“Tro Sha Kuca La Loi Kowe La Nöjei Ate Asëjëihë”
1 Drei la lue taan mekun hna troa xom hnine la lue sinecetron la Huliwa Ne Baselaia ne Febuare me Maac, hna hape, troa “Aeatrene La Wesi Ula i Akötesie” nge troa “Mana Ngöne La Nöjei Huliwa Ka Loi.” ( Kol. 1:25; 1 Tim. 6:18). Hnene itre ej hna ithuecatr koi së troa catr troa xatuan la itre atr ka hetre hni ka ajan, troa hane sin la Drai Ne Amekunën, me troa hane xatuane fe la itre trejin ka thaa cainöje hmaca kö, matre tro angatr a hane ce mele hmaca memine la ekalesia; nge troa hane xatuane fe la itre nekö së memin la itre hnainin ka ijije hë troa hane cainöj, matre tro angatr a hane nyiqaane tro fë la maca ka loi. Eje hi lai laka, hne së hna kepe thangan ka loi la itre ewekë hne së hna catre thel troa kuca. Enehila, “tro sha [catre] kuca la loi kowe la nöjei ate asëjëihë e hete ijine shë.”—Gal. 6:10.
2 Könë Angatre Jë Troa Hane Sine Hmaca La Itre Icasikeu: Ame ngöne la teritoare ne la Bethela e celë e Kaledonia, kösë foa thauzan nge hetre munën la etrun la itre atr ka sin la Drai Ne Amekunën ngöne la nöjei macatre, ngo tha ka hane kö angatr cainöjën la maca ka loi. Pine laka kola mama laka, hetre aja e kuhu hni angatr ngöne la angatr a traqa, haawe, nemen la nyine tro sa kuca matre troa akökötren la aja thene la itre “hna hnëkëne kowe la mele ka tha ase palua kö” matre tro angatr a hane itre ka “lapaun”? (Ite Huliwa 13:48) Ithuecatre jë troa hane bëek me canga sin hmaca la itre icasikeu ne la ekalesia.
3 Tune kaa matre hë angatre fe itre atr ka hetre hni ne ajan, troa hane sin la Ini Tus ne la Ekalesia, matre troa hane madrin troa ce ithanatan la itre mekun ka sisitria qa hnine la hna perofetan hnei Isaia? Maine sinee i epun, maine atre pena epuni lai atr, nge epuni a troa kuca la ketre xötreqa ngöne la Ini Ne Cainöje Trootro Qaathei Akötresie, haawe hane jë hë angatr matre troa hane dreng la cainöje i epun. Thuemacanyi angeice ju la itre taan la itre cainöj kowe la ka ala nyim hna troa cile fë ngöne la itre wiik ka troa xulu. (Loi e troa athip la itre cainöj hna troa kuca hnine la ekalesia.) Thele jë la itre ijin troa ahlën la aja ne la itre atr, troa hmi koi Iehova. Nge ketre, maine thaa ka etid petre kö lai atr, haawe, hnyingë angeice jë maine ajane angeic troa hane inin la Tusi Hmitrötr.
4 Catre Pi Troa Xatuan La Itre Ka Thaa Cainöje Hmaca Kö: Ala nyimu la itre ka sin la Drai Ne Amekunën, itre ka nue hë la mele i angatr koi Iehova. Ngo hnei angatr hna hmaca e cili, thaa hnei angatre kö hna catr cainöjën la maca ka loi. Celë hi matre hnei Paulo hna ithuecatr koi së troa “kuca la loi . . . sisitria kowe la nöjei ate ne la lapa i angete lapaun.” (Gal. 6:10) Qa ngöne lai, loi e troa pane wang la itre ka thaa cainöje hmaca kö.
5 Maine jë hna drengethenge hë hnene la itre xan la ithuecatr qaathene la itre qatre thup, nge itre xan hmaca ha a hane nyiqaane cainöj. Maine hna upi së hnene la itre qatre thup troa xatuan la ketre trejin matre tro hmaca angeic a hane cainöj, haawe, mekune kö së laka, tro hë hetre mejiun ne lai atr e hne së hna amaman hnyawa la ihnimi së koi Iehova, me kowe la huliwa ne cainöje trootro. Amamane jë koi angeic la aqane tro angeic a xom la itre götran ka isapengön ne la huliwa ne cainöj, matre troa hetre madrine i angeic, troa catre xom la huliwa ne cainöj, me ketre öhn la itre manathith qaathei Iehova.
6 Loi e Troa Nyiqaan Hnyawa Hnene La Ka Xötrei Cainöj: Ame la kola wangatrehmekun hnene la ketre föe ka xötrei kapa la nyipici laka, celë hi la nyipi organizasio i Akötresie, haawe, kola canga hane pi xome hnei eahlo la huliwa ne cainöj. Thupen la hna inin koi eahlo la nyine tro eahlo a kuca, öni eahlo ka hape: “Loi e tro sa catr ngöne la huliwa cili.” Maine hna kapa hë enehila la ketre atr hnei epuni hna etid memin, troa hane cainöje trootro, xatua angeice jë troa wang la enyipi ewekëne la troa “catr ngöne la huliwa cili,” nge xatua angeice jë troa hane xejë hnyawa la huliwa, ceitun me ketre atre cainöj ka hnyipixe. Xatua angeice jë troa majemine hnëkë, me catre xome pala hi la huliwa ne cainöje trootro ngöne la nöjei wiik.
7 Maine sipu nekö i epun la ka nyiqaane cainöj, ce huliwa jë me angeic matre tro angeic a kökötr, thenge la hnei angeic hna atrein troa kuca. Hamëne jë la hnepe ixatua, nge tro hë nyipunie a hain la aqane tro angeic a ithanata memine la itre atr, me e la Tusi Hmitrötr, me hamën la itre itus. Maine hetrenyi la itre atr hnei angeic hna ithanata memin ngöne la hna cainöje trootro, haawe, ini angeice jë troa iwai hmaca me xatuan lai atr.
8 Loi e Troa Akökötren La Huliwa i Epun: Hapeu, atreine kö tro epuni a akökötren la aqane tro epuni a tro fë la evangelia, me e thupene fe lo lai hneijine ne la Drai Ne Amekunën? Ijije kö tro epuni a akökötren la huliwa ne cainöje i epun, me nyixan hnene la caas maine lue hawa ne cainöj ngöne la nöjei wiik? Hane kö epuni canga goeën ngöne la idrai la ijin ka ijij koi epun, troa hane xome hmaca la huliwa ne pionie ka ixatua? Maine tune kaa pena matre hane saze hnei epuni la aqane mele i epun, matre troa hane cainöj ngöne la drai ka pexej? Ame asë hi la trenge catr hne së hna kuca ngöne la huliwa ne cainöje trootro, tre, ijije troa xatuan la ketre atr matre tro angeic a hane kapa la nyipici! (Ite Huliwa 8:26-39) Ngöne la easë a lapa qëmeke ne la itre drai, loi e tro “pala hi [së] a xöte thenge la ka loi, the [së] kö me nöjei atr asë.”—1 Thes. 5:15.
[Hna eköhagen götran 3]
Catre Pi Troa Hamë Ixatua:
□✔ Itretre sin la Drai Ne Amekunën
□✔ Itretre cainöj hna acilëne hmaca
□✔ Itre ka cainöj hna thaa bapataisone petre kö