Kola Sa La Itre Hnyinge i Nyipunie

◼ Drei la ka troa tro fë la itre thithi ngöne la itre icasikeu ne la ekalesia?

Ka nyipi ewekë catre la thithi ngöne la hmi së. Ketre götrane qa ka sisitria, nge hnëqa ka tru la troa nyi trenge ewekëne la itre xan, xajawa i Iehova. Pine la ehmitrötrene la thith, nyipi ewekë troa atreine waiewekë hnene la itre qatre thup, ngöne la angatre a iëne la itre trejine ka ijije troa tro fë la itre thithi hnine la ekalesia. Loi e tro la itre trejine hna bapataisone hë ka troa nyi trenge ewekëne la ekalesia, a itre keresiano nge hlue ka macaje ngöne la ua, ka amamai tulu ka loi, nge ka metrötrëne la ekalesia. Jëne la aqane thithi angatre cememine la hni ka metrötr, troa mama hnyawa, laka, lolo catre la aqane mele i angatre koi Iehova Akötresie. Drei la ketre hna cinyihane hnine la zonal, La Tour de Garde 15 Mei 1986, hna hape: “Thithi Qëmekene La Ka Ala Nyim, Hna Kuca Cememine La Hni Ka Ipië;” kola amamane hnyawa la itre trepene meköti nyine troa xatuane la itre trejine ka troa thithi qëmekene la ka ala nyim ngöne la ëjene la ekalesia.

Thaa tro kö a xome hnene la itre qatre thupe la ketre trejine troa thith, nge kola hlemu laka ka hetre thinane angeic. Ketre thaa loi kö e troa iëne la ketre trejine ka pë xomi hni, maine ka thele troa thithi göi tro hi a qaja la gele ne la ketre. (1 Tim. 2:8) Maine hna bapataisone hë la ketre thöth, ngo loi e tro la itre qatre thupe a wange hnyawa maine macaje fe hë angeice ngöne la götrane la ua, ene pe ijiji angeice fe hë troa hane thithi fë la ekalesia.—Ite Huliwa 16:1, 2.

Maine pëkö trejine trahmanyi ka macaje ngöne la itre xaa ijine icasikeu göi cainöj, haawe, ijije hi troa thithi hnene la ketre trejine sör. Loi e troa petrëne hnei nyidroti la ketre sine hages. Qa ngöne lai, nyipi ewekë mina fe troa canga acile hnene la itre qatre thupe la ketre trejine föe ka macaje ngöne la ua matre troa xomiujine la icasikeu, e maine thaa tro kö a traqa hnene la trejine ka troa cile fë.

Hna majemine troa thithi ne nyiqaan, hnene la perezida ne la Icasikeu Kowe La Ka Ala Nyim. Ngo ame ngöne la itre xaa icasikeu ne la ekalesia, maine xalaithe hi la itre trejine ka macaje ka ijije kowe la hnëqa cili, haawe, atreine hi troa upe pena la ketre trejine matre troa thithi ne nyiqaan, maine nyipun. Caasi hi loi e troa canga thuemacanyi angeic, matre atreine tro angeice a canga mekune la itre hnei angeice hna troa qaja. Ene pe troa thaa jole kö e troa trotrohnine la thithi angeic, hna kuca hnene la hni ka metrötr, nge ka caasi memine la itre mekune ne la icasikeu.

Thaa nyipi ewekë kö troa qea menu la thith. Ame la kola thithi thatraqane la ka ala nyim hnene la ketre trejin, ka loi kö e tro angeice a cile matre troa drenge me trotrohni angeice hnene la itre atr, troa ithahnata catr, me qaja hnyawa la itre hnëewekë. Tro ha aijijëne asë la nöjei atr, troa drenge la thith, me ce qaja cememine la hni ka ajan, ngöne la pune ka hape, “Amen!”—1 A. l. ite jo. 16:36; 1 Kor. 14:16.