Loi e Tro Palahi Së a Hmaca Troa Wange Lo Itre Atr Ka Xome Lo Itre Zonale Me Boroshüre Së
1 Hnei Iesu hna upe la angetre drei nyidrë troa inine la nöjei atr. (Mata. 28:19) Kola hape tha tro hmekuje kö a hamë itus; ngo loi e tro fe së a xatuane la atr matre tro angeic’a kökötre ngöne la ua. Celëhi matre, nyipiewekë tro së a bëeke hmaca troa nyixane lo pane ixatua së kowe lo itre atr ka ajan.
2 Maine hne së hna amamane la ketre mekene zonale ngöne la xötrei iöhny, ke, loi e tro së a ithahnataane lai mekene cili ngöne la easë a bëeke hmaca:
◼ “Ame lo qange hna wai nyipë, ke, hnenge lo hna amamane koi nyipë lo ketre taane qa hnine La Tour de Garde (maine ngöne la Réveillez-vous!), ka amamane la enyipiewekëne la tro së a wange la hna qaja hnene la Tusi Hmitrötr. Ame la mekuna i Akötresie göne la itre drai hnapine ka lolo, ke, hna nyi trepene ngöne la musi ne la Baselaia i nyidrë. Hna qaja lai ngöne Mika 4:3, 4 la hnei nyidrëti hna thingehnaeane laka tro la Baselaia a nyipune la itre isi.” Thupene la hna e la mekene tusi cili, ke, ngango line pi lo boroshüre “Voici!”, nge amamane jë lo iatr ngöne hune itus. Ce wange jë la hnapane paragarafe cili, nge köjane ju laka Mika 4:3, 4 fe e kuhu hnin. Ce wange ju fe göi vizite hnapine matre troa sisedrëne la porotrike jëne lai hnaluene paragaraf.
3 Maine pëkö ijine tro la atr a ithahnata, ke, mekune ju tro pena makëne la ëje i angeic, matre nyine troa gojenyi ne trofë zonale i epun:
◼ “Eni a wange laka nyipëti a ajane lo itre zonale hnenge hna hamë nyipë, matre eni a mekune laka nyipëti a ajane hmaca la itre zonale ka hnyipi traqa. Ngo hane la ketre mekene la zonale hnenge hna mekune laka tro nyipëti a ajan.” Amamane jë la ketre mekene ka ijije troa amadrinë nyidrë, nge sipone jë troa bëeke hmaca memine la itre zonale hnapin.
4 Troa thele abone:
◼ “Eni a öhne laka aja i nyipëti troa e la La Tour de Garde, matre eni a madrine troa hamë nyipëti la itre xane ka hnyipi traqa. Maine ajai nyipë, ke, tro ni a kuca matre tro nyipëti a kapa la nöjei numero asë jëne poos. Maine ajane nyidrëti troa abone, ke, canga nyialiene ju la pepa, me qeje pengöne ka hape tro pë hë nyidrëti a kapa la itre numero ka troa xulu.”
5 Maine hnei epuni hna amë la ca boroshür, ngo pë ju kö ijine troa amamane la aqane troa inin, ke, mekune kö troa kuca lai ngöne la vizite hnapin.
Ceitun, maine hnei epuni hna amë lo boroshüre “Musi”, sipone jë la atr troa xome la sipu itusi angeic, nge qaja jë ka hape:
◼ “Tro easo a wange la götrane 3 la hna qaja koi së la trepene mekune i Iesu, lo nyidrëti a cainöje ekö e celë fen.” Thupene lai, e jë la hnapane paragaraf. Upi angeice jë troa e la hnaluene me hnakönine paragaraf, nge hnyingë angeice jë ka hape nemene la nyine tro angeice a kuca matre troa atrune la trotrohnine i angeic. Thupene lai, qaja jë ka hape: “Nyipiewekë troa atre la kepine matre easë a ajane catrëne la Baselaia i Akötresie kösë sipu hnë mejiune së.”
6 Nyimu pengöne boroshüre së. Canga wange ju la itre mekune e kuhu hnin, nyine tro epuni a huliwaan. Tro la itre mekune cili a xatua epuni troa thuecatrene la itre atr trene nyipi mekun, matre tro angatr’a inin’atrune lo itre ewekë hna ahnithe hnei Iesueti. — Mata. 28:20.