Ame La Qaane La Inamacane, Tre, Qoue Iehova
1 “Ame la qane la inamacane, te, qoue Iehova.” (Sal. 111:10) Celë hi ewekë ka upi së troa kuca la itre ewekë ka loi, me xatua së troa ananyine la itre ewekë ka sis. (Ite edomë 16:6) Ame la qoue celë, ke ene la troa Ahmitrötrëne la Atre xupi së, ene pe troa upi së troa amadrinë Nyidrëti me drengethenge Nyidrë. Ketre ewekë lai nyine tro së a eënyine me melëne o drai.—Ite edomë 8:13.
2 E nöjei drai, kola tranyi së hnene la itre mekune ka kösau ne la fen, matre tro sa xötrethengene la itre jë ne ej. (Efe. 6:11, 12) Itre atr ka ngazo së, nge canga nyimenyime hi së kuca la ngazo. (Gal. 5:17) Haawe, maine easë a ajane troa xötrethenge la itre wathebo i Iehova, me hetrenyi la madrin, me mel, ke, nyipi ewekë tro sa xoue Nyidrë o drai.—Deu. 10:12, 13.
3 Ame ngöne la tusi Heberu 10:24, 25, ke, kola xatua së troa icasikeu matre tro sa ithuecatrekeu me “cat” ngöne la itre ijine celë hne së hna melën. Ketre ewekë ka sisitria la troa sine lapaane la itre icasikeu, ke, jëne iamele lai kowe lo la itre drai hnapin, ene hi la itre drai celë. Hnene laka, easë a qoue Iehova, haawe kola upi së troa sine la itre icasikeu, me wangatrune la itre aliene ej. Ame la itre ka xoue Akötresie, ke, angatre a xome la itre icasikeu ne la itre keresiano, ceitune me ketre hnëqa ka hmitrötr.
4 Kolo mina fe a mama the së la xoue Akötresie, ngöne la easë a xötrethenge la hnei Nyidrë hna amekötine koi së, ene la troa cainöjëne la maca ka loi ne la Baselaia. (Mat. 28:19, 20; Ite Huliwa 10:42) Ame la sipu aliene la huliwa ne cainöj, ke, ene la troa xatuane la itre xaa atr troa akökötrene la xoue Akötresie, me trongëne la aja i Nyidrë. Easë a eatrëne lai ngöne la easë a wange hmaca la itre vizit, me catre nyiqaane la itre etid ngöne la itre hnalapa, nge thupene lai, troa ini angatre la nöjei wathebo i Akötresie. Qa ngöne lai, kola mama the së laka, hetrenyi the së la xoue Iehova, memine la ihnimi së kowe la itre atr ka lapa easenyi së.—Mat. 22:37-39.
5 Thatreine kö troa kökötre la madrine kowe la itre ewekë ne la ua, thene la itre atr ka pëkö xoue Akötresie, nge canga löthi angatre hi hnene la itre uqanyine me aqane mekune hna mecine ne la fen. (Efe. 2:2) Epi tro sa catre matre troa “nyi hlue madi Akötesie memine la metöte me qou.” (Heb. 12:28) Eje hi laka, tro hë së a kapa la itre manathithi ka eje thene la itre ka xoue Iehova o drai.