Loi e Tro Sa “Mana Ngöne La Nöjei Huliwa Ka Loi”
1 Hnei Paulo aposetolo hna ce huliwa hnyawa me Timoteo me Tito, ngöne la itre macatre tixenuë nyidrëti a catre cainöjën la maca ka loi. Caasi hi la itre trenge ewekë nyine ithuecatr, hnei nyidrëti hna isa qaja koi nyidro. Hnei nyidrë hna qaja koi Tito ka hape, nyipi ewekë “troa kuca la nöjei huliwa ka loi hnei angetre lapaune koi Akötesie.” (Tito 3:8) Hnei nyidrë hna qaja koi Timoteo ka hape, tro ha “mana ngöne la nöjei huliwa ka loi,” la itre atr ka mejiun koi Akötresie. (1 Tim. 6:17, 18) Celë hi eamo ka sisitria koi së asë! Ngo nemen la ka troa upi së troa kuca la itre huliwa ka loi ngöne la mele së? Nge nemen la itre huliwa ka nyipi loi nyine tro sa kuca ngöne la itre drai ka troa xulu?
2 Hnene la ihnimi së koi Iehova memine la mejiune së ka lolo qaathei Nyidrë, hna upi së troa mana ngöne la itre huliwa ka lolo. (1 Tim. 6:19; Tito 2:11) Ka sisitria la hnepe ijin celë ne la macatre, tre kola amekunë së hmaca la Iehova a upe la Hupuna i Nyidrë kowe la ihnadro, ene Iesu matre troa anyipicin la Tretretro i nyidrë me nyi jën la itre atr asë ka hni ka menyik troa hane kapa la mele ka thaa ase palua kö. (Mat. 20:28; Ioane 3:16) Troa mama hnyawa la ewekë cili ngöne la kola troa atrun la Drai Ne Amekunën la meci Keriso e 28 Maac. Tune kaa la aqane ujë së ngöne laka, hetrenyi hë së la mejiun kowe la mel ka thaa ase palua kö, hapeu, kolo kö a hane upi së troa kuca asë la hne së hna atrei troa “mana ngöne la nöjei ewekë ka loi”? Eje hi, ewekë lai hne së hna troa kuca! Nemen la itre huliwa nyine tro sa kuca enehila?
3 Itre Huliwa Ka Lolo Nyine Troa Kuca e Maac Me e Thupen: Eje hi lai laka, loi e tro së a sin la Drai Ne Amekunën, ene la ketre ijin ka nyipi ewekë catr ngöne la macatre, kowe la Itretre Anyipici Iehova ngöne la fene hnengödrai asë. (Luka 22:19) Ngo easë a ajane mina fe troa ce thawa la madrine së kowe la ijin cili, memin la itre atr ka ala nyimu. Goeëne ju la rapor ne huliwa ne cainöj ngöne la Annuaire 2002, maine hnine la zonal, La Tour de Garde ne 1 Januare 2002, nge tro hë së a öhn la aqane elën la etrun la itre atr ka sin la Drai Ne Amekunën ngöne la itre nöj e cailo fen, kola e maine akön, maine afoa, maine afaif la aqane elë la etrun la itretre cainöj. Eje hi lai laka, nyipi ewekë troa pane ce wang hnine la itre ekalesia asë, matre troa catre tro fë la itre pepa ne ihë göi Drai Ne Amekunën ngöne la itre teritoar së. Qa ngöne lai, loi e tro sa xome la itre hawa ka nyimutre matre tro sa hane hën la itre atr qaane enehila uti hë e 28 Maac, me hane xatua angatr troa atrepengöne la mejiun ne la iamele.
4 Ngöne la ijin kola xejë la treu Eiperem, kolo mina fe a nyiqaane troa lolo la drai. Haawe, tune kaa la aqane tro sa kepe thangan ka loi la hne së hna “mana ngöne la nöjei huliwa ka loi”? Ene la troa hetre madrine së pala hi troa cainöjën la maca ka loi, me “catre kowe la nöjei huliwa ka loi.” (Tito 2:14; Mat. 24:14) Maine thaa ijije kö tro epuni a hane pionie ka ixatua e Maac, tune kaa pena e treu Eiperem me/maine Mei? Maine epuni a troa pionie e Maac, hapeu ijije kö tro epuni a sisedrën la huliwa cili ngöne la itre xaa treu?
5 Ame itre xan ka huliwa i maseta, tre, angatr a öhne laka atreine hi tro angatr a kuca la caa hawa ngöne la gojenyi ne tro kowe la hna huliwa, me ngöne la itre gojeny, maine troa ithanata pena memin la itre atr ka huliwa ngöne itre magazë a hna canga fe e hmahmakany. Ame itre xan, tre, angatr a amë hmekun lo angatr a troa xeni hnaipajö, la itre hnepe traem ne troa cainöj. Ame itre xan, tre, angatr a öhn laka, ijij troa ce tro troa kuci etid ngöne la ijine cili, memin la ketre trejin. Nyimutre la itre trejine föe ka huliwa lapa pe ngöne la hnalapa, hnei angatre fe hna hane thele ijin troa cainöje trootro, ngöne kola ini hnene la itre nekö i angatr. Maine tro angatr a canga hlë e hmakany troa nyihnyawan la uma me kuca la itre xaa huliwa ne la hnalapa, haawe, ame ngöne la drai, tro ha tru la traem hnei angatr hna troa xom thatraqai cainöj, me göi troa inin la itre atr.—Efe. 5:15, 16.
6 Maine thaa ijije kö tro epuni a hane pionie ka ixatua, haawe, loi e tro epuni a thel troa pane hane akökötren la etrun la huliwa ne cainöje i epun, me kuca asë la hnei epuni hna atrein matre troa “kuca la loi, me maca ngöne la nöjei huliwa ka loi, me troa ham, me loi qanathan” la nyipici memin la itre xaa atr.—1 Tim. 6:18.
7 Mekune Kö La Huliwa Ka Lolo Ene La Troa Inin La Itre Atr: Ame ngöne la nöjei macatre, hetrenyi la itre atr ka traqa troa hane sin la Drai Ne Amekunën. Hapeu, ijije kö tro la itre xaa trejin e hnin la ekalesia, a hane wange hnyawa la itre atr cili ka thaa hane petre kö etid? Ijije kö troa wai angatre hmaca matre troa hane xatua angatr troa kökötr ngöne la götrane la ua? Maine jë itre sinee ne la Itretre Anyipici Iehova la itre atr cili ka sin la Drai Ne Amekunën. Ame itre xan, tre, ka etidi hë ekö, ngo kolo hi a ajan la itre hnepe ixatua matre troa xejë hmaca la etid, me hane sin pala hi la itre icasikeu. Drei la madrine së la easë a goeë angatre a hane ce nyihlue i Iehova me easë!
8 Eje hi lai laka, maine tro së a catre cainöj ngöne la treu Maac memine la itre treu thupen, tro hë së a öhn la itre atr ka hni ka menyik, itre hne së hna troa wange hmaca troa porotrik memin. Tupathe jë troa hnying koi angatr. Thupene lai, qaja ju ka hape tro nyipunie a sa lai hnying ngöne la epuni a troa bëeke hmaca. Aqane tro hi lai a eköth me hnëkën la epuni a troa iwai hmaca. Nyipi ewekë catr troa canga wange hmaca lai atr. Maine thatreine kö së troa nyiqaane etid ngöne la easë a xötrei cainöj kowe lai atr, loi e tro sa tupath troa xejë la etid ngöne la easë a iwai hmaca.
9 Ame ngöne la easë a cainöj e cahu gojeny, loi e tro së a thel troa ithanata memin la itre atr hne së hna ixelë memin. Nyimutre la itre atr ka drei së ka hamën la ëj me hnalapa me numero ne telefon i angatr, kowe la itre trejin ka cainöj koi angatr e cahu gojeny. Maine thaa kolo kö a lapa la ketre atr ngöne la teritoare i epun, haawe, nyialiene jë la pepa, hna hape, Veuillez suivre l’intérêt (S-43), nge hamëne jë kowe la seketere, nge tro pë hë nyidrë a hamën kowe la ekalesia atrekë teritoaren lo hna lapa ngön hnene lo lai atr. Maine jol kowe la seketere troa kuca lai, haawe, loi e troa iupi fë kowe la Bethela. Eje hi lai laka, tro pë hë a wang la aqane troa akökötren la aja ne lai atr.
10 Maine thaa hna ahnithe kö hnene la atr la hnalapa, ngo numero ne telefone hi la hna hamën, haawe, hë angeice jë ngöne la telefon matre troa wai angeice hmaca. Hnëkëne amë jë la mekun hnei epuni hna ajan troa ithanatan me angeic. Loi e troa lapa fë la itus Comment raisonner ngöne la epuni a telefon. Ame itre xan tre, hnei angatr hna nyiqaane etid memine la itre atr hnei angatr hna telefone kow, tune mina fe la itre atr ka jol e troa öhn ngöne la itre hnalapa i angatr. Hna nyiqaan hnyingën hnene la ketre trejin föe kowe la ketre föe hnei eahlo hna ithanata memin ngöne la hna cainöj ngöne itre hnalapa trootro la numero ne telefone i eahlo; hetre thangan la hna hë, pine laka, hnei eahlo hna nyiqaan la lue etid.
11 Loi e Troa Ce Huliwa Memin La Itre Qatre Thup Troa Xatuan La Itre Ka Nanazij: Kola nyipi ewekën pala hi hnene la itre qatre thup la itre trejin ka nanazij ngöne la götran la ua. Ala nyimu angatr, ka isa nyiqaane hane hë sine hmaca la itre icasikeu ne la ekalesia. Angatr a atrehmekun la enyipi ewekën la troa thel troa caas memine la itre trejin me fedre catr kowe la organizasio i Iehova, matre troa thupë angatr ngöne la götrane la ua, tune la hna qaja ngöne Salamo 91. Itre xane hmaca ha a hane cainöje trootro enehila. Maine troa traqa hnene la itre xan ka thaa cainöj hmaca kö troa hane sin la Drai Ne Amekunën ngöne la treu celë, loi e tro angatr a hane ketre isa nyiqaane etid. Maine kola aja ixatua hnene la itre xan, haawe, loi e troa thel hnene la itre qatre thup tro la ketre trejin a etid me angatr. Ketre madrin ka tru e tro sa hane ixatua, me ce huliwa memin la ekalesia.—Rom. 15:1, 2.
12 Catre Pi Së Troa “Kuca La Nöjei Huliwa Ka Loi”: Hna öhn hnene la itre trejin ka pionie ka ixatua ngöne la caas maine nyimu treu, laka, kola kökötre lolo la huliwa ne cainöje i angatr ngöne la kola tro la itre treu ne pionie. Hnei angatr hna iöhnyi memin la itre atr ka hni ka menyik, kola ajan troa wai angatre hmaca. Celë hi ka upe la itre trejin ka pionie troa catre cainöje pala hi, matre troa wange hmaca lo lai itre atr ka hetre hni ne ajan troa ithanata me angatr. Hna nyiqaan la itre etid hnene la itre xan, nge kolo fe a xatua angatr troa catre hane cainöjën la maca ka loi.
13 Hnene laka, tru la madrin hna kapa hnene la itre xan ngöne la hnei angatr hna cainöj me inin la itre atr, matre hna upi angatr troa wange hmaca la itre ewekë hnei angatr hna amë panën. Haawe, hna atrein hnene la itre xan troa acon la traeme ne huliwa i maseta, me sisedrën la huliwa ne pionie ka ixatua. Ame itre xan, tre, ijiji angatre fe hë troa hane pionie lapaa. Atreine hë angatr troa amë la lapaune i angatr koi Akötresie, ngo thaa kowe kö la itre ewekë hna hamën hnei fen. Angatr a öhne laka, ame la angatr a “qanathane la itre ewekë i angatr,” ke, angatr mina fe a kapa la itre manathith qaathei Iehova, nge kola acatrene fe la mejiune i angatr troa hane kapa la “nyipi mel.” (1 Tim. 6:18, 19) Eje hi lai laka, troa manathith la ekalesia asë, qa ngöne laka hna xom la huliwa ne pionie hnene la ka ala nyim. Hna majemin hnene la itre pionie troa canga ithanatan la itre hnei angatr hna melën ngöne la hna cainöj, me hën la itre xan troa hane ce cainöj me angatr, ene pe kola akökötren la egöcatren la itre trejin ngöne la ua hnin la ekalesia.
14 Epi tro asë hi së a “mana ngöne la nöjei huliwa ka loi”, ngöne la hneijin ne atrun la Drai Ne Amekunën celë, me akökötren ngöne la itre treu thupen la huliwa ne cainöje së. Loi e tro së a amaman la ole së kowe la itre hnei Iehova hna hamë së, tun la mejiun troa mele epine palua ngöne la ketre fen ka hnyipixe me ka meköt.—2 Pet. 3:13.