Bëeke Jë Kowe La Hnalapa Hnei Epuni Hna Öhne Laka Hetre Thangan
1 Alanyimu the së la itre ka atreine matre angatr’a hamëne nyimutrene la itre zonale me boroshur. Ngo nyipiewekë catre tro së a bëeke hmaca matre tupathe troa xomexatuane la aja. Nge troa tru la thangan, e hne së hna hnëkë hnyawa qëmekene la troa iwaihmaca.
2 Loi e tro së a atre laka nyimutre la itre thöth, kola hnehengazone la itre ewekë tune la itre nyipi atr. Tro la Réveillez-vous! ne mei a qejepengöne la itre jole enehila, tune la aqane goeëne itr’eje hnene la itre thöth. Tro la itre taane cili hnin, a xatuane la itre thöth, me itre keme me thin, troa trotrohnine la itre enyipiewekëne la mel.
3 Maine hnei epuni hna amë pe la “Réveillez-vous!” ne 8 mei, ke, loi e tro epuni a mekune la aqane troa sisedrëne göi troa hamëne la numero ne 22 mei. Ijije tro epuni a qaja ka hape:
◼ “Ame lo zonale hnenge hna amë pe, ke, hetre itre taane ka qejepengöne la jëne mejiune ne la itre nekönatr. Ame la itre nekö së enehila, ke, angatr’a tru ngöne la fene ka tha thuemejiune kö kowe la itre drai hnapin. Alanyimu catre la itre ka amamane laka pëkö madrine i angatr, matre icilekeu la aqane ujë i angatr. Ngo hetre itre xane ka tha ngönengöne kö, nge angatr’a cilaxome la itre nyipi mekun. Ame la taane celë, la Réveillez-vous! ka nyipi traqa, ke, kola qejepengöne la aqane metrötrëne hnene la hna kootr, la mekune ne la ketre thöth. Eni a mekune laka, tro nyipëti a kapa madrine la itre hna qaja e kuhu hnin.”
4 Maine epuni a mekune troa hamëne la ketre boroshür, ke, nyiqaane qaja ju ka hape:
◼ “Eni a madrine lo porotrike i nyiso göne la itre drai hnapin e celë fen. Hapeu, hane kö nyipëti lapa mekune la eloine la mele epin, thupene la tro Akötresie a apatrene la ngazo me akötr? [Amamane jë la iatr ngöne la götrane 31 ne la boroshüre Quel est le but de la vie? Comment le découvrir?] Pane goeëne ju la itre mekene tusi hna cinyihane ngöne la götrane 29 me 30, kola amamane la itre manathithi ka troa xulu qa ngöne la Baselaia i Akötresie. [Mekune ju la ketre mekene tus, nge e ju qa hnine lai boroshür.] Eni a ajane troa nue pe koi nyipë la boroshüre celë, hanawang, 50 F. la thupen.”
5 Ngöne la epuni a bëek, nge maine epuni a öhne laka hetrenyi thei angeice la itre sipu itusi ne la hmi angeice kö, nge angeic’a mekune laka ijije hi lai. Qaja ju ka hape:
◼ “Ngacama isa hetre hmi së, ngo ejehi laka hna ketri së asë hnene la nöjei jole enehila, ene la ihumuth, mec, itre ewekë ka xötreithi së, hawe nemene fe la mekune i nyipë? [Nue pi troa sa.] Hapeu la mekune i nyipë, hetre nyin kö la itre jole celë? [E jë 2 Peteru 3:13.] Ame la aliene la itre itusi eahun, ke, hna qejepengön, ngöne la götrane 2 ne la La Tour de Garde. [E jë la casi maine lue mekune hnei epuni hna iën.] Alanyimu catre la itre atr ka tha temoë i Iehova kö, ngo ka kapa madrine la itre itus, pine laka hetre ithuemacanyi ka hamë mejiune e kuhu hnin, nge hna eköthe hune la Tusi Hmitrötr.” The lueluëne kö troa abonene la atr.
6 Ijije mina fe tro epuni a qaja ka hape:
◼ “Ame lo ketre traqa ni, ke, hnei easo hna ithahnataane lo itre ewekë ka troa traqa kowe la fen. Nemene la mekune i nyipë ngöne la götrane cili? [Qaja ju la ketre ewekë ka nyipi traqa hna ithahnataan.] Ame la kola drenge la itre nuvele celë hnene la itre atr, ke, angatr’a isa hnyinge ka hape nemene jë la pune la fen, nyipëti kö a hane mekune tune lai? Tha luelue kö eahuni laka ame la itre ewekë celë, ke, kola amamane ka hape easë a melëne lo “itre drai hnapin” lo hna perofetaane hnei Tusi Hmitrötre ngöne 2 Timoteo 3:1-5.” Thupene la hna ce e la itre mekune ka sisitria, ke, pane hnyingëne ju kowe lai atr ka hape öhne fe kö nyidrë la hna qaja celë, ngöne la aqane mele ne la atr enehila. Sisedrëne jë la porotrike memine la ketre hna cinyihane ngöne la götrane 89-98 ne la itus Comment raisonner.
7 Maine hne së hna hnëkë hnyawa me ajane catrëne troa xatuane la itre atr, ke, tha tro kö së a luelue laka tro la atr ka hni ka loi a drei së. — Ioane 10:27, 28.