Porogarame Ka Hnyipixe Göi Asabele Ne Sirkoskripsio
Thaa sihngödre kö koi së laka, nyipi ewekë troa amamane la ihnimi së me thili koi Iehova Akötresie hmekuje hi. Ngo kola thele hnene la fen, troa angazone la aqane imelekeu së me Nyidrë. (Ioane 17:14) Qa ngöne lai, hna nyi taan la asabele ne sirkoskripsio ka hnyipixe koi 2001, ka hape, “Hnimi Akötresieti Jë—Ngo The Ajane Kö La Itre Ewekë Ne Fen,” kola troa akökötrene la ihnimi së koi Iehova, me acatrene la lapaune së matre thaa tro kö a ajojezine hnene la itre ewekë ne fen, nge angazone pi la mele së ngöne la götrane la ua.—1 Ioane 2:15-17.
Easë a anyipici Iehova, ke, atraqatre la ihnimi së koi Nyidrë. Eje hi laka, thaa ka hmaloi kö kowe la nöje i Akötresie troa cainöj. Ame ngöne la cainöje hna hape, “Ihnimi Së Koi Akötresie a Upi Së Troa Cainöj,” kola amamane la aqane trije hnene la itre trejine ka ala nyim, la xou me itre xaa hnepe ewekë ju kö ka sewe angatre troa cainöj.
Tune kaa la aqane ajojezi së hnene la itre thiina ka ngazo ne la fen? Ame lo itre aqane ujë ka ngazo ekö, saze hë la aqane goeëne itre eje enehila, kösë pëhë engazone itre ej. Troa cile fë la cainöje hna hape, “Kola Sisine La Ngazo Hnene La Itre Atr Ka Hnimi Iehova,” nge ame la taan la ketre, ke kola hape, “Itre Ewekë Ne Fen—Nemene La Aqane Tro Sa Goeëne Itre Ej?” Lue cainöje lai ka xatua së troa catre thipetrije la itre aja ka ngazo.
Eje fe e hnine la porogarame ne asabele, lo Ini Ne Cainöje Qaathei Akötresie, me Icasikeu Ne La Huliwa, memine mina fe lo Ini ne la zonal La Tour de Garde kowe la wiik. Troa xatua së fe hnene la cainöje kowe la ka ala nyim, hna hape, “Aqane Ngaane La Fen Hnene La Ihnimi Me Lapaun,” kola upi së troa xome la tulu i Iesu, ene la troa cile kowe la itre itupathi ne la fen. (Ioane 16:33) Loi e tro fe la itre ka etid me easë a hane traqa. Tro la itre ka ajane troa bapataiso a canga wange la atre thupëne la huliwa ne cainöj, matre hetre ijine troa hnëkë.
Kola troa amamane hnyawa hnene la asabele ne sirkoskripsio celë, la nyine tro sa hnim, matre troa kapa la itre manathithi qaathei Iehova. The triane kö së la itre cainöje cili!