Loi e Troa Ketr La Hni Ne La Hnainin
1 Qëmekene tro Iesu a elë hnengödrai eë, hnei nyidrëti hna upe la itretre drei nyidrë troa inine la itre xaa atr troa “trongëne” la nöjei ewekë asë hnei nyidrëti hna ahnith. (Mat. 28:19, 20) Maine tro la ketre atr a “trongëne” la itre hna amekötine hnei Keriso, tro la ithuemacanyi a ketr la hni angeic. (Sal. 119:112) Tune kaa la aqane tro nyipunie a ketr la hni ne la itre atr hnei nyipunie hna ini tusi memin?
2 Sipo Iehova Jë Troa Eatrongë Nyipunie: Huliwa qaathei Akötresie, la troa inine la itre atr. Maine easë a ajane troa hetre thangane ka loi la huliwa së, nyipi ewekë tro së a thele manathithi thei Nyidrë, ngo thaa tro kö së a mejiune kowe la itre hne së hna atrein. (Ite Huliwa 16:14; 1 Kor. 3:7) Qa ngöne lai, ka nyipi ewekë catre tro së a sipone la ixatua i Iehova hnene la thith, ngöne la easë a inine la itre xaa atr la nyipici.—Is. 50:4.
3 Atrehmekune Jë La Hna Lapaune Kow Hnene La Hnainin: Tro së a atreine hamëne la itre mekune ka ijije troa ketr la hni ne la itre atr, e hne së hna atrepengöne hnyawa la ewekë hnei angatre hna lapaune kow, memine la kepine matre angatre a mejiune kow. Pine nemene matre kola pi ajane hnene la hnainine troa atre la ini celë? Nemene la ka axeciëne koi angeice laka, nyine mejiune kow? Atrehmekune lai ka troa xatua së troa ithahnata cememine la wangatrehmekun.—Ite Huliwa 17:22, 23.
4 Loi e Troa Thaa Jol, Nge Qa Hnine La Tusi Hmitrötre La Itre Mekun: Loi e troa hetre aliene la nyipici kowe la hnainin. (Ite Huliwa 17:24-31) Nyipi ewekë tro së a hamëne la nyipi kepine matre easë a lapaun. (1 Pet. 3:15) Ngo loi e tro pala hi a ithahnata cememine la hni ka menyik, me xomihni.
5 Nyi Ecatrene Jë La Ini Hnene La Itre Ceitun: The xome hmekuje kö la itre ceitune ka hmaloi troa trotrohnine hnene la hnainin, ngo loi e tro fe itre eje a ahlëne la itre aja ne la hni angeic. Loi e troa ketr la mekune memine la hni angeic. Hnei Iesu pala hi hna xome la itre ceitun. (Mareko 4:33, 34) Qa ngöne lai, troa hetre thangane ka loi la ketre ceitun, e ka ihmeku hnyawa eje memine la mekune hna ithahnatan, nge ka lolo troa trongëne hnene la hnainin.
6 Amamane Jë La Itre Manathithi Hna Kapa Jëne La Nyipici: Kola pi atre hnene la itre atr la itre manathithi hnei angatre hna kapa, qa ngöne la hnei angatre hna inin. Xatuane jë la hnainine troa kepe thangane la inamacane ka eje ngöne la itre trenge ewekë i Paulo ngöne 2 Timoteo 3:14-17.
7 The kucakuca kö e thaa drei së kö hnene la itre xaa atr. Thaa tro jë kö a hmala la hni ne la itre atr asë. (Mat. 13:15) Ngo ame itre xaa atr, hnei angatre hna lapaune koi Akötresie. (Ite Huliwa 17:32-34) Epi tro la aqane catre tro fë së la maca ka loi matre troa ketr la itre hni ne la itre atr, a xatuane pala hi la ka ala nyim, troa kapa me “trongëne” la hna ahnithe hë hnei Iesu.