Ahlëne Jë La Ajane La Itre Atr Hnene La Itre Ewekë Ka Traqa Koi Së
1 Hapeu, ajane kö nyipunie troa hetrenyi pala hi la itre mekune nyine ixatua thatraqane la huliwa ne cainöj, ka troa ahlëne la aja ne la itre atr kowe la maca qa hnine la Tusi Hmitrötr? Haawe, ithahnatane jë la itre ewekë ka traqa ngöne la fen, me ngöne la nöje së matre troa nyiqaane porotrike memine la itre atr. Atreine hi troa qaja la ketre ewekë ka traqa ngöne la tribu, maine ngöne la nöj, maine e cailo fene hnengödrai. Kolo pala hi a saze la aqane trongene la fen. (1 Kor. 7:31) Hanawange la itre ceitun.
2 Itre ejolene göi mani, me thupene mo ka ahleuhleune la itre atr. Haawe, qaja jë ka hape:
◼ “Hane kö nyipunie drenge jëne la itre nuvel, laka, kolo hmaca a elë la thupene mo?” Maine pena, qaja jë la ejolene la pë huliwa e tro la ketre sasaiatri ka tru a upe la itre ka huliwa ka nyimutre. Thenge la aqane tro xome nyipunie la porotrik, sisedrëne jë me hnyinge ka hape: “Hapeu, hnei nyipunieti kö hna hane thele la kepine matre jole catre koi së troa isa ketre huliwa thupene a së?” maine “Tune kaa, nyipi jole pala hi e troa hetrenyi la itre nyipi ewekë thatraqane la mel?”
3 Troa nyiqaane porotrikëne mina fe la itre aqane iakötrë, tune la iangazo hnine la itre hnepe lapa, maine itre jole thene la itre ka ini. Hnyingëne jë ka hape:
◼ “Hane kö nyipunieti e hnine la itre nuvel la [ewekë ka traqa ngöne la nöj]?” Thupene lai qaja jë ka hape, “Hapeue la mekune i nyipunie, nemene la qaane la itre iakötrë ka tru e celë fen?” maine “Tune kaa, tro kö a traqa elanyi la ketre ijin, troa mele xetietë la itre atr?”
4 Itre ethane la itre gejë madra, me itre sa, maine nöjei pengöne aqane gomegome ngöne la itre nöj e cailo fen ka ahlëne la ajane la itre atr. Hnyinge jë ka hape:
◼ “Hapeu Akötresieti la atrekë zöne la [ewekë ka traqa]?” Maine amexeje jë pena la ketre gomegome ngöne la ketre nöj, nge qaja jë ka hape: “Maine nyipici laka, easë asë hi ajane troa tingetinge la fen, pine nemene kö matre jole e troa traqa kowe la pune cili?”
5 Loi e canga atrehmekune pala hi së la itre ewekë ka traqa, nyine nyijëne porotrike së. Hetrenyi la itre mekune nyine ixatua e hnine la itus Comment raisonner, fene la hna cinyihane hna hape “Actualités,” g. 9-10. Thaa tro pi kö së a porotrikë politik, maine caasi pena me itre ka icilekeu pine la itre ejolene la mel. Ngo xome jë pe la itre xötre ne la Tusi Hmitrötr, me amamane ka hape, Baselaia i Akötresieti hmekuje hi la sipu nyin la itre ejolene la fen.