“Ateine Akötesie La Nöjei Ewekë Asë”
1 Ame la pane huliwa ne la ekalesia ne Keresiano, ke, ene la troa cainöjëne la maca ne la Baselaia e cailo fen. (Mat. 24:14) Celë hi ketre huliwa ka tru. Ame kowe la ka ala nyimu, ke, tru catre pala ha la itre jiane la huliwa celë. Ame koi itre xan, ke, thatreine kö troa eatrëne la huliwa celë, pine laka, kola qëmeke kowe la icilekeu, me iaxösisi, nge troa hnyimasai angatr. (Mat. 24:9; 2 Tim. 3:12) Nge ame kowe la itre ka luelue, ke, ka xecie koi angatre laka, thatreine jë kö troa eatrëne la huliwa cili. Ngo ame pe, hnei Iesu hna qaja ka hape: “Ateine Akötesie la nöjei ewekë asë.”—Mat. 19:26.
2 Itre Tulu Ka Loi Koi Së: Hnei Iesu hna nyiqaane la huliwa ne cainöj, ceitune memine la ketre trahmanyi ka thipetrije la iangazo ne la fene asë. Hnene la itretre icilekeu me nyidrëti hna kuca koi nyidrë la nöjei pengöne iangazo, me akötrë nyidrë uti hë la mec. Ngo, ngöne la pune la mele i nyidrë, nyidrëti a qaja xeciëne ka hape: “Ase hë ni apone la fen.” (Ioane 16:33) Nyipici, jole koi së e troa qejepengöne la aqane ujë cili!
3 Hnene la itretre drei Iesu hna xome la tulu cili, ene laka, pëkö xou thei angatr, nge hetre hni ne ajane i angatre troa catre cainöj. Ala nyimu la itre hna thaucën, me lep, me akalabusin, me humuth. Ngo, hnei angatre hna “madine ngöne laka hna meku angate laka ijije troa xomi hmahma pine la atesiwa.” (Ite Huliwa 5:41) Ngacama tru la iangazo hna kuca koi angatr, nge kola mekune ka hape, pëkö atre atreine troa kuca la huliwa cili, ngo hnei angatre hna eatrëne la hnëqa ka eje thei angatr, ene la troa cainöjëne la maca ka loi “uti hë la cane la fene hnengödrai.”—Ite Huliwa 1:8; Kol. 1:23.
4 Aqane Troa Eatrëne Hnyawa La Hnëqa Së Enehila: Easë fe a troa hane catre cainöje qëmekene la itre iangazo ka tru, nge maine jë tro sa mekune ka hape, thatreine jë kö tro sa cile kow. Ngacama kola wathebo së, me axösisi së, me akalabusi së, me itre xaa itupathi ju kö nyine troa sewe së troa kuca la hnëqa së, ngo atreine hi tro sa hun. Troa tune kaa? “Tha hnei men, nge tha hnei cat; ngo loi pe hnene [“Ua i eni,” MN ], öni Iehova ne sabaoth.” (Zaka. 4:6) Pëkö ka atreine troa sewe së ngöne la huliwa së, e maine ce Iehova me easë!—Rom. 8:31.
5 Ame la easë a cainöj, ke, pëkö kepine tro sa lapa thaup, maine xoue pena, maine mekune pena laka, thatreine kö së troa eatrëne la huliwa cili. (2 Kor. 2:16, 17) Hetrenyi the së la itre kepine ka tru alien, nge ka aijijë së troa catre fë la mekune së troa qaja trongëne la maca ka loi ne la Baselaia. Hnene laka Iehova a xatua së, haawe, pëkö ejolene e tro sa eatrëne la huliwa hna “thatreine” kuca hnei atr!—Luka 18:27.