“Tha ’Teine Kö Nyiho Troa Tha Qaja”
1 Iesu Keriso a waipengöne hnyawa la huliwa ne cainöj. (Mat. 28:20; Mareko 13:10) Ngacama sikisi milio hë la etrune la itretre cainöje enehila ngöne la 234 lao nöj, ngo thaa tro kö së a mekune ka hape fenesi hë la huliwa. Uti hë la ijine tro Akötresie a qaja ka hape ase hë la huliwa, “tha ’teine kö së troa tha qaja” la itre ewekë hne së hna atre.—Ite Huliwa 4:20.
2 Mejiune Jë Kowe La Uati Hmitrötre i Akötresie: Satana a amë qëmeke së la itre itupathi ka tru, matre troa ananazijë së. (Hna ama. 12:17) Nyimutre fe la itre jole qa ngöne laka, itre atr ka ngazo së. Atreine hi troa thapa hnene la itre ewekë celë la mekune së, qa ngöne la huliwa ne cainöje ka sisitria catr. Ngo, maine catre së mejiune koi Iehova, ke, tro la uati hmitrötre i Nyidrë a xatua së troa cile kowe la nöjei itupath.
3 Ngöne la kola qanangazone la itre trejine ngöne la ekalesia i keresiano ekö, hnei angatre hna thithi koi Akötresie troa xatua angatre troa catre qaja pala hi la Wesi Ula. Hnei Iehova hna kapa la thithi angatr, me upe la uati hmitrötre i Nyidrë, me hamëne fe la ajan, memine la trenge catr, matre tro pala hi angatre a cainöj. Ame la thangan, ke, thaa mano kö angatre hna cainöjëne la maca ka loi.—Ite Huliwa 4:29, 31; 5:42.
4 Thaa Tro Kö a Xouene La Itre Ithahnata Ka Ahleuhleunyi Së: Maine jë troa axounyi së hnene la itre mekune ne la nöjei atr, maine pena hnene la aqane sili trenga thoi së hnei angatr. Ngo, mekune ju la aqane catre i Peteru memine la itre xaa aposetolo, e nyipine la hnaakotre i angetre Iudra, hna cinyihane ngöne Ite Huliwa 5:29-32. Tune la hna qaja hnei Gamaliela, ketre atre inine la Trenge Wathebo, maine huliwa i Akötresie, ke thatreine kö troa apaatren. Thaa hna eatrëne kö ej, hnene la sipu trenge catre së. Atraqatre la huliwa cili, nge ketre atraqatre fe la manathithi hna troa kapa, ke Iehova la ka sajuëne ej, nge Nyidrëti hmekuje hi la ka atreine troa eatrëne lai!—Zaka. 4:6.
5 Loi e tro sa xëwe koi Iehova o drai, me sipo Nyidrë la uati hmitrötr, matre troa xatua së troa catre cainöjëne la maca ka loi. Epi tro së a qaja tui Ieremia ka hape, kösë eë hnine la itre june së la maca ne la Baselaia. (Iere. 20:9) Thatreine kö së troa lapa fë la mekune celë!