Jëne Iamele La Huliwa Ne Cainöje Trootro!
1 Celë hi ketre huliwa ka nyipi ewekë catr hna catre kuca enehila ngöne la fen. Kola wangatrun catrën la huliwa cili, hnei Iehova me Iesu me itre angela ka nyimutre. Nemen la huliwa cili, nge pine nemen matre ka sisitria catr ej? Ame la ewekë cili, tre, huliwa ne cainöjën la Baselaia, nge ej a aijijën la itre atr troa mel!—Rom. 1:16; 10:13, 14.
2 Ame itre xaa atr, angatr a mekun ka hape, ame la nyine troa kuca ka lolo matre troa xatuan la itre xan, tre, ene la troa tupath troa aloin la itre ewekë xötreithi së e celë fen. Ala nyimu la itre ka huliwa mec troa acil la tingeting, me thele nyin la itre mec, me hnehengazon la itre ejolen göi mani. Ngo nemen la nyipi ixatua kowe la itre atr?
3 Ka Sisitria Catr La Huliwa Ne Cainöj: Maca ne Baselaia hmekuje hi la ka qejepengön la alien la mel, memin la kepin matre kola akötr la itre atr, memin la sipu mejiun kowe la itre drai elany. Kola aijijën hnene la maca ka loi tro la itre atr a itre enehmu i Iehova, me hane kapa, “la tingeting ka sisitria qa thei Akötresie hune la nöjei mekun’ asë.” (Fil. 4:7) Maca ne Baselaia hmekuje hi la ka hamën la itre mekun nyine ixatua ka lolo matre troa eatrongën me xatuan la itre atr troa cil kowe la itre ejolen la mel enehila, me qaja la nyine troa kuca matre troa mele pe ngöne la kola troa apaatren la fene celë elany. (1 Ioane 2:17) Hapeu, thaa kolo kö lai a upi së troa catre kuca la hne së hna atrein, ngöne la huliwa ne cainöje trootro?
4 Hanawang la ketre ceitun: Nemen la nyipi aqane troa xatuan la itre atr ka imeköleny ngöne la ketre tribu, nge kola troa kei tran hnene la ketre itra etë? Hapeu, troa jöe la tim qa ngöne la ketre götrane la tra etë? Maine troa amingömingön la pun kowe la tribu ka troa paatr? Ohea! Nyipi ewekë pe troa ahlën la itre atren la tribu, me canga thuemacanyi angatr la ngazo, laka calemi hë, me xatua angatr troa kötr! Ame la itre atr ka meköl enehila ngöne la götrane la ua, tre, nyipi ewekë troa ahlë angatr, wanga tro angatr a mec. (Luka 21:34-36) Pine laka, kola troa paatr la fene hnengödrai celë, haawe, catre pi së troa kuca asë la hne së hna atrein troa cainöj, matre troa canga hmekën la itre atr!—2 Tim. 4:2; 2 Pet. 3:11, 12.
5 Catre Pi Së Ngöne La Huliwa Celë: Tro sa ce wang la itre aqane troa ketr la itre atr ka hetre hni ne ajan, hnene la maca ka loi, ngöne la itre hnalapa i angatr, me e cahu gojeny, jën telefon, me ngöne la nöjei ijin. Ame la huliwa hnei Iehova hna hamën koi së, tre, celë hi ketre huliwa ka nyipi ewekë catr ka ijije tro sa kuca. Maine tro sa catre xom la huliwa cili, eje hi lai laka, tro hë së a ‘amele së kö, memine fe la itre atr ka drei së.’—1 Tim. 4:16.