Itre Manathith Hna Kapa Qa Ngön La Ole Së Kowe La Ihnimi Iehova—Götran 2
1 Ame ngöne lo treu hnapan hne së hna ce ithanatan la pane götran ne la topike celë; hne së hna qaja atrun la foa lao aqane tro së a olen koi Iehova la aqane hnimi së hnei Nyidrë, ngöne la hna cainöje trootro. (1 Ioane 4:9-11) Enehila easë a troa nyixan hnene la faifi lao itre xaa jën troa traqa kowe lai. Ame ngöne la easë a kuca asë la hne së hna atrein troa xatuan la itre xaa atr ngöne la götrane la ua, haawe hetre thangan ka loi mina fe hne së hna kapa.
2 Troa Cainöj Ngöne La Nöjei Ijin: Celë hi ketre jëne tro sa thele hnyawa la itre atr ka mecijin, me pi ij ka thel la meköt me hane hamë angatr la itre itus nyine ixatua koi angatr. Ka lolo catr e troa ‘anyipi ewekëne la nöjei ijin’ me anyipicin ngöne la nöjei ijin asë me cainöj kowe la nöjei atr asë hne së hna iöhny memin. (Efe. 5:16) Loi e tro së a catr troa cainöj tune lai, ngo eje mina fe laka, maine tro së a wangatrun la ole së kowe la ihnimi Akötresie memin la itre aja ne la itre atr, tro hë së a anyipicin ngöne la nöjei ijin.—2 Tim. 1:7, 8.
3 Hnene la ketre mesinare hna kepe thangan ka loi la hnei angeic hna ithanata memin la ketre atr ka ce xomi takesi me angeic. Hna drei angeic hnene lai trahmany. Hna iwai hmaca, nge hna nyiqaan la etid me nyidrë. Hnene lai trahmany hna kapa la nyipici me kökötre trootro ngöne la ua uti hë la hane xome nyidrë la hnëqa ne qatre thup hnin la ekalesia!
4 Troa Cinyanyi Tus: Maine jë thatreine kö së troa cainöj ngöne itre hnalapa trootro, pine la itre hnepe sine mec, maine ngazo catr pena la drai. Haawe, loi e tro pena së a cinyany, me nango cainöj jëne tus kowe la ketre atr hne së hna atre, koi itre ka trene sinee ka mec, maine kowe la itre atr ka paatre kö ngöne la easë a cainöj. Tro fe së a hane ce iupi fë memin la tusi së la itre tarak hna xötrei kapa, ka troa qaja la maca ne la Wesi Ula i Akötresie, me xatuan lai atr troa sa la tus maine hetre hninge i angeic. Xome jë la sipu hune tus ne la hnalapa i epun, maine Uma Ne Baselaia, ngo kola sipon matre thaa tro kö a xom la aderes ne Bethela.
5 Troa Cainöj Jën Telefon: Celë hi ketre jëne tro së a ketr la itre atr hna thatrein troa iöhny memin ngöne la hna cainöj ngöne itre hnalapa trootro. Maine tro së a thupën la aqane tro së a telefon, cememin la hni ka menyik, me atreine tro fë la cainöj, haawe tro ha kepe së hnyawa hnene la itre atr. Kola hamën hnene la Huliwa Ne Baselaia ne Febuare 2001, götrane 5-6, la itre mekun nyine ixatua ka lolo ngöne la aqane troa hetreny la itre thangane ka loi.
6 Ame ngöne la kola cainöj jën telefon hnene la ketre trejin, hnei nyidroti hna hnyingën kowe la ketre föe la hnei angeic hna mekun kowe la mele i angeic elany memin la fami i angeic. Hna qaja hnene la föe ka hape, eahlo a hleuhleu. Hnei eahlo hna qaja amaman ka hape pine laka hleuhleu catr eahlo, haawe, eahlo a umë hnine la hnalapa i eahlo. Hna ketr la hni eahlo hnene la ihnimi ne la sör, ene pe hnei eahlo hna ajan troa iöhny memin la trejin ezin la hna maketr. Hetre thangan ka lolo pine laka, hnene lai föe hna canga ajan troa etid!
7 Troa Kapa La Itre Trehnyiwa: Maine easë a hnim la itre atr ka lapa ezi së, haawe, loi e tro së a canga wangatrehmekun la nöjei trehnyiwa ka hane traqa kowe la hna icasikeu së, me hane kepe angeic. (Rom. 15:7) Loi e tro angeic a öhn laka, easë a hane wangatruny angeice fe, nge hetre ajan the së tro angeic a hane hetreny la mel ka loi ngöne la götrane la ua. Maine tro së a amaman la ihnimi së koi angeic, me sipon troa inin la Tusi Hmitrötr me angeic, haawe tro ha hane hetre ajan thei angeic troa kapa la ixatua së.
8 Aqane Ujë Së Ka Loi: Easë a thaipin la nyipici hnene la aqane ujë së ka lolo. (Tito 2:10) Ame ngöne la kola qaja aloine la itre thiina së Itretre Anyipici i Iehova hnene la itre atre ne fen, angatre hi lai a atrun la Akötresi së. (1 Pet. 2:12) Kolo mina fe lai a xatuan la itre xaa atr troa nyiqaane xötrën la gojeny ne tro kowe la mel.
9 Hapeu matre wange hmaca jë së lo lai faifi lao jëne troa amaman la ole së kowe la ihnimi Iehova me trongën itre ej? (1 Ioane 4:16) Maine tro së a kuca thenge lai, eje hi lai laka, tro ha atraqatr la itre manathith hne së hna troa menuën.