Loi e Troa Tro Xom Pala Hi La Itre Huliwa i Akötresie Ngöne La Hneijin Ne Hedredrei
1 Nyimu pengöne ewekë ka ijij tro sa kuca ngöne la hneijin ne hedredrei. Easë a ajan troa kuca la ketre ewekë ka ketre pengöne kö nge matre tro sa pane mano, ngöne la ijin kola lolo la drai. Ngo tro pala hi së a thupën wanga ajolëne jë la itre huliwa i Akötresie hne së hna majemine xom.−Fil. 3:16.
2 Hapeu hnei epuni kö hna ami ijin troa hane sin la Asabele Ka Ketre Pengöne Kö Ka Caa Drain, ngöne la hneijin ne hedredrei ne la macatre celë? Hnei epuni kö hna hane mekun troa hane easenyin la ketre atr ka aja ixatua e hnin la ekalesia? Kola ithuecatrekeu la troa ujë tune lai.
3 Maine hetre ijine i nyipunie, tun la itre mano ka tru, hane kö epun mekun troa akökötren la aqane tro epuni a cainöje trootro? Ala nyimu la itre trejin ka wangatrun la ijin cili, matre angatr a hane xom la huliwa ne pionie ka ixatua ngöne la ijine cili. Kösë ketre ijine lai ka ijij troa hane xom la itre xaa hnëqa ka tru ne la huliwa ne cainöj. Atreine hi troa hetreny la madrin thene la itre fami, troa ce cainöj ngöne itre xaa drai ka pexej. Ngo maine atreine hi nyipunie, hapeu, ijije kö tro epuni a hane aelën la itre hawa ne cainöje i epun? Ketre, lolo catr la itre manathith hna kapa e troa cainöj e hejihej, pine laka, lolo la drai, nge ketre qea lai.
4 Hapeu, epuni a troa mano e trön la hnapet? Maine eje hi, tre, epuni kö a hnëkë matre troa sin la itre icasikeu ngöne la itre nöj hnei epun hna troa tro kow? Nge tune kaa fe troa ce cainöj memin la itre trejin ne la itre götrane cili? Maine tro nyipunie a amë la itre huliwa cili ngöne la itre ijine mano i epun, eje hi lai laka, tro hë epuni a kepe thangan ka lolo. (Rom. 1:11, 12) Ketre, ijije kö tro epuni a hane cainöj trootro ngöne la nöjei ijin, ngöne la itre hnei epuni hna tro? Loi e tro pala hi epuni a xometrongën la Tusi Hmitrötre i epun, me itre xaa itusi ju kö. Mekune kö troa thele ijin troa e me inin la Tusi Hmitrötr. Mekune hnyawa kö së laka, maine nyipi ewekë koi së troa mano pine laka hne së hna huliwa i maseta, ngo thaa tro pi kö së a nue la huliwa i Iehova.
5 Nyipici laka, troa tru catr hnei hne së hna troa kuca ngöne la hneijin ne hedredrei. Ngo thupëne kö së, ke ajolëne jë hnene la itre nyine madrin, lo itre hne së hna majemin kuca ngöne la huliwa i Akötresie. Tupathe jë pe së troa hane akökötren la huliwa së koi Akötresie, ngöne la hneijin ne hedredrei. Atrehmekune ju la itre nyine troa pane kuca ka loi ngöne la götran la ua, nge thele jë troa eatrën itre ej.−Fil. 1:10.