Porogaram Ne Asabele Ne Sirkoskripsio Ka Hnyipixe

Ame la ketre alien la hnaewekë xou, ke, kola hape “troa metrötrën me atrun ngöne la kola qeje Akötresie.” Eje a qeje pengön la xou ka hetre thangan ka loi koi së, nge hnei Tusi Hmitrötr hna qeje ej tune la “qane la inamacan.” (Sal. 111:10) Ka isa pengön la xou celë, memine la ketre xou ka haöth la fene i Satana enehila. Tro sa neëne tune kaa la itre mekun ka iajojezi, nge catre pe akökötren the së la xou me metrötr koi Iehova? Kola troa ithanatan la hnyinge celë, ngöne la porogaram ne la asabele ne sirkoskripsio ka hnyipixe koi macatre 2002. Ame la taan, ke, “Qouju e Akötesie, Me Hamë Nyidrëti La Atrun.” (Hna ama. 14:7) Tro hë së a trotrohnin la itre aqane troa kepe thangan ka loi qa ngöne la hne së hna xoue Iehova, easë isa alacaas, nge memine mina fe la organizasio.

Ngacama, tro së a seseu, maine kucakuca, maine sixel troa cil kowe la itre jol, qa ngöne laka easa xou, ngo Tusi Hmitrötr a qaja ka hape: “Manathithi angat’ asë angete qoue Iehova.” (Sal. 128:1) Tro la porogaram ne asabele a amaman koi së la aqane tro sa hun qa ngöne la itre itupath ka traqa koi së ngöne la nyipi hmi, memine la itre thangan ka loi hna kapa qa ngön. Tro fe sa wang la aqane troa xatuan la itre ka xötrei atre la nyipici matre troa akökötren thei angatr la xoue Akötresie ka hetre thangan ka loi, ke, celë hi ewekë lai ka troa upi angatr troa nyihluei Nyidrë cememine la hni angatr, me ngönetrei i angatr, me mekune i angatr, me trenge catre i angatr ka pexej. (Mareko 12:30) Kola nyipun la hnapane drai memine la cainöj hna hamën hnene la atre thupën la distrik, hna hape, “Easenyine Jë La Itre Hnei Nyipunie Hna Hnim.” Angeice a troa qeje pengön la aqane troa atreine lapa hmek, qëmekene la itre ewekë hnei Diabolo hna kuca matre troa ananyi së qaathei Iehova, me fami së, memine la itre trejin me easë ngöne la ua.

“Xoue Iehova Jë, Ngo Thaa Itre Atr Kö,” celë hi taane la cainöj hna thawa foan ngöne la hnaaluene drai. Eje a troa qeje pengön la kepin me aqane tro sa cil kowe la xou ka ajolë së troa eatrën la huliwa ne cainöje së, maine troa cile huti kowe la itre wathebo i Akötresie, matre lolo la mekuthetheu ngöne la hna ini me ngöne la hna huliwa. Ame la cainöje koi nöjei atr hna hape, “Xoue Akötresieti Jë Me Melën La Itre Wathebo i Nyidrë,” ke, hna nyitrepene ej hune la aqane trongen la itre ewekë hna qeje pengöne ngöne la itus Hna Amamane, mekene 14. Kola troa nyipun la asabele ne sirkoskripsio jëne la ithuecatr hna hamëne ngöne la cainöj hna hape, “Catre Jë Troa Mel Ngöne La Xoue Iehova.”

Kolo fe a troa kuca la Ini Ne Cainöje Trootro Qaathei Akötresie, me xome la tulu ne la Icasikeu Ne La Huliwa, me cainöj ne bapataiso, nge tro fe a qaja la itre mekun ka tru ne la Ini Ne La Tour de Garde ngöne la porogaram ne asabele, nge easë a troa catre sine itre ej. Könëne jë la itre hnei nyipunieti hna etidin troa hane sin me nyipunie. Loi e troa canga thuemacan la atre thup perezida hnene la itre ka ajan troa xomi bapataiso. Epi tro së asë a ajane troa amaman, laka, atraqatr the së la xoue Iehova, nge ka hetre thangan ka loi, nge troa atrunyi Nyidrë jëne la aqane tro sa sine asë la porogaram ne asabele celë ka tru alien!