Porogarame Ka Hnyipixe Göi Asabele Ne Sirkoskripsio
1 Kola nyiqaane la porogarame ka hnyipixe göi asabele ne sirkoskripsio e treu semitrepa, nge kola troa qeje mekune ngöne la taane hna hape “Troa atraqatre la manathithi e hna ham.” (Ite Huliwa 20:35) Hna qejepengöne la manathithi tune la “tingetinge ne la ngönetrei, me madrin.” Alanyimu la itre atr enehila ka sesë nyimenyime kowe la nöjei nyine amadrinëne la mel, ngo ame la engazone ke, thaa qea ju kö la itre ijine madrin. Thaa celë kö la nyipi madrine lai. Ngo, Iehova a ini së la aqane tro së a isa kapa la nyipi madrine ka troa cile huti epine palua. (Isa. 48:17; 1 Ioane 2:17) Tro la porogarame ka hnyipixe ne la asabele ne sirkoskripsio, a qaja atrune la aqane tro së a kapa la manathithi ka tru, e hne së hna hame ngöne la götrane la ua.
2 Loi e tro së a inine troa wange la itre gojenyi ka hetre thangane ka loi, matre hane fe nue asë la hne së hna atreine ngöne la huliwa ne cainöje trootro. Ame la itre cainöje hna troa kuca hnene la itre atre thupe ka wange trongëne la itre ekalesia, ke, hna nyitaane ka hape: “Nyii sinee jë jëne la itre trengamo ka thaa meköti kö,” “Troa metrötrëne la hna acile hnei Akötresie, ene la itre ‘ahnahna trahmany,’ ” nge “Xetrëne jë la nöjei wapicine la nyipi madrin.” Ame la itre ka ajane troa xome la bapataiso ngöne la ijine asabele, ke, tro angatre a ithahnata memine la atre thupe perezida, matre tro nyidrë a ce wange memine la itre qatre thupe la ijine troa ce goeëne me angatre la itre hnyinge göi bapataiso. Maine tro la itre hna hnyipi bapataison a nyihlue i Iehova ngöne la aqane imelekeu ka pë ethan, ke, tro hë angatre a kapa la ketre manathithi ka tru.
3 Atreine hi troa hetrenyi la nyipi madrine me lapa xetietë, e hna wangatrune la musi qathei Iehova. Nyipi ewekë tro asë hi la nöjei atr a atre lai. Qa ngöne lai, troa eköthe la cainöje koi nöjei atr ngöne la asabele ne sirkoskripsio, hna nyitaane ka hape, “Loi e troa caasi memine la nöje i Akötresie ka madrin.” Loi e troa isa xecie e kuhu hni epuni laka, ase së hë epuni könëne la nöjei ka hetre ajane kowe la nyipici, matre tro angatre a traqa troa hane drenge la cainöje celë. Thaa hane kö angatre öhne la kola nyipi lapa xetietë, me hetrenyi pena la madrine ka cile huti fene la musi ne la atr e celë fen, a ka meköle ngöne la ihnatrapaime i Satana. (Ate Cai. 8:9) Ngo, drei la madrine atraqatre hna troa kapa hnei angatre, e troa caasi memine la nöje i Iehova ka madrin!—Sal. 144:15b.
4 Ngacama kola ngazo trootro la aqane trongene la mele enehila, thaa tro jë kö a ahmahmane hnene la Akötresie ka madrin, la itre atr ka kapa la ketre manathithi ka tru, thangane la hnei angatre hna hame ngöne la ua. (1 Tim. 1:11) Tro la porogarame ka hnyipixe ne la asabele ne sirkoskripsio a amamane ka hape, nyipici la mekune celë. The paatre kö ngöne la ijine ciil!