Hapeu, Hetre Ka Sewe Nyipunie Troa Cainöj?

¹ Tru catr hnei jol ne la itre atr enehila. Ketre tune mina fe la Itre Temoë i Iehova, tru hnei jole i angatr—angatr a ini Tusi Hmitrötr, me sin la itre icasikeu ne la ekalesia, me cainöj trootro. Ketre, easë a huliwa i maseta, me nyidrawan la uma së maine kuca la itre qa së göi ini, me itre xaa hnëqa ju kö, laka itre ej asë lai a xom la traeme së. Ketre jole lai ka tru kowe la itre hene fami.

² Pine laka, ngöne la itre xaa götran, itre hene fami a huliwa mec troa thele thupen la itre hna ajan hnene la fami. Ngöne laka, tru la traem me trenge catr hnei angatr hna xom göi huliwa i maseta, angatr pe hi a hamën la hnepe ka co hi thatraqan la huliwa ne cainöj. Pine laka, hnëqa i angatr troa huliwa thupene xen kowe la fami, tro jë la itre xan a mekun ka hape, pëkö engazon e tro pe hi a co la itre hawa ne tro angatr a hane cainöj. (1 Tim. 5:8) Enehila, easa cil kowe la itre jol ka nyimutre ngöne la easë a thel, ma ene hi lo itre ka nyipi ewekë thatraqan la mele së. Ngo, thaa tro pi kö a nue la huliwa i maseta troa thungijë së troa cainöjën la maca ka loi. (Mareko 13:10) Haawe, loi e tro sa pane wang hnyawa la aqane mele së enehila.

³ Pine laka, kolo pala hi a saze la fen, ma tro jë la hene fami a mekun laka ma loi e troa nyimutre catr la itre hawa hna xom thatraqan la huliwa i maseta, ke, matre atrein troa cil elany kowe la itre ijine jol. (1 Kor. 7:31) Kola mama laka e maine tru la traem hna xom göi huliwa i maseta, ke, kolo fe a tru la itre ewekë hna itön, maine tru la traem fe koi nyine madrin, ngo hapeu, jëne madrine kö lai kowe la fami, maine pena troa huliwan la traem cili kowe la itre ewekë ne la ua, me sin la itre icasikeu? Easa ajan troa neën la itre ewekë ka troa hetre ethan kowe la mele së ngöne la götran la ua. Loi e tro sa drengethenge la eamo hna hamën hnei Iesu, ene la troa ‘amë thatraqa së la tenga mo e koho hnengödrai’ me thel troa hetre “nyi [së] thei Akötesie,” ke celë hi sipu mel ka loi.—Mat. 6:19-21; Luka 12:15-21.

⁴ Thele Panëne Jë La Itre Ewekë Ne La Baselaia: Hnei Iesu hna inin la itre drei nyidrë troa amë panën la itre ewekë ne la ua, hun la nöjei ewekë asë. Hnei nyidrëti hna ithuecatr koi angatr me hape: “The kukehnine kö, kola hape, Tro sha xeni nemen? Nge, tro sha iji nemen? Nge, Tro sha xetë nemen?” Pine nemen matre nyidrëti a qaja tun? Nyidrëti a qaja ka hape: “Ate la Tetetro i nyipunie e koho hnengödrai laka, ijiji nyipunie la nöjei ewekë cili.” Maine ka xecie koi së la mekun celë, tre, pëkö itupath ka troa ajolë së troa kuca la hnei Iesu hna qaja thupen kola hape: “Pane thele jë nyipunie la baselaia i Akötesie, me thina ka meköti anganyidë; nge troa hamëne fe koi nyipunie la nöjei ewekë cili [itre ka nyipi ewekë] thatraqane la mele së.” Thaa tro kö a sihngödr koi Akötresie laka, eje the së la itre ewekë nyine thatraqan la mele së. (Mat. 6:31-33) Thaa ijine tro kö së la a hnehengazon menun pala ha troa huliwa göi mani, maine pena troa ajan troa hetre huliwa ka loi ngöne la fen celë ka troa paatr.—1 Pet. 5:7; 1 Ioane 2:15-17.

⁵ Ame la pane alien la huliwa i maseta, tre, nyine tro së a thele thupen la itre ka nyipi ewekë koi së ngöne la ngönetrei. Ngo, nemen la etrun la hne së hna ajan? Hnei Paulo aposetolo hna cinyihane ka hape: “E hetenyi hë shë la xeni me ixete, ea mejihnineju hë lai.” Hapeu, tro kö së a thel troa akökötren la hne së hna hetreny? Maine eje hi, tre, tro sa menuën la itre ethan la itre ewekë hna hmekë së qa ngön hnei Paulo, kola hape: “Ame angete ajane troa tenamo, te, angat’ a kei kowe la itupath, memine la theth, me nöjei aja ka hmo me nyine angazon, celë hi hna alöne la nöjei ate ngöne la meci me hnëjin.” (1 Tim. 6:8, 9; Mat. 6:24; Luka 14:33) Nemen la aqan tro sa atrehmekun laka kola ananazijë së hnene la pi aja mo?

⁶ Maine kola ipië la hawa ne cainöje së hnene laka tru la aqane thele mani hne së, maine pena thaa nyipi trotrohnine kö së la enyipi ewekën la troa hujën la mele së kowe la huliwa ne cainöj, haawe, ketre götran la mele së lai nyine troa amekötin, matre tro sa amë panën la itre nyipi huliwa. (Heb. 13:15, 16) Maine easa thel troa ahmaloeën la mele së, tre, troa ketre ixatua ka tru koi së la aqane ujë cili, ke, troa apaatren la itre ewekë cili ka ajolën la huliwa ne cainöje së. Loi e tro pala hi së a amë panën la itre huliwa ne Baselaia, maine easa troa huliwan la traem me trenge catre së.

⁷ Thaa Gufa Kö La Huliwa: Kola xatua së hnene la itre trenge ewekë i Paulo tro pala hi së a “catr troa huliwa i Joxu, ke ate hë [së] laka, tha gufa kö la huliwa [së] kowe la Joxu.” (1 Kor. 15:58) Ame la “huliwa i Joxu” ka sisitria, tre, ene la huliwa ne cainöjën la Baselaia, me huliwa ne inin la itre atr matre tro angatr a hane itretre drei i Iesu. (Mat. 24:14; 28:19, 20) Maine easa ajan troa akökötren la aqane tro së a cainöj, tre, loi e tro sa ami ijin thatraqan la huliwa ne cainöj e nöjei wiik, me catr matre thaa tro kö a huliwan la ijin cili kowe la itre xaa ewekë pena ha. (Efe. 5:15-17) Haawe, thaa tro jë kö la huliwa i maseta maine ketre ewekë ju kö a sewe së troa xom la huliwa ne cainöj.

⁸ Ngöne la easa sipu hamën la traem me trenge catre së troa ithawakeun memine la itre xan la itre nyipici qa hnine la Tusi Hmitrötr, easë fe a kapa la madrin ka sisitria ka fetra qa ngöne la hne së hna hamën qa kuhu hni së. (Ite Huliwa 20:35) Maine tro sa catre thel troa cainöjën la Baselaia, tre, atrein hi tro sa eköth la mejiune së kowe la itre ewekë ka troa traqa, “ke tha thina ka tha meköti kö Akötesie mate troa thëthëhmine la huliwa [së], memine la ihnimi hne [së] hna amamane kowe la atesiwa i nyidë.”—Heb. 6:10.