro itre eje a “hadehadeu, me mingöming, me tingetinge koi angate asë angete kuca la loi.”—Rom. 2:10.
2 Pine laka Iehova Akötresie la Atre Ixup, haawe, Nyidrëti la ka xupe la nöjei ewekë asë. (Hna ama. 4:11) Easë a madrine la itre ewekë hnei Nyidrëti hna kuca thatraqai së. Ngacama pëkö hni ne ole ne la itre atr ka ala nyim, ngo kolo pala hi a aijijëne hnene la Tretretro ka pucatine asë, tro asë hi la nöjei atr a kepe thangane ngöne la mele i angatr, la itre ewekë hnei Nyidrëti hna hamëne cememine la ihnim. (Mat. 5:45) Goi hamëne fe Nyidrëti la Hupuna i nyidrëti ka caas nyine thupene mel, matre ijije fe koi së troa hane kapa la mele ka epine palua. Hapeu fe la ihnimi së, eje kö a hane upi së troa amamane la ole së, ene pe easë a hane ham kowe la itre atr?—2 Kor. 5:14, 15.
3 Nemene La Nyine Troa Ce Thawa? Ewekë ka loi e tro sa xome la itre hne së hna hetreny, me huliwane itre eje thenge la mekuana i Akötresie. Loi e tro sa sajuëne la huliwa ne Baselaia e cailo fen, jëne la itre mo së, me ngöne mina fe la götrane la ua. Ketre, trenga mo ka tru alamekene la maca ka loi hne së hna tro fë, pine laka, “mene i Akötesie nyine amelen.” (Rom. 1:16) Maine tro sa xome pala hi la traeme së me itre mo së ngöne la nöjei treu matre troa cainöje trootro, me inine la itre atr, haawe, atreine hi tro së a ce thawa me angatre la trenga mo ngöne la ua, ka aijijë angatre fe troa hane hetrenyi la mele ka thaa ase palua kö.
4 Atraqatre la madrine i Iehova, ngöne la easë a xatuane la itre ka pë ewekë. Nyidrëti a thingehnaeane koi së la itre manathith. Nyidrëti fe a ahnithe koi së, ka hape: “Tha iene kö la ite mo ngöne la ijine elëhni; ngo thina ka meköti a amelene qa ngöne la mec.” (Ite Edomë 11:4; 19:17) Maine tro së a sajuëne la huliwa ne Baselaia hnene la itre mo së, me catre cainöjëne trongëne la maca ka loi, haawe, itre aqane tro hi së lai a amamane ka hape, itre ka ham së, nge ka ce thawa së la itre hne së hna hetreny.