Cainöje Jë Ngöne La Fene Ka Saze Lapaa
1 Drei la enyimenyimen la aqane saze la itre ewekë enehila! Thatre una ju kö së la kola traqa la ketre ewekë ka ngazo, maine ketre wene, maine ketre jole göi manie, maine gomegom la nöj hnei politik, maine ketre hulö pena ka ngazo catr ka traqa ngöne la ketre götran; celë hi itre ewekë lai ka ijije tro sa xome matre nyine troa nyitrepen la itre aqane tro sa nyiqaane ithanata. Ketre canga ujë mina fe hi la itre atr kowe la itre xaa ewekë. (Ite Huliwa 17:21; 1 Kor. 7:31) Ngöne la fene ka saze nyimenyime celë, tune kaa la aqane tro sa ahlëne la ajane la itre atr matre troa hane ce thawa me angatr la maca ne Baselaia me angatr?
2 Loi e Troa Atrehmekun La Hna Ajan Hnene La Itre Xan: Ame la ketre aqane troa ahlëne la ajane la itre atrtroa amexeje la itre ewekë ka traqa. Hnei Iesu hna qaja la itre ewekë ka traqa nge hna atre hnene la itre atr, celë hi aqane enijëne nyidrëti la mekune la itre ka drei nyidrë matre tro angatr a hane waimekune la pengöi angatr xajawai Akötresie. (Luka 13:1-5) Ketre tune mina fe, ame la easë a tro fë la maca ka loi, loi e tro sa qaja fe la itre ewekë ka traqa e cailo fen maine ngöne la nöj, itre ewekë ka ketr la mele ne la itre atr ngöne la teritoare së. Ngo eje hi lai laka, ame ngöne la easë a ithanatan la itre ewekë cili, loi e tro sa thupën la itre nyine tro sa qaja, matre tro pala hi së a amaman ka hape thaa easë kö a hane lö hnin la kuci politik maine itre jole ngöne la nöje së.—Ioane 17:16.
3 Tune kaa la aqane tro sa atre la ewekë ka lapan la mekune ne la itre atr enehila? Ame jë hi la ketre aqane troa atre lai, tre ene la troa hnying me troa dreng. (Mat. 12:34) Maine hetre hni ne ajane së troa atre la itre aja ne la itre atr, haawe, tro ha upi së troa wangatrehmekun la aqane waiewekë ne la itre xan me thelejën hnyawa troa ithanatan atrun la itre xaa mekun. Canga tro hi a mama la ewekë hna ajan hnene la itre atr ne la götrane së, qa ngöne la hna qaja hnene lai atr hne së hna ithanata memin, ene pe kola fe gojenyi së troa cainöje koi angeic.
4 Loi e Tro Sa Hnëkën La Ketre Aqane Nyiqaane Ithanata: Atreine hi troa ce ithanatane hnyawa la itre mekune qa hnine la itus Comment raisonner, matre troa hnëkë troa cainöj ngöne la fene celë ka saze lapaa. Ame ngöne la itre götrane 10-11, fene la hna cinyihan hna hape, “ Crime/Sécurité ” (Ihumuth/Lapa Xetietë) me “ Derniers jours ” (Itre Drai Hnapin), tre hna hamën la itre mekune nyine ixatua ngöne la aqane troa hane amexej la itre ewekë ka traqa hnine la itre aqane tro sa nyiqaane ithanata kowe la itre atr. Eje mina fe e hnine la Huliwa Ne Baselaia ne Semitrepa 2000, götrane 4 la ithuemacanyi ka caas. Ame ngöne la easë a hnëkën la aqane tro sa nyiqaane ithanata, thaa tro kö së a thëthëhmine troa amë la ketre xötre ne la Tusi Hmitrötr.
5 Nyipi ewekë tro sa thele troa hnëkën la aqane tro sa cainöjën la maca ka loi, hmekune la itre aja ne la itre atr ne la teritoare së a kola saze lapaa. Eje hi lai laka, tro hë së a ce ithanatan memine la itre atr la itre ewekë hnei angatr hna hnehengazon ngöne la mele i angatr. Jëne la aqane kuca cili, tro hë së a xatuan la itre atr ka ala nyimu troa hane atrepengöne lo Atre ka thaa saze kö la itre thiina i Nyidrë me itre hnei Nyidrëti hna amekötin.—Iako. 1:17.