Loi e Pexeje Së Ngöne La Huliwa Ne Menu
1 Hnene la itre perofeta i Iehova ekö, tui Iesu mina fe, hna ithahnatane la ketre huliwa ka iacaasinekeune la itre atr ka nyimutre. (Is. 56:8; Ezek. 34:11; Ioane 10:16) Kola eatrëne la huliwa cili enehila, jëne la maca ka loi ne la Baselaia hna cainöjëne e cailo fene hnengödrai. (Mat. 24:14) Kolo ha mama hnyawa la itre atr ka nyihluei Akötresie, e nyipine la itre ka thaa nyihluei Nyidrëti kö. (Mal. 3:18) Nemene la aliene lai koi së?
2 Ketre Sipu Hnëqa Së: Atreine tro së a xomi ini qa ngöne la tulu hna hamëne hnei Paulo, ene laka, hnei angeice hna catre elemekene la huliwa ne cainöj. Hnei angeice hna trotrohnine la hnëqa ka eje thei angeic, ene la troa cainöje matre aijijëne la nöjei atr troa drenge la maca ka loi me hane mel. Celë hi ewekë ka upi angeice troa thaa mano huliwa thatraqai angatr. (Rom. 1:14-17) Ngöne la hneijine ngazo hna cile kowe hnene la nöjei atr enehila, hapeu, thaa ketre hnëqa kö ka tru la tro së a catre xatuane la itre atr ka lapa ngöne la itre götrane hna upi së troa cainöje ngön?—1 Kor. 9:16.
3 Nyipi Ewekë Troa Huliwa Nyimenyim: Hna xomeceitune la huliwa ne cainöj, me ketre huliwa jëne iamele. Nyipi ewekë tro sa thele la itre atr, me xatua angatre troa hane mele qëmekene troa traqa la pun. Xoxopatre pe hi la ijin. Angatre e qëmekene la mec! Thaa sesëkötre kö së la Iesu a thuecatre kowe la itretre drei nyidrë, troa “xëwe kowe la Joxu ne la meledrai, mate upepi la angete troa menue kowe la meledrai i anganyidë.”—Mat. 9:38.
4 Ala nyimu la itre ka huliwa thatraqane la Baselaia, angatre a trotrohnine la aqane patre nyimenyime la itre drai enehila, haawe, angatre a ketre catre mina fe ngöne la huliwa ne iamele. Ka lapa la ketre thöth, Hirohisa la ëje i angeic, thene la thine i angeice me foa lao trejine me angeic. Hnei angeice hna hlë e trois heures e hmahmakany matre troa hamëne trongëne la itre zonal, ke, angeice a ajane troa xatuane la fami angeic. Nge, Hirohisa a ajane fe troa catre ngöne la huliwa ne cainöj, haawe, angeice a hane nyiqaane jë troa pionie lapa. Hapeu, hetrenyi kö la itre xaa jëne tro nyipunie a catre ngöne la huliwa ne cainöj, a ketre huliwa lai hna troa nyipune ngöne la hneijine celë, thaa tro hmaca kö a kuca thupen?
5 “Xoxopate pe hi la ijin.” (1 Kor. 7:29) Qa ngöne lai, loi e tro sa kuca asë la hne së hna atrein, matre troa eatrëne la huliwa ka sisitria hune la nöjei huliwa asë—ene la troa cainöjëne la maca ka loi ne la Baselaia, me inine la itre atr. Hnei Iesu hna aceitunëne la huliwa ne cainöje celë me huliwa ne menuë hlapa. (Mat. 9:35-38) Maine jë, tro la aqane catre së ngöne la ijine meledrai, a thuejëne la ketre atr troa hane ketre atrene lo ka ala nyimu ne la itretre nyihluei Akötresie hna qejepengöne ngöne la itus Hna Amamane 7:9, 10.