Kola Sa La Itre Hnyinge i Nyipunie

◼ Nemen la nyine tro sa mekune hnyawa, maine hetrenyi së la itre mobilis me itre xaa ewekë ka tune lai?

Itre ewekë lai ka aijijë së troa hën me ithanata memine la itre xaa atr, ngöne la nöjei hne së hna tro. Maine nyipici laka, ka lolo la itre ewekë cili, ngo tro sa thupën matre thaa tro kö la itre mobilis memine la itre xaa ewekë ju kö ka tune lai, a iajolë ngöne la easë a cainöje trootro, maine sin pena la itre icasikeu i Keresiano. Troa iajolë tune kaa?

Tro sa ce wang la itre ethan ngöne la easë a cainöj, ngöne la kola ho la mobilis maine kola hë hnene la ketre atr jëne la ewekë ka tune lai. Nemen la hna troa mekun hnene la atr hne së hna cainöje kow? Nemen la hna troa mekun hnene lai atr, maine hne së hna thupatën lai porotrike së me angeic? Pëkö ka ajan e easë troa kuca la ketre ewekë, ka troa sawa la itre xan troa dreng la maca ne Baselaia. (2 Kor. 6:3) Qa ngöne lai, maine easë a xome trongën la itre mobilis maine itre xaa ewekë ka tune lai, haawe, loi e thaa tro pi kö itre ej a ajolë së maine itre xan, ngöne la hna cainöje trootro.

Nge tune kaa kö, ngöne la easë a itreqe, nge maine itre xaa trejin a cainöj kowe la ketre atr? Maine hne së hna amë la ketre ijin thatraqan la huliwa ne cainöj, hapeu thaa tro kö së a lapa mekune me eatrën hmekuje ju hi la huliwa ne cainöje së? Hnene laka easa ahmitrötrën la huliwa ne cainöje së, haawe nyipi ewekë tro sa kuca la itre xaa huliwa ka thaa nyipi ewekë catre kö ngöne la ketre ijine pena ha. (Rom. 12:7) Thaa kolo kö a sewe së troa telefon, matre troa cainöj, maine troa isa pui pena memine la ketre trejin.

Nyipi ewekë tro pala hi së a thupëne hnyawa la aqane tro së a telefon jën mobilis, nge easë a xomi loto, ke, kola mama laka, nyimutre la itre eatr ngöne loto hnene la aqane huliwa cili. Loi e tro sa trongëne hnyawa la itre hna amekötin ka wathebon troa telefon jëne mobilis, nge kolo pe a xomi loto.

Easë a sin la itre icasikeu i Keresiano, me itre asabele, me itre kovasio, matre troa hmi koi Iehova me kapa la itre ini qaathei Nyidrë. Tro kö së a hane amaman la hni ne ole së kowe la itre ijine cili, hnene la troa thing la itre mobilisi së me itre xaa ewekë ka tune lai, matre thaa tro kö itre ej a ajolë së memine la itre xaa atr ka ce sin me easë la itre icasikeu, troa drenge hnyawa? Maine kola hë së nge ka nyipi ewekë catr, haawe, loi e tro sa lö e kuhu trön matre troa sa la telefon. Maine pena, tre, tro sa thele troa kuca la itre sipu huliwa së ngöne la ketre ijin, ngo thaa tro kö a kuca itre ej ngöne la itre ijine kola hmi.—1 Kor. 10:24.

Epi tro pala hi së a metrötrën la itre xan, me amaman la aqane ahmitrötrëne së la itre ewekë ngöne la götrane la ua, hnene la aqane huliwane së la itre mobilis, memine la itre xaa ewekë ju kö ka tune lai.