Loi e Tro Së a Aejën La Itre Aja Së Ngöne La Ua
1 Ame la Kovasio Ne Distrik, “Itretre Catr Cainöjën La Baselaia,” celë hi ketre ijine lai ka lolo catr, ke, kola aijijë së troa aejën la itre aja së ka nyipi ewekë catr ngöne la götrane la ua. Ceitune la itre göxeni ne ngönetrei ka lolo memine la porogaram hne së hna troa kapa, ngöne laka, kola troa ithua së ngöne la götrane la ua, “la nöjei wesi ula ne la lapaun.” (1 Tim. 4:6) Eje a troa aijijë së troa fedre catr koi Iehova. Nge easë a troa kapa mina fe la itre eamo memine la itre ithuecatr, ka troa xatua së troa cil kowe la itre itupath ngöne la mele së. Iehova a ithuecatr koi së, ka hape: “Tro ni a ini ’ö me köjane koi ’ö la jëne qâ i ’ö troa trongën; tro ni a haji ’ö me alamekë eö.” (Sal. 32:8) Drei la madrine së ngöne la easë a öhne laka, Iehova a hnimi së me eatrongën la mele së! Tro sa ce wange la itre xaa nyine tro sa kuca ka lolo ka troa aijijë së troa kepe thangan la porogaram ne la kovasio.
2 Nyipi Ewekë Tro Sa Hnëkën La Itre Hni Së: Isa qanyi së kö thupën la itre sipu hni së ngöne la ua. (Ite edomë 4:23) Kolo lai a hape, nyipi ewekë tro sa isa xomehnöth la itre aja së, me nyipici ngöne la aqane tro sa waipengö së kö. Ame la ijine kovasio, tre, celë hi ketre ijin tro sa pane waipengöne hnyawa la aqane imelekeu së me Iehova, nge celë fe ketre ijine troa ‘thuluën ngöne la wathebo ka meköti nge ka troa inuegufa.’ Maine easë a ajan troa hnëkën la itre hni së troa ‘kapa la wesi ula hna saan,’ loi e tro së a xëwe koi Iehova matre tro Nyidrëti a thelethele së, matre troa thele the së la itre xaa “jëne aköt,” ene pe troa canga wenë itre ej, me eatrongë së ngöne “la gojenyi ka epine palua.”—Iako. 1:21, 25; Sal. 139:23, 24.
3 Drenge Ju Nge Lapa Mekune Jë: Hnei Iesu hna haji Maretha cememin la hni ka menyik, pine la hnei nyidroti hna wangatrun menune pala ha la nyine troa xen, ngo hnei nyidrëti pe hna qaja aloinyi Maria ngöne laka, hnei angeic hna wangatrun la itre trenge ewekë i nyidrë, hna hape: “Maria a iën la götrane ka loi, nge thaa tro hmaca kö a xome qa thei angeic.” (Luka 10:39, 42) Maine eje the së lai aqane mekune cili, thaa tro jë kö së a nue la itre ewekë ka pë pengön, troa ajeanyi së qa ngöne la huliwa ka sisitria. Loi e troa xecie hnyawa koi së laka, hetre göhnë së, nge easë a troa drenge hnyawa la porogaram ne kovasio. Loi e tro sa thupën matre thaa tro kö a porotrik, maine tro lapaa, nge ketre, thaa tro kö së a ajolën la itre xan hnene la itre mobilisi së, me itre nyine xomi foto, me itre kamera së.
4 Ame ngöne la easë a dreng la itre cainöj, ka loi e tro sa hane fejan la itre nyipi mekun, matre troa xatua së troa waipengön la aqane eköthe trongën la itre mekun. Loi e tro fe së a iothekeun la itre mekun hne së hna dreng, memine la itre hne së hna atre hë. Ewekë lai ka troa xatua së troa trotrohnine hnyawa, me troa lapa fë hnyawa la itre mekun hne së hna kapa. Ame la easë a goeëne hmaca la itre mekun hne së hna fejan, nyipi ewekë tro sa thel e cili la aqane tro sa trongën itre ej. Loi e tro së isa ala caas a hnyinge hnyawa ka hape: ‘Tune kaa la thangan la mekune celë, ngöne la aqane imelekeu i eni me Iehova? Nemen la itre ewekë nyine tro ni a saze ngöne la meleng? Nemen la aqane tro ni a trongën la mekune celë, ngöne la aqane imelekeu i eni memine la itre xaa atr? Tune kaa la aqane tro ni a xom ej ngöne la eni a cainöje trootro?’ Ce ithanatane jë memine la itre xaa atr la itre mekun ka amadrinë së. Maine tro sa kuca la itre ewekë cili, eje hi lai laka, tro ha xatua së troa lapa fë hnyawa ‘e kuhu itre hni së’ la itre hnei Iehova hna qaja.—Ite edomë 4:20, 21.
5 Loi e Trongëne Së La Hne Së Hna Inin: Thupene la hna sin la kovasio ne distrik hnene la ketre thupëtresij, hnei angeic hna qaja ka hape: “Kola isa ketri së hnene la porogaram, me iupi troa thuluën la isa hni së memine la itre atren la fami së, nge kola hamëne fe la itre trepene meköti ne la Tusi Hmitrötr ka nyipi ewekë, nyine loi kowe la mele së. Itre eje a amekunë ni hnyawa lo hnëqang, ene la troa hane catre hamë ixatua kowe la ekalesia.” Ala nyimu mina fe së itre ka tune lai thupëtresij. Ngo thaa eje hmekuje kö la tro së a tro kowe la itre hna icasikeu, itre ijine kola eköth la lapaune së, me akeukawanyi së. Hnei Iesu hna qaja ka hape: “Maine ate nyipunie la ite ewekë cili, manathithi hë nyipunie maine nyipunie a kuca it’ ej.” (Ioane 13:17) Loi e tro së a thele troa trongën hnyawa la itre mekun ka isa ketri së. (Fil. 4:9) Celë hi sipu aqane tro së lai a aejëne hnyawa la itre hne së hna ajan ngöne la götrane la ua.
[Hna eköhagen götrane 4]
Lapa Mekune Hnyawa Jë La Hne Së Hna Dreng:
■ Nemen la thangane itre ej ngöne la aqane imelekeu së me Iehova?
■ Nemen la thangane lai, ngöne la aqane imelekeu i eni me itre xan?
■ Nemen la aqane tro ni a trongën itre ej ngöne la meleng, me ngöne la hna cainöje trootro?