Itre Manathith Hne Së Hna Kapa Qa Ngöne La Ole Së Kowe La Ihnimi Iehova—Götrane 1
1 Hnei Paulo aposetolo hna cinyihan ka hape: “Easha aja [Iehova] ke pa i nyidëti hnimi shë.” (1 Ioane 4:19) Ame ngöne la easë a mekun la itre ewekë asë hnei Iehova hna hamë së, ene pe easë fe a hane thel troa olen atraqatr koi Nyidrë. Hnei Iesu hna amaman la tulu ngöne laka hnei nyidrë hna drengethenge me anyipicin la ëje i Akötresie memin la Baselaia. (Ioane 14:31) Hetre eloin la troa wangatrun la itre xaa aqan troa amaman la ole së kowe la aqane hnimi së hnei Iehova, memin la itre manathith hna kapa qa ngön.
2 Troa Cainöj Ngöne Itre Hnalapa Trootro: Hnei Iesu hna inin la itretre drei nyidrë la aqan troa xom la huliwa ne cainöje trootro. Kola amaman hnene la itre aqane amekötine i nyidrë, laka, hnei angatr hna cainöj ngöne la itre hnalapa trootro, me haöth la itre götrane cili hnene la maca ka loi. (Luka 9:1-6; 10:1-7) Kola amamane laka tru la ihnim së koi Iehova me kowe la itre ka lapa ezi së, ngöne la easa catre cainöje trootro, ngacama easa iöhnyi memin la itre atr ka pëkö caa hni ne ajan troa drei së, nge ka icilekeu. Ngo eje hi lai laka, hetre thangan ka loi pala hi hne së hna isa kapa qa ngön la hna cainöj trootro ngöne la itre hnalapa, pine laka, easë a acatren la lapaune së, thaa luelue kö së troa tro fë la maca, nge kola lualai la mejiun the së.
3 Maine tro sa ce huliwa memin la itre angela, haawe, tro hë së a öhn la itre atr ka ala nyim ka mecijin, me pi iji la nyipici. (Hna ama. 14:6) Hetreny la itre atr ka qaja ka hape, hna traqa koi angatr hnene la ketre temoë, nge thupene angatr a ase sipo ixatua jëne la thith. Hnene la lue trejin föe memin la ketre nekönatr hna cainöj trootro ngöne la itre hnalapa ngöne la ketre götran ne la itre hnapet, hna hëne ka hape Antilles. Hna mekun hnei nyidro troa umuth la cainöje i angatr, nge ame nekönatr, tre, nyën pe kö a tro troa fenafena la qëhnelö ne la ketre uma. Ene pe fe pi hi la qëhnelö hnene la ketre föe hmae. Ame hë la kola öhne lai hnene la lue sör, nyidroti a bëek hmaca me ithanata memin la föe. Hnei eahlo hna alö angatr kowe la uma, me qaja ka hape, eahlo hi a ase thith koi Akötresie matre troa up la Itretre Anyipici Nyidrë troa ini eahlo la Tusi Hmitrötr!
4 Troa Cainöj e Cahu Gojeny: Pine laka nyipi jole catr e troa öhn la itre atr ngöne la itre hnalapa i angatr, haawe, loi e troa cainöj e cahu xötre gojeny, ke, jëne tro lai a hane anyipicin koi angatr. Ketre, nyimutre la itre atr ka lapa ngöne la itre uma hna eköhagene xötreith, maine hnine itre batima hna thupëne hnyawa, nge jole catr e troa cainöj ngöne la itre hnalapa trootro e hnin. Ngo tro la ole së kowe la ihnimi Iehova, a upi së troa thele jën la nöjei aqan troa ketr la itre atr hnene la maca ne Baselaia, tun la troa cainöj ngöne la nojei ijin.—Ite edomë 1:20, 21.
5 Troa Iwai Hmaca: Pine laka easë a thel la itre atr ka “pë ewekë ngöne la [“ua,” MN]” haawe, loi e tro sa kuca la hne së hna atrein matre troa hamën la hnei angatr hna ajan. (Mat. 5:3) Kolo lai a hape, loi e tro së a bëek hmaca troa fie la itre itine nyipici hne së hna traan. (1 Kor. 3:6-8) Hnene la ketre trejin föe hna amë pe la ketre tarak kowe la ketre föe, nge kösë pëkö hni ne ajane i eahlo troa e. Ngo hnene la sör hna thel me tupath troa wai eahlo hmaca. Ame hë la kola iöhnyi hnei nyidro, hna öhn hnene la sör laka, thupene lo kola xötrei iöhny, hnene la föe hna itön la ketre Tusi Hmitrötr ka tru thupene catr. E cili kola nyiqaane ju hnene la sör la etid memine lai föe!
6 Troa Etid Memin La Itre Atr: Celë hi madrin ka tru me ahnahna hne së hna kapa qa ngön la huliwa ne cainöje trootro. Drei la manathith ka tru e troa xatuan la itre atr troa atre Iehova, me troa goeën la kola saze la itre aqane mele i angat matre troa amadri Akötresie, nge angatr a hane xom la bapataiso matre troa nyihatren la aja ka eje thei angatr troa hane nyihlue i Nyidrë ngöne la mele i angatr ka pexej!—1 Thes. 2:20; 3 Ioane 4.
7 Ame ngöne la treu ka troa xulu, nyipi ewekë la tro sa wangatrun la itre xaa manathith hne së hna kapa , qa ngöne laka, easë a amaman la ole së koi Iehova, pine la hnei Nyidrëti hna hnimi së.