Porogarame Ka Hnyipixe Göi Kovasio Ne Sirkoskripsio

Ame la taan la lue drai ne Kovasio ne sirkoskripsio hna troa nyiqaane kuca e treu semitrepa, ke, hna hape, “Thupëne jë me melëne la itre trenge wathebo i Akötresie.” (Ite edomë 4:4) Kola troa amamane hnyawa la kepine matre thaa ehnefe ka hace kö, la troa drenge thenge la itre trenge wathebo i Akötresie. Ketre, kola troa amamane fe la aqane tro la ka kuca la aja i Akötresie, a hetrenyi la keukawa, me kapa la nyipi manathith, me mejiune thatraqane la itre drai elany.​—Mat. 11:28-30; Ioane 13:17.

Ame koi itre ka denge thenge la hna amekötine hnei Keriso, nge ka ajane troa xome la bapataiso ngöne la ijine asabele, loi e tro angatre a ce ithahnatane lai memine la atre thupe perezida, matre tro nyidrëti a hnëkëne la itre nyine troa kuca thatraqane lai.​—Mat. 28:19, 20.

Troa qeje pengöne hnyawa hnene la ketre cainöj, ka nyimu atre troa cile fë, la itre jëne mekune ka lolo nyine tro sa xome matre tro së a hane amamane la ihnimi së koi Akötresie memine la itre trejine me easë. (Ioane 13:34, 35; 1 Ioane 5:3) Troa hamëne fe jëne la porogarame la itre ihaji ka troa ketr la itre hni së, hna xome qa ngöne la tusi salamo 19 me 119. Ngacama hna cinyihane hë ekö a itre thauzane macatre, la itre ihaji cili qa thei Akötresie, ngo loi e tro fe së a hane wange la aqane tro së a isa kepe thangane enehila jëne itre ej.

Ame la taan la cainöje kowe la ka ala nyim, hna troa kuca hnene la qatre thup, atre thupëne la Distrik, ke, hna hape, “Xoue Akötresieti jë, nge thupëne kö la itre wathebo i Nyidrë.” (Ate cai. 12:13) Tro pë hë la qatre thup, atre thupëne la sirkoskripsio a kuca la cainöje nyine nyipun, ka troa amamane la aqane tro la itre thöthi a thele la ka sisitria kowe la mele i angatre enehila, memine la kepine matre ijije tro angatre a mejiune kowe la mele ka thaa ase palua kö elany. Tro la qatre thup, atre thupëne la Distrik a nyipune la porogaram, me edromëne la nöjei manathithi ka nyimutre hna troa kapa, qa ngöne la hna melëne “la wathebo ka sisitia” ne la ihnim. (Iako. 2:8) Pine la elolone la porogarame ne la asabele cili, thatreine kö troa paatre pe kö hnei ketre!